ભારતીય સેનાના જવાનોને અતિશય ઠંડી અને ઊંચાઈવાળા વિસ્તારોમાં વધુ અસરકારક કામગીરી માટે હવે ખાસ પ્રકારનું ડીઝલ મળશે. ભારત પેટ્રોલિયમ કોર્પોરેશન લિમિટેડએ Xtreme Weather Grade (XWG) Diesel નામનું અત્યાધુનિક ડીઝલ વિકસાવ્યું છે. 31 જુલાઈએ BPCLના ચેરમેન અને મેનેજિંગ ડિરેક્ટર સંજય ખન્નાએ આ ખાસ ઇંધણ લોન્ચ કરતાં જણાવ્યું હતું કે, આ માત્ર એક નવું ઉત્પાદન નથી પરંતુ દેશની સુરક્ષા માટે વ્યૂહાત્મક રીતે ખૂબ જ મહત્વપૂર્ણ પગલું છે. આ ડીઝલ ખાસ કરીને એવા વિસ્તારો માટે તૈયાર કરવામાં આવ્યું છે, જ્યાં માઇનસ તાપમાનમાં સામાન્ય ઇંધણની કામગીરી પ્રભાવિત થાય છે.
સેના અને BPCLની ભાગીદારીથી તૈયાર થયું ખાસ ઇંધણ
સંજય ખન્નાએ જણાવ્યું કે ભારતીય સેના અને BPCL વચ્ચેના સહયોગથી આ ડીઝલ તૈયાર કરવામાં આવ્યું છે. અતિશય ઠંડી, બરફીલા વિસ્તારો અને ઊંચાઈવાળા સ્થળોએ માત્ર સૈનિકોની જ નહીં પરંતુ વાહનો અને મશીનોની ક્ષમતાની પણ કસોટી થાય છે. આવી સ્થિતિમાં વિશ્વસનીય ઇંધણ ઉપલબ્ધ રહે તે ખૂબ જરૂરી છે. તેમણે કહ્યું કે સેનાના મેદાની અનુભવ અને ભારતીય ઉદ્યોગની ટેક્નોલોજી સાથે મળીને આ સ્વદેશી ઉત્પાદન તૈયાર થયું છે, જે આત્મનિર્ભર ભારતના વિઝનને વધુ મજબૂત બનાવે છે.
ફ્રન્ટલાઇન સુધી પહોંચશે અવિરત સપ્લાય
BPCLએ જણાવ્યું કે XWG ડીઝલ સમયસર સીમા પર તૈનાત જવાનો સુધી પહોંચે તે માટે સંપૂર્ણ સપ્લાય ચેઇન તૈયાર કરવામાં આવી છે. મધ્ય પ્રદેશની બીના રિફાઇનરીમાં ઉત્પાદન બાદ વ્યૂહાત્મક રીતે પંજાબના બઠિંડામાં તેનો સંગ્રહ કરવામાં આવશે. ત્યાંથી જરૂરિયાત મુજબ આગળના વિસ્તારોમાં સતત પુરવઠો સુનિશ્ચિત કરવામાં આવશે, જેથી કપરા હવામાનમાં પણ સૈનિકોને ઇંધણની અછતનો સામનો ન કરવો પડે.
આ ડીઝલના ફીલ્ડ ટ્રાયલ ભારતીય સેનાની ટીમ સાથે ઊંચાઈવાળા વિસ્તારોમાં કરવામાં આવ્યા હતા. વાસ્તવિક પરિસ્થિતિમાં તેની કામગીરીની સફળ ચકાસણી બાદ જ તેને ઉપયોગ માટે મંજૂરી આપવામાં આવી છે.
આર્મી ચીફે ગણાવ્યું ગેમ ચેન્જર
ભારતીય સેનાના પ્રમુખ જનરલ ધીરજ સેઠે XWG ડીઝલને ભારતીય સેના માટે “ગેમ ચેન્જર” ગણાવ્યું. તેમણે જણાવ્યું કે અત્યંત ઠંડી અને ઊંચાઈવાળા વિસ્તારોમાં ફરજ બજાવતા જવાનો માટે આ ઇંધણ મોટી રાહત સાબિત થશે. તેમના જણાવ્યા અનુસાર આ ડીઝલનું Pour Point માઇનસ 42 ડિગ્રી સેલ્સિયસ છે, જ્યારે તેનો Flash Point આશરે 50 ડિગ્રી સેલ્સિયસ છે. એટલે કે ખૂબ નીચા તાપમાનમાં પણ આ ડીઝલ અસરકારક રીતે કામ કરી શકશે.
જનરલ સેઠે કહ્યું કે માત્ર એક વર્ષમાં પડકારને તકમાં ફેરવીને આ ઉત્પાદન તૈયાર કરવું આત્મનિર્ભર ભારતનું ઉત્તમ ઉદાહરણ છે. આ પ્રકારના સ્વદેશી પ્રયાસો ભવિષ્યમાં દેશની સંરક્ષણ ક્ષમતાને વધુ મજબૂત બનાવશે અને સીમા પર ફરજ બજાવતા જવાનોને વધુ વિશ્વસનીય સાધનો ઉપલબ્ધ કરાવશે.
