સુરત શહેરમાં સતત વરસી રહેલા ધોધમાર વરસાદે ફરી એકવાર જનજીવનને ભારે અસર પહોંચાડી છે. હવામાન વિભાગના રેડ એલર્ટ વચ્ચે શહેરના અનેક વિસ્તારોમાં ભારે વરસાદને કારણે પાણી ભરાઈ ગયા છે. બપોર બાદ વરસાદ વધુ તીવ્ર બનવાની આગાહીને ધ્યાનમાં રાખીને તંત્ર સંપૂર્ણ સતર્ક થઈ ગયું છે અને લોકોને બિનજરૂરી બહાર ન નીકળવાની અપીલ કરવામાં આવી છે. વરસાદના કારણે રસ્તાઓ, ગરનાળાં, રહેણાંક વિસ્તારો અને મુખ્ય માર્ગો પર પાણી ભરાતા વાહનવ્યવહાર ગંભીર રીતે પ્રભાવિત થયો છે.
શહેરની ભેદવાડ ખાડી ફરી એકવાર ઓવરફ્લો થઈ ગઈ છે. છેલ્લા 25 દિવસમાં ત્રીજી વખત આ ખાડી ઉભરાતાં આસપાસના વિસ્તારોમાં ફરી પૂર જેવી સ્થિતિ સર્જાઈ છે. ખાસ કરીને વેલંજ વિસ્તારમાં બે થી ત્રણ ફૂટ સુધી પાણી ભરાઈ જતાં સ્થાનિક લોકોને ભારે હાલાકીનો સામનો કરવો પડી રહ્યો છે. અનેક ઘરો અને દુકાનો સુધી પાણી પહોંચી જતાં લોકો ચિંતામાં મુકાયા છે. નીચાણવાળા વિસ્તારોમાં રહેતા લોકો સતત વરસાદને કારણે વધુ મુશ્કેલી અનુભવી રહ્યા છે. ચોકડી વિસ્તારમાં પાણી ભરાવાને કારણે ચક્કાજામ જેવી સ્થિતિ સર્જાઈ છે. અનેક વાહનો લાંબા સમય સુધી ટ્રાફિકમાં ફસાઈ ગયા હતા. મીની બજાર અને પ્રિન્સેસ પ્લાઝા પાસે પણ ગોઠણસમા પાણી ભરાઈ જતાં લોકો માટે અવરજવર મુશ્કેલ બની ગઈ હતી. રસ્તા પર ભરાયેલા પાણીમાં અનેક ટુ-વ્હીલર બંધ પડી ગયા હતા, જેના કારણે વાહનચાલકોને પોતાના વાહનો ધક્કા મારીને બહાર કાઢવાની ફરજ પડી હતી.
કતારગામના રાશી સર્કલ તેમજ લલિતા ચોકડી વિસ્તારમાં પણ ભારે પાણી ભરાયા છે. મુખ્ય માર્ગો પર પાણી ભરાઈ જતાં વાહનવ્યવહાર ધીમો પડી ગયો છે. અનેક સ્થળોએ વાહનોની લાંબી કતારો જોવા મળી રહી છે. વરસાદને કારણે લોકો કામ પર પહોંચવામાં તેમજ વિદ્યાર્થીઓ અને મુસાફરોને પણ મુશ્કેલીઓનો સામનો કરવો પડી રહ્યો છે. વરાછાથી સ્ટેશન તરફ જતાં માર્ગ પર આવેલા લંબે હનુમાન ગરનાળામાં ભારે પાણી ભરાતા રસ્તો સંપૂર્ણ બંધ કરી દેવામાં આવ્યો છે. પોદ્દારથી સ્ટેશન તરફ જતો ગરનાળો પણ પાણીમાં ગરકાવ થઈ ગયો હોવાથી વાહનવ્યવહાર માટે બંધ કરવામાં આવ્યો છે. ટ્રાફિક પોલીસ દ્વારા લોકોને વૈકલ્પિક માર્ગોનો ઉપયોગ કરવાની સલાહ આપવામાં આવી છે. સાથે જ કામ વગર બહાર ન નીકળવા માટે ખાસ અપીલ કરવામાં આવી રહી છે.
ઉધના રેલવે યાર્ડ અને લિંબાયતને જોડતું ગરનાળું પણ ભારે વરસાદના કારણે પાણીમાં ગરકાવ થઈ ગયું છે. અંદાજે અઢી ફૂટ જેટલું પાણી ભરાઈ જતાં સલામતીના કારણોસર ગરનાળું વાહનવ્યવહાર માટે બંધ કરી દેવામાં આવ્યું છે. પાણીનું સ્તર સતત વધી રહ્યું હોવાથી તંત્ર સતત નજર રાખી રહ્યું છે. વરાછા અને ઉધના સહિત શહેરના અનેક વિસ્તારોમાં રસ્તાઓ પર પાણી ભરાઈ જતાં સામાન્ય જનજીવન ખોરવાઈ ગયું છે. રહેણાંક વિસ્તારોમાં પણ પાણી ઘૂસી જતાં લોકો ઘર બહાર નીકળી શકતા નથી. વરસાદના કારણે વેપાર-ધંધા પર પણ અસર જોવા મળી રહી છે અને અનેક સ્થળોએ દુકાનો વહેલી બંધ કરવાની ફરજ પડી છે.
