અમદાવાદના ચાંદખેડા વિસ્તારમાં બે નાની બાળકીઓના શંકાસ્પદ મોતનો કેસ હજુ સુધી સ્પષ્ટ રીતે ઉકેલાયો નથી. શરૂઆતમાં આ ઘટના ખીરું ખાધા બાદ બની હોવાનું કહેવામાં આવ્યું હતું, પરંતુ હવે તપાસ આગળ વધતાં કેસ વધુ ગૂંચવણભર્યો બનતો જઈ રહ્યો છે. આ ગુંચવાડાને ઉકેલવા ફોરેન્સિક સાયન્સ લેબ (FSL) નો રિપોર્ટ તૈયાર થઈ ગયો છે. પરંતુ આ રિપોર્ટ હજુ જાહેર કરવામાં આવ્યો નથી. પોલીસના જણાવ્યા પ્રમાણે, પોસ્ટમોર્ટમ દરમિયાન લીધેલા વિસેરા સેમ્પલનો રિપોર્ટ પેનલ ડોક્ટરોને મોકલવામાં આવ્યો છે. હવે ડોક્ટરો આ રિપોર્ટના આધારે ફાઇનલ કોઝ ઓફ ડેથ એટલે કે મોતનું સાચું કારણ નક્કી કરશે. પોલીસ અધિકારીએ જણાવ્યું કે, ડોક્ટરોની અંતિમ રિપોર્ટ આવ્યા વગર કોઈપણ નિષ્કર્ષ પર પહોંચવું શક્ય નથી. આ રિપોર્ટ સોમવાર અથવા મંગળવાર સુધીમાં આવવાની શક્યતા છે.
આ કેસમાં એક નવી ગૂંચવણ ત્યારે ઊભી થઈ જ્યારે મૃતક બાળકીઓના માતા-પિતાના નિવેદનમાં ફેરફાર જોવા મળ્યો. પહેલા તેઓએ કહ્યું હતું કે બાળકીઓએ ખીરું ખાધું હતું, જેના કારણે તબિયત બગડી. પરંતુ હવે તેઓ ખીચડી અને ચોકલેટ ખાધી હોવાની વાત કરી રહ્યા છે. આ બદલાતા નિવેદનોને કારણે પોલીસ માટે સાચી હકીકત સુધી પહોંચવું વધુ મુશ્કેલ બની ગયું છે. ક્રાઈમ બ્રાન્ચ દ્વારા માતા-પિતાની લગભગ બે કલાક સુધી પૂછપરછ કરવામાં આવી હતી.
તપાસ દરમિયાન પોલીસને એક ડાયરી પણ મળી આવી છે, જેમાં પુત્ર પ્રાપ્તિ અંગે લખાણ નોંધાયેલું હતું. આ મુદ્દે માતા ભાવનાબેને જણાવ્યું કે, તેમની પહેલેથી એક દીકરી હતી અને બીજી સંતાન તરીકે દીકરો થાય એવી સામાન્ય ઈચ્છા હતી. તેમણે સ્પષ્ટ કર્યું કે આ માત્ર સામાન્ય વિચાર હતો અને તેને કોઈ અંધશ્રદ્ધા કે શંકાસ્પદ બાબત સાથે જોડવું યોગ્ય નથી. પોલીસએ પણ હાલ આ મુદ્દાને ગંભીર શંકા તરીકે લીધેલ નથી. હાલમાં સમગ્ર કેસ ડોક્ટરોના અંતિમ અભિપ્રાય પર નિર્ભર છે. રિપોર્ટ આવ્યા પછી જ સ્પષ્ટ થશે કે આ એક દુર્ઘટના છે, બેદરકારીનું પરિણામ છે કે પછી કોઈ ગુનાહિત પ્રવૃત્તિ છે. ત્યાં સુધી આ ઘટના અનેક પ્રશ્નો ઉભા કરી રહી છે અને સત્ય બહાર આવવાની રાહ જોવામાં આવી રહી છે.
