મધ્યપ્રદેશના જાબલપુર ખાતે બર્ગી ડેમમાં બનેલી ક્રૂઝ દુર્ઘટનાએ સમગ્ર દેશને હચમચાવી દીધો છે. આ હૃદયદ્રાવક ઘટનામાં દિલ્હીના માયાપુરી વિસ્તારમાં રહેતા એક જ પરિવારના ત્રણ સભ્યોના મોત થયા છે, જેના કારણે પરિવાર અને વિસ્તાર બંનેમાં શોકની લાગણી છવાઈ ગઈ છે.
માહિતી મુજબ, પરિવાર જાબલપુર પ્રવાસે ગયો હતો અને બર્ગી ડેમમાં ક્રૂઝ બોટમાં ફરવા નીકળ્યો હતો. પરંતુ અચાનક બોટમાં ટેકનિકલ ખામી અને સલામતીની ખામીઓને કારણે દુર્ઘટના સર્જાઈ. બોટમાં લાઇફ જૅકેટ્સ હોવા છતાં તે યોગ્ય રીતે ઉપયોગમાં નહોતા, જે મોટું કારણ બન્યું હોવાનું કહેવાય છે.
દુર્ઘટના પહેલા પરિવારના એક સભ્યે પોતાના સગાઓને વીડિયો કોલ કર્યો હતો, જેમાં તેમણે કહ્યું હતું કે “અમે ડૂબી રહ્યા છીએ, પ્રાર્થના કરજો.” આ શબ્દો હવે આખા પરિવાર માટે અંતિમ યાદ બની ગયા છે. થોડા જ પળોમાં કનેક્શન તૂટી ગયું અને પછી દુઃખદ સમાચાર આવ્યા. સ્થાનિક પ્રશાસન અને રેસ્ક્યુ ટીમે તરત જ કામગીરી હાથ ધરી હતી, પરંતુ ત્રણેય લોકોને બચાવી શકાયા નહોતા.
ઘટનાએ ફરી એકવાર પ્રવાસી સ્થળોએ સુરક્ષા વ્યવસ્થાની ખામી સામે સવાલો ઊભા કર્યા છે.
દિલ્હીના માયાપુરી વિસ્તારમાં મૃતકોના ઘરે શોકનું માહોલ છે. પડોશીઓ અને સગાઓ સતત પહોંચીને સાંત્વના આપી રહ્યા છે. આ દુર્ઘટના માત્ર એક પરિવાર માટે નહીં પરંતુ સમગ્ર સમાજ માટે ચેતવણી સમાન છે કે પ્રવાસ દરમિયાન સુરક્ષા નિયમોનું પાલન કેટલું જરૂરી છે.
