બારડોલી : બારડોલી (Bardoli) સહિત જિલ્લામાં ફરી એક વખત કમોસમી વરસાદ (Rain) વરસતા ખેડૂતોની (Farmers) હાલત પડતાં પર પાટુ સમાન થઈ ગઈ છે. બુધવારે આખો દિવસ વરસાદી ઝાપટાં ચાલુ રહેતા શેરડી કાપણી અટકાવી દેવામાં આવી હતી એટલું જ નહિ શેરડી કાપતા મજૂરોની હાલત વરસાદને કારણે દયનીય થઈ ગઈ હતી.
ગત 19થી 21 દરમ્યાન સુરત જિલ્લામાં વરસાદે ખેડૂતોની ઊંઘ હરામ કર્યા બાદ જેમ તેમ ખેતીના કામો શરૂ કર્યા હતા ત્યાં ફરી એક વખત કમોસમી વરસાદે ખેડૂતોની ચિંતામાં વધારો કરી દીધો છે. હવામાન વિભાગ દ્વારા સુરત જિલ્લામાં 30 નવેમ્બર થી 3 ડિસેમ્બર સુધી મધ્યમથી ભારે વરસાદની આગાહી કરવામાં આવી હતી. જે મુજબ આજે વરસાદ વરસ્યો હતો. હજી 2 ડિસેમ્બરના રોજ ભારે વરસાદ પડે તેવી આગાહી હવામાન વિભાગ દ્વારા કરવામાં આવી છે. બુધવારે આખો દિવસ વરસાદી ઝાપટાં ચાલુ રહ્યા હતા. જેને કારણે શાકભાજીના પાકને નુકસાન થયું હતું. આ ઉપરાંત શેરડી રોપણી અને કાપણીની કામગીરી પણ વરસાદને કારણે અટકી પડી છે. બીજી તરફ ડિસેમ્બર માસ શરૂ થયો હોય અનેક વિસ્તારોમાં આંબા પર મોર આવવાની પણ શરૂઆત થઈ ગઈ છે. ત્યારે મોર આવવાના સમયે જ કમોસમી વરસાદ વિલન બનતા કેરી પકવતા ખેડૂતોની ચિંતામાં વધારો થયો છે. શેરડી કાપણી માટે પડાવમાં રહેતા મજૂરોની હાલત વરસાદને કારણે કફોડી થઈ ગઈ છે. તેઓ તાડપત્રીના તંબુમાં પરિવાર સાથે રહેતા હોય સતત વરસાદને કારણે સુરક્ષિત જગ્યા શોધવાની ફરજ પડી હતી. વરસાદી વાતાવરણને કારણે તાપમાનમાં ઘટાડો થતાં ઠંડકનો અનુભવ થયો હતો. આવતીકાલે તાપમાનમાં ન્યૂનતમ તાપમાન 12 ડિગ્રી સુધી જવાની સંભાવનાને લઈ બારડોલીમાં ઠંડી વધી શકે છે.
જિલ્લા વહીવટી તંત્ર દ્વારા જાહેર કરવામાં આવેલા આંકડા મુજબ બારડોલી તાલુકામાં સવારે 6 થી સાંજે 4 વાગ્યા સુધી 10 મીમી, ચોર્યાસીમાં 7મીમી, કામરેજમાં 18મીમી, મહુવામાં 6 મીમી, માંડવીમાં 2 મીમી, માંગરોળમાં 10 મીમી, ઓલપાડમાં 4 મીમી, પલસાણામાં 7 મીમી અને ઉમરપાડામાં 26 મીમી વરસાદ નોંધાયો હતો.
