હાર્ટની બીમારી, ડાયાબિટીસ, હાઈ બ્લડ પ્રેશર, ડિપ્રેશન અને અન્ય લાંબા સમય સુધી ચાલતી બીમારીઓના દર્દીઓ માટે કેન્દ્ર સરકારે મોટી રાહત આપી છે. નેશનલ ફાર્માસ્યુટિકલ પ્રાઇસિંગ ઓથોરિટી (NPPA)એ 23 જરૂરી દવાઓના મહત્તમ રિટેલ ભાવ નક્કી કર્યા છે. હવે કોઈપણ મેડિકલ સ્ટોર અથવા ફાર્મા કંપની આ દવાઓ નક્કી કરેલી કિંમતથી વધુ ભાવે વેચી શકશે નહીં.
કેન્દ્ર સરકારે આ નિર્ણય ડ્રગ્સ પ્રાઇસ કંટ્રોલ ઓર્ડર (DPCO)-2013 હેઠળ જાહેર કર્યો છે. NPPA દ્વારા નક્કી કરાયેલા ભાવમાં GST સામેલ નથી. એટલે દવા ખરીદતી વખતે નક્કી કરેલી કિંમત ઉપરાંત લાગુ પડતો GST અલગથી ચૂકવવો પડશે.
દવા કંપનીઓ માટે કડક નિયમો લાગુ
NPPAએ તમામ દવા ઉત્પાદક કંપનીઓને સ્પષ્ટ સૂચના આપી છે કે તેઓ નક્કી કરેલા રિટેલ ભાવ કરતાં વધુ કિંમત વસૂલ કરી શકશે નહીં. આગામી 12 મહિનામાં જો કોઈ કંપની આ યાદીમાં સમાવિષ્ટ નવી દવા બજારમાં લાવશે તો તેને પણ આ જ ભાવ મર્યાદાનું પાલન કરવું પડશે.
દવા લોન્ચ થયાના એક મહિનામાં કંપનીએ તમામ જરૂરી દસ્તાવેજો NPPAના પોર્ટલ પર અપલોડ કરવા પડશે. સાથે નવી કિંમતની યાદી NPPA અને રાજ્યના ડ્રગ કંટ્રોલરને આપવી ફરજિયાત રહેશે. નિયમોનો ભંગ કરનાર કંપનીઓ સામે DPCO-2013 અને આવશ્યક વસ્તુ અધિનિયમ-1955 હેઠળ કાનૂની કાર્યવાહી થશે તેમજ વધારાની વસૂલાત વ્યાજ સહિત પરત ભરપાઈ કરવી પડશે.
આ 23 દવાઓના ભાવ નક્કી કરાયા
- હૃદય સંબંધિત દવા – રૂ.6.37 પ્રતિ કેપ્સ્યુલ
- એટોરવાસ્ટેટિન + ક્લોપિડોગ્રેલ + એસ્પિરિન (20/75/75 mg) – રૂ.8.89 પ્રતિ કેપ્સ્યુલ
- ક્લોનાઝેપામ + પેરોક્સેટીન (12.5 mg) – રૂ.17.52 પ્રતિ ટેબ્લેટ
- ક્લોનાઝેપામ + પેરોક્સેટીન (25 mg) – રૂ.20.06 પ્રતિ ટેબ્લેટ
- ડેસવેનલાફેક્સીન (50 mg) + ક્લોનાઝેપામ – રૂ.17.47 પ્રતિ ટેબ્લેટ
- ડેસવેનલાફેક્સીન (100 mg) + ક્લોનાઝેપામ – રૂ.25.83 પ્રતિ ટેબ્લેટ
- એસ્સિટાલોપ્રામ + ક્લોનાઝેપામ – રૂ.10.72 પ્રતિ ટેબ્લેટ
- એટોરિકોક્સિબ + પેરાસિટામોલ – રૂ.10.90 પ્રતિ ટેબ્લેટ