વરસાદની અસર હવાઈ સેવાઓ પર પણ જોવા મળી છે. સુરતમાં ખરાબ હવામાન અને ઓછી વિઝિબિલિટીના કારણે આજે દુબઈ-સુરત ફ્લાઇટ રદ કરવામાં આવી છે. ઉપરાંત દિલ્હી-સુરત અને દીવ-સુરત વચ્ચેની ફ્લાઇટ પણ રદ કરાઈ છે. ફ્લાઇટ રદ થતાં મુસાફરોને ભારે મુશ્કેલીનો સામનો કરવો પડી રહ્યો છે. એરપોર્ટ સત્તાવાળાઓએ મુસાફરોને તેમની ફ્લાઇટની માહિતી એરલાઈન સાથે ચકાસવાની સલાહ આપી છે.
બીજી તરફ, સતત વરસાદને કારણે ઉકાઈ ડેમમાં પાણીની આવકમાં પણ નોંધપાત્ર વધારો થયો છે. હાલમાં ડેમમાં લગભગ 1.96 લાખ ક્યુસેક પાણીની આવક નોંધાઈ રહી છે અને ડેમની સપાટી 317.05 ફૂટ સુધી પહોંચી છે. ઉપરવાસમાં વરસાદ ચાલુ રહે તો પાણીની આવકમાં વધુ વધારો થવાની શક્યતા વ્યક્ત કરવામાં આવી રહી છે. ડેમની સ્થિતિ પર તંત્ર સતત નજર રાખી રહ્યું છે. સુરત મહાનગરપાલિકાના કમિશનરે જાહેર જનતાને ખાસ અપીલ કરી છે કે રેડ એલર્ટને ધ્યાનમાં રાખીને લોકો બિનજરૂરી બહાર ન નીકળે. વરસાદની સ્થિતિ ગંભીર હોવાથી માત્ર અત્યંત જરૂરી કામ હોય ત્યારે જ બહાર જવું. પાણી ભરાયેલા રસ્તાઓ અને ગરનાળાંમાંથી પસાર થવાનું ટાળવું તેમજ બાળકોને પણ આવા વિસ્તારોમાં જવા ન દેવા જણાવ્યું છે.
મહાનગરપાલિકાએ લોકોને અધિકૃત સૂચનાઓ પર જ વિશ્વાસ રાખવા અને સોશિયલ મીડિયા પર ફરતા અફવાઓથી દૂર રહેવાની પણ અપીલ કરી છે. તમામ વિભાગોને એલર્ટ પર રાખવામાં આવ્યા છે અને વરસાદની સ્થિતિ પર સતત નજર રાખવામાં આવી રહી છે. જરૂર પડે ત્યાં તરત જ રાહત અને બચાવ કામગીરી હાથ ધરવા માટે ટીમો તૈયાર રાખવામાં આવી છે. વરસાદના કારણે અનેક વિસ્તારોમાં વીજળી અને પાણીની વ્યવસ્થાને પણ અસર થવાની શક્યતા હોવાથી સંબંધિત વિભાગોને પણ સજ્જ રાખવામાં આવ્યા છે. તંત્ર દ્વારા સતત પરિસ્થિતિનું મોનિટરિંગ કરવામાં આવી રહ્યું છે અને જ્યાં પાણી ભરાવાની શક્યતા વધુ છે ત્યાં ખાસ નજર રાખવામાં આવી રહી છે.
સુરત શહેરે અગાઉ પણ બે વખત પૂર જેવી સ્થિતિનો સામનો કર્યો છે. તેથી આ વખતે પણ સતત વરસતા વરસાદને કારણે લોકોમાં ચિંતા વધી છે. અનેક પરિવારો ફરી એકવાર પાણી વચ્ચે જીવન જીવવા મજબૂર બન્યા છે. હાલની પરિસ્થિતિને ધ્યાનમાં રાખીને આગામી કલાકો સુરત માટે અત્યંત મહત્વના માનવામાં આવી રહ્યા છે. જો વરસાદનું જોર યથાવત રહેશે તો વધુ વિસ્તારોમાં પાણી ભરાવાની શક્યતા નકારી શકાય તેમ નથી. તંત્ર સતત લોકોને સાવચેત રહેવા, સુરક્ષિત સ્થળે રહેવા અને કોઈપણ પ્રકારની મુશ્કેલી સર્જાય તો તાત્કાલિક સંબંધિત વિભાગનો સંપર્ક કરવા અપીલ કરી રહ્યું છે. નાગરિકોની સતર્કતા અને તંત્ર સાથેનો સહયોગ જ આ મુશ્કેલ સમયમાં સૌથી મોટું રક્ષણ સાબિત થશે.
