એશિયન લેજેન્ડ્સ લીગ 2026માં આજે 2 ઓગસ્ટે ક્રિકેટ ચાહકોને ભારત અને પાકિસ્તાન વચ્ચેની રોમાંચક ટક્કર જોવા મળશે. ભલે બંને દેશો વચ્ચે હાલમાં કોઈ આંતરરાષ્ટ્રીય ક્રિકેટ શ્રેણી રમાઈ રહી ન હોય, પરંતુ આ લીગમાં બંને દેશોના પૂર્વ દિગ્ગજ ખેલાડીઓ ફરી એકવાર સામસામે આવી રહ્યા છે. ઝાંબિયાની રાજધાની લુસાકામાં રમાનારી આ મેચને લઈને બંને દેશોના ક્રિકેટપ્રેમીઓમાં ભારે ઉત્સાહ જોવા મળી રહ્યો છે.
શિખર ધવન સામે મોહમ્મદ હફીઝની કેપ્ટન્સીની ટક્કર
ઈન્ડિયા રોયલ્સની કમાન પૂર્વ ભારતીય ઓપનર શિખર ધવન સંભાળી રહ્યા છે, જ્યારે પાકિસ્તાન પેન્થર્સની કેપ્ટન્સી મોહમ્મદ હફીઝ કરી રહ્યા છે. બંને ટીમોમાં એવા અનેક ખેલાડીઓ સામેલ છે, જેઓ આંતરરાષ્ટ્રીય ક્રિકેટમાં વર્ષો સુધી ભારત અને પાકિસ્તાન માટે રમ્યા છે અને એકબીજા સામે અનેક યાદગાર મુકાબલા રમ્યા છે.
ભારત તરફથી સુરેશ રૈના, યુસુફ પઠાણ, હરભજન સિંહ, અંબાતી રાયડૂ, દિનેશ કાર્તિક અને સ્ટુઅર્ટ બિન્ની જેવા દિગ્ગજો રમી રહ્યા છે. જ્યારે પાકિસ્તાન તરફથી શોએબ મલિક, કામરાન અકમલ, શરજીલ ખાન, સાઈદ અજમલ, વહાબ રિયાઝ અને સોહેલ તનવીર જેવા અનુભવી ખેલાડીઓ મેદાનમાં જોવા મળશે.
પાકિસ્તાન પર જીતનું દબાણ
પાકિસ્તાન પેન્થર્સને ટૂર્નામેન્ટની પોતાની પ્રથમ મેચમાં એશિયન સ્ટાર્સ સામે હારનો સામનો કરવો પડ્યો હતો. તેથી આજે ટીમ જીત સાથે ટૂર્નામેન્ટમાં વાપસી કરવાનો પ્રયાસ કરશે. બીજી તરફ ઈન્ડિયા રોયલ્સે પોતાની પ્રથમ મેચ બાંગ્લાદેશ સામે રમી છે અને હવે તેની નજર પરંપરાગત હરીફ પાકિસ્તાન સામે જીત નોંધાવવા પર રહેશે.
મેચ ક્યારે અને કેટલા વાગ્યે રમાશે?
ભારત અને પાકિસ્તાન વચ્ચેની આ હાઈવોલ્ટેજ મેચ આજે 2 ઓગસ્ટે ઝાંબિયાની રાજધાની લુસાકામાં રમાશે. ભારતીય સમય મુજબ મેચ સાંજે 4:00 વાગ્યે શરૂ થશે. જોકે આ એક ખાનગી ટી-20 લીગ હોવાથી મેચના પ્રારંભમાં થોડો વિલંબ થઈ શકે છે.
લાઈવ મેચ ક્યાં જોઈ શકશો?
એશિયન લેજેન્ડ્સ લીગના પ્રસારણ અધિકાર ફક્ત ફેનકોડ પાસે છે. મોબાઇલ પર ફેનકોડ એપ ડાઉનલોડ કરીને મેચનું લાઈવ સ્ટ્રીમિંગ જોઈ શકાય છે. સ્માર્ટ ટીવીમાં પણ ફેનકોડ એપ દ્વારા મેચ જોઈ શકાશે. જોકે લાઈવ સ્ટ્રીમિંગ માટે સબ્સ્ક્રિપ્શન અથવા નિર્ધારિત ચાર્જ ચૂકવવો પડશે.
છ ટીમો વચ્ચે રમાઈ રહી છે લીગ
એશિયન લેજેન્ડ્સ લીગ 2026માં કુલ 6 ટીમો ભાગ લઈ રહી છે. તેમાં ઈન્ડિયા રોયલ્સ, પાકિસ્તાન પેન્થર્સ, શ્રીલંકા લાયન્સ, અફઘાનિસ્તાન પઠાણ્સ, બાંગ્લાદેશ ટાઈગર્સ અને એશિયન સ્ટાર્સનો સમાવેશ થાય છે. નિવૃત્ત દિગ્ગજ ક્રિકેટરોને ફરી મેદાનમાં જોવા મળતા આ લીગને ક્રિકેટ ચાહકો તરફથી સારો પ્રતિસાદ મળી રહ્યો છે.