- ફેરસ એસ્કોર્બેટ + ફોલિક એસિડ – રૂ.16.92 પ્રતિ ટેબ્લેટ
- આયર્ન + ફોલિક એસિડ સિરપ – રૂ.0.28 પ્રતિ મિલીલીટર
- માયો-ઇનોસિટોલ + ડી-ચાઇરો ઇનોસિટોલ + વિટામિન D3 – રૂ.9.29 પ્રતિ ગ્રામ
- ઓફ્લોક્સાસિન + મેટ્રોનિડાઝોલ સસ્પેન્શન (100/200 mg) – રૂ.1.09 પ્રતિ મિલીલીટર
- ઓફ્લોક્સાસિન + મેટ્રોનિડાઝોલ સસ્પેન્શન (50/100 mg) – રૂ.0.86 પ્રતિ મિલીલીટર
- પેરાસિટામોલ ઓરલ સસ્પેન્શન – રૂ.0.66 પ્રતિ મિલીલીટર
- ટેલ્મિસાર્ટન + મેટોપ્રોલોલ (25 mg) – રૂ.15.01 પ્રતિ ટેબ્લેટ
- ટેલ્મિસાર્ટન + મેટોપ્રોલોલ (50 mg) – રૂ.18.50 પ્રતિ ટેબ્લેટ
- ટેલ્મિસાર્ટન + ક્લોર્થાલિડોન + મેટોપ્રોલોલ (50 mg) – રૂ.11.77 પ્રતિ ટેબ્લેટ
- ટેલ્મિસાર્ટન + ક્લોર્થાલિડોન + મેટોપ્રોલોલ (25 mg) – રૂ.11.67 પ્રતિ ટેબ્લેટ
- નેબિવોલોલ + ટેલ્મિસાર્ટન – રૂ.13.70 પ્રતિ ટેબ્લેટ
- સિટાગ્લિપ્ટિન + ગ્લાઇમેપિરાઇડ + મેટફોર્મિન (1000 mg + 2 mg) – રૂ.19.46 પ્રતિ ટેબ્લેટ
- સિટાગ્લિપ્ટિન + ગ્લાઇમેપિરાઇડ + મેટફોર્મિન (1000 mg + 1 mg) – રૂ.17.73 પ્રતિ ટેબ્લેટ
- ક્લેરિથ્રોમાયસિન + પેન્ટોપ્રાઝોલ + એમોક્સિસિલિન કોમ્બીકિટ – રૂ.122.56 પ્રતિ કિટ
- ડાપાગ્લિફ્લોઝિન + પિયોગ્લિટાઝોન + મેટફોર્મિન SR – રૂ.18.77 પ્રતિ ટેબ્લેટ
કયા દર્દીઓને મળશે સૌથી વધુ ફાયદો?
આ નિર્ણયથી હૃદયરોગ, ડાયાબિટીસ, હાઈ બ્લડ પ્રેશર, ડિપ્રેશન, એંગ્ઝાયટી, એનિમિયા, PCOS, બેક્ટેરિયલ ઇન્ફેક્શન, પેટના અલ્સર અને બાળકોમાં થતા ચેપની સારવાર માટે દવા લેતા લાખો દર્દીઓને સીધો લાભ મળશે. લાંબા સમય સુધી દવાઓ લેતા દર્દીઓના માસિક દવાના ખર્ચમાં રાહત મળવાની શક્યતા છે.
સામાન્ય લોકો માટે કેમ મહત્વનો નિર્ણય?
શુગર, હાર્ટ અને BP જેવી ક્રોનિક બીમારીઓના દર્દીઓને દર મહિને નિયમિત દવાઓ ખરીદવી પડે છે. આવી સ્થિતિમાં NPPAનો નિર્ણય બજારમાં દવાઓના મનમાની ભાવ પર નિયંત્રણ લાવશે અને દર્દીઓને વાજબી કિંમતે દવા ઉપલબ્ધ કરાવવામાં મદદરૂપ બનશે. સરકારનો ઉદ્દેશ્ય જરૂરી દવાઓ વધુ સસ્તી અને સરળતાથી ઉપલબ્ધ કરાવવાનો છે.
