ભારતીય હવામાન વિભાગે દક્ષિણ ગુજરાત માટે રેડ એલર્ટ જાહેર કરતાં નવસારી જિલ્લા વહીવટી તંત્ર સંપૂર્ણ એલર્ટ મોડમાં આવી ગયું છે. ભારે વરસાદ, તોફાની પવન અને દરિયામાં ઊંચા મોજાંની આગાહીને ધ્યાનમાં રાખીને તંત્રે જાહેર સુરક્ષાના હિતમાં મહત્વપૂર્ણ નિર્ણય લીધો છે. નવસારી જિલ્લાના લોકપ્રિય ઉભરાટ, દાંડી અને ઓંજલના ચાંગલી ફળીયા બીચ આગામી સૂચના સુધી સહેલાણીઓ માટે સંપૂર્ણપણે બંધ જાહેર કરવામાં આવ્યા છે.
જિલ્લા વહીવટી તંત્રના જણાવ્યા અનુસાર હાલ દરિયાકિનારે પરિસ્થિતિ જોખમી બની શકે છે. ભારે વરસાદ અને પવનના કારણે દરિયામાં કરંટ વધવાની તેમજ ઊંચા મોજાં ઉછળવાની શક્યતા છે. આવી સ્થિતિમાં દરિયાકિનારે ફરવા જવું કે દરિયામાં ઉતરવું જીવલેણ સાબિત થઈ શકે છે. આ કારણસર કોઈપણ પ્રકારની અનિચ્છનીય ઘટના ટાળવા માટે બીચ પર પ્રવાસીઓની અવરજવર પર પ્રતિબંધ મૂકવામાં આવ્યો છે.
તંત્રે સ્થાનિક લોકો તેમ જ બહારથી આવતા પ્રવાસીઓને દરિયાકિનારાની મુલાકાત ન લેવા અપીલ કરી છે. સાથે જ હવામાન વિભાગ અને જિલ્લા વહીવટી તંત્ર દ્વારા સમયાંતરે જાહેર કરવામાં આવતી સત્તાવાર સૂચનાઓનું પાલન કરવા પણ અનુરોધ કર્યો છે. વહીવટી તંત્રે જણાવ્યું છે કે પરિસ્થિતિ સામાન્ય બન્યા બાદ અને હવામાન અનુકૂળ થયા પછી જ બીચ ફરીથી સહેલાણીઓ માટે ખુલ્લા મુકવામાં આવશે. ત્યાં સુધી લોકો પોતાની સુરક્ષાને પ્રાથમિકતા આપે, બિનજરૂરી પ્રવાસ ટાળે અને કોઈપણ અફવાઓ પર વિશ્વાસ કર્યા વગર માત્ર સત્તાવાર માહિતી પર જ ભરોસો રાખે.
