અમદાવાદના વાસણા વિસ્તારમાં રહેતા 71 વર્ષીય નિવૃત્ત ફાર્માસ્યુટિકલ સલાહકાર સાયબર ઠગાઈનો ભોગ બન્યા છે. શેરબજાર અને IPOમાં રોકાણ કરીને ઊંચું વળતર અપાવવાની લાલચ આપી અજાણ્યા સાયબર ગઠિયાઓએ તેમની પાસેથી કુલ 1.21 કરોડની છેતરપિંડી આચરી હોવાનું સામે આવ્યું છે. સમગ્ર મામલે પીડિતે સાયબર ક્રાઇમ પોલીસમાં ફરિયાદ નોંધાવતા તપાસ શરૂ કરવામાં આવી છે. મળતી માહિતી મુજબ, ઘટનાની શરૂઆત 19 માર્ચે થઈ હતી. નિવૃત્ત સલાહકારને એક અજાણી યુવતી તરફથી વોટ્સએપ પર મેસેજ આવ્યો હતો. યુવતીએ પોતાની ઓળખ જાણીતી ફાઇનાન્શિયલ સર્વિસ કંપની IIFLના પ્રતિનિધિ તરીકે આપી હતી. શરૂઆતમાં શેરબજાર અંગે માર્ગદર્શન અને રોકાણની તક વિશે વાતચીત કરવામાં આવી હતી. ત્યારબાદ વૃદ્ધને શેરબજારની ટિપ્સ અને રોકાણ અંગે ચર્ચા થતી એક વોટ્સએપ ગ્રુપમાં સામેલ કરવામાં આવ્યા હતા.
આ ગ્રુપમાં સતત એવા મેસેજ અને સ્ક્રીનશોટ શેર કરવામાં આવતા હતા જેમાં અન્ય રોકાણકારોએ શેરબજાર અને IPOમાં રોકાણ કરીને લાખો રૂપિયાનો નફો કમાયો હોવાનું દર્શાવવામાં આવતું હતું. આ તમામ સ્ક્રીનશોટ અને માહિતી સંપૂર્ણપણે બનાવટી હોવાનું બાદમાં સામે આવ્યું છે. જોકે શરૂઆતમાં આ માહિતી જોઈને વૃદ્ધને ગઠિયાઓ પર વિશ્વાસ બેસી ગયો હતો. વિશ્વાસ જીત્યા બાદ ઠગોએ તેમને એક ખાસ મોબાઇલ એપ્લિકેશન ડાઉનલોડ કરવાનું કહ્યું હતું. આ એપ્લિકેશન શેરબજારમાં રોકાણ માટેની સત્તાવાર ટ્રેડિંગ એપ હોવાનું જણાવાયું હતું. પીડિતે પણ તેને સાચી માનીને પોતાના મોબાઇલમાં ઇન્સ્ટોલ કરી હતી. ત્યારબાદ એપ્લિકેશન મારફતે વિવિધ IPO અને શેરોમાં રોકાણ કરવાનું શરૂ કર્યું હતું.
છેલ્લા ત્રણ મહિનાના સમયગાળા દરમિયાન વૃદ્ધે અનેક હપ્તામાં કુલ 1.21 કરોડ જેટલી મોટી રકમ અલગ-અલગ ખાતાઓમાં ટ્રાન્સફર કરી હતી. એપ્લિકેશનમાં તેમના રોકાણ પર સારો નફો દેખાડવામાં આવતો હતો, જેના કારણે તેમને કોઈ શંકા આવી નહોતી. પરંતુ જ્યારે તેમણે રોકાણ કરેલી રકમ અને મળેલો નફો ઉપાડવાનો પ્રયાસ કર્યો ત્યારે સમસ્યાઓ શરૂ થઈ હતી. ગઠિયાઓએ પહેલા વિવિધ બહાનાં બતાવ્યાં અને બાદમાં વધુ ચાર્જ તથા ટેક્સ ભરવાની માંગણી શરૂ કરી હતી. જ્યારે વૃદ્ધે નાણાં ઉપાડવા માટે સતત પ્રયાસ કર્યા છતાં કોઈ રકમ પરત મળી નહોતી, ત્યારે તેમને પોતાની સાથે છેતરપિંડી થઈ હોવાનો અહેસાસ થયો હતો.
આખરે પીડિતે સમગ્ર ઘટનાની જાણ સાયબર ક્રાઇમ વિભાગને કરી હતી. ફરિયાદના આધારે પોલીસે ગુનો નોંધી વધુ તપાસ શરૂ કરી છે. પોલીસ હવે વોટ્સએપ નંબર, બેંક એકાઉન્ટ્સ, ટ્રાન્ઝેક્શનની વિગતો અને ઉપયોગમાં લેવાયેલી શંકાસ્પદ એપ્લિકેશનની માહિતીના આધારે આરોપીઓ સુધી પહોંચવાનો પ્રયાસ કરી રહી છે. સાયબર ક્રાઇમ નિષ્ણાતો લોકો માટે ચેતવણી આપતા કહે છે કે અજાણ્યા વોટ્સએપ ગ્રુપ, ઊંચા નફાના વચનો, બોગસ સ્ક્રીનશોટ અને અનધિકૃત એપ્લિકેશનો દ્વારા થતી રોકાણ સંબંધિત ઠગાઈઓમાં સતત વધારો થઈ રહ્યો છે. કોઈપણ રોકાણ કરતા પહેલાં કંપનીની સત્તાવાર વેબસાઇટ, SEBI રજિસ્ટ્રેશન અને એપ્લિકેશનની વિશ્વસનીયતા ચકાસવી જરૂરી છે.
