આસામમાં ભારે વરસાદ અને પૂરની સ્થિતિ હજુ પણ સંપૂર્ણપણે કાબૂમાં આવી નથી. શનિવારે વધુ 2 લોકોના મોત થતાં આ વર્ષે પૂર સંબંધિત મૃત્યુઆંક વધીને 82 થયો છે. જોકે છેલ્લા કેટલાક દિવસોની સરખામણીએ સ્થિતિમાં થોડો સુધારો નોંધાયો છે, તેમ છતાં રાજ્યના 5 જિલ્લાઓમાં હજુ પણ લગભગ 1,92,799 લોકો પૂરની અસર હેઠળ છે. રાજ્ય સરકાર રાહત અને પુનર્વસન કામગીરીને વધુ ઝડપી બનાવવા માટે સતત પ્રયાસ કરી રહી છે.
5 જિલ્લાઓમાં હજુ પણ ગંભીર સ્થિતિ
પૂરની સૌથી વધુ અસર શિવસાગર, ગોલાઘાટ, જોરહાટ, નાગાંવ અને ચરાઈદેઓ જિલ્લામાં જોવા મળી રહી છે. ગુરુવારે જ્યાં 8 જિલ્લાઓમાં 2 લાખથી વધુ લોકો અસરગ્રસ્ત હતા, ત્યાં હવે અસરગ્રસ્ત જિલ્લાઓની સંખ્યા ઘટી છે અને પાણીનું સ્તર કેટલાક વિસ્તારોમાં ધીમે ધીમે ઘટવા લાગ્યું છે.
તેમ છતાં શિવસાગરની દીખો નદી અને ગોલાઘાટના નુમાલીગઢ વિસ્તારમાં ધનસિરી નદી હજુ પણ જોખમી સપાટીએ વહે રહી છે. વહીવટી તંત્રે લોકોને નદી કિનારાથી દૂર રહેવા અને બિનજરૂરી અવરજવર ટાળવાની અપીલ કરી છે.
13,000થી વધુ લોકો રાહત કેમ્પમાં
પૂરની અસરગ્રસ્ત વિસ્તારોમાંથી હજારો લોકોને સુરક્ષિત સ્થળોએ ખસેડવામાં આવ્યા છે. હાલમાં 54 રાહત કેમ્પોમાં આશરે 13,000 લોકો આશ્રય લઈ રહ્યા છે. ઉપરાંત 26 રાહત વિતરણ કેન્દ્રો દ્વારા 5,384 લોકોને ખોરાક અને અન્ય જરૂરી સામગ્રી પહોંચાડવામાં આવી રહી છે. રાષ્ટ્રીય આપત્તિ પ્રતિસાદ દળ (NDRF) અને રાજ્ય આપત્તિ પ્રતિસાદ દળ (SDRF) સહિત વિવિધ એજન્સીઓ બચાવ અને રાહત કામગીરીમાં સતત જોડાયેલી છે.
સરકારે રાહત માટે લીધા મહત્વના નિર્ણયો
મુખ્યમંત્રી હિમંત બિસ્વા સરમાની અધ્યક્ષતામાં રાજ્ય કેબિનેટની બેઠકમાં પૂરગ્રસ્તોને ઝડપથી આર્થિક રાહત પહોંચાડવા માટે અનેક નિર્ણયો લેવામાં આવ્યા છે. વાહન, પશુધન અને મિલકતને થયેલા નુકસાનના વીમા દાવાઓ ઝડપથી મંજૂર થાય તે માટે 5 ઓગસ્ટે ખાનગી અને સરકારી વીમા કંપનીઓ સાથે બેઠક યોજાશે. સરકાર નોન-બેન્કિંગ ફાઇનાન્સ કંપનીઓ (NBFC) સાથે પણ ચર્ચા કરશે, જેથી શિવસાગર, ચરાઈદેઓ, જોરહાટ અને ગોલાઘાટ જિલ્લાના અસરગ્રસ્ત લોનધારકોને હપ્તા ભરવામાં રાહત મળી શકે.
લોન પર 6 મહિનાની મુદત વધારો
સ્ટેટ લેવલ બેન્કર્સ કમિટીની વિશેષ બેઠકમાં પૂરગ્રસ્ત વિસ્તારોના તમામ લોનધારકોને 6 મહિનાનો મોરેટોરિયમ આપવાનો નિર્ણય લેવામાં આવ્યો છે. આ સમયગાળા દરમિયાન લોનની ચુકવણીમાં રાહત મળશે, જેનાથી અસરગ્રસ્ત પરિવારોને આર્થિક સહારો મળશે.
સૂર્ય ઘર યોજના હેઠળ પણ સહાય
મુખ્યમંત્રી હિમંત બિસ્વા સરમાએ જણાવ્યું કે પ્રધાનમંત્રી સૂર્ય ઘર યોજના હેઠળ રૂ. 41.67 કરોડની સહાય મંજૂર કરવામાં આવી છે. આ સહાયથી 9,289 પરિવારોને લાભ મળશે. રાજ્યના વીજ વિભાગને મંગળવાર સુધીમાં તમામ મંજૂર રકમ સીધી લાભાર્થીઓના બેંક ખાતામાં જમા કરાવવાની સૂચના આપવામાં આવી છે.
