દિલ્હીમાં સિઝનનો અત્યાર સુધીનો સૌથી ઠંડો દિવસ
‘અકવાન’ વાવાઝોડાની અસરથી દક્ષિણ, પૂર્વ અને મધ્ય ભારતનાં આઠ રાજ્યોમાં વરસાદી કે ભેજવાળું વાતાવરણ, રાજસ્થાનમાં પણ ઠંડીનો ચમકારો
દેશના હવામાનમાં અત્યારે બેવડો અને અત્યંત તીવ્ર ફેરફાર જોવા મળી રહ્યો છે. એક તરફ ઉત્તર ભારતનાં પહાડી રાજ્યોમાં બર્ફીલા પવનો અને તાપમાન શૂન્યથી નીચે જવાને કારણે કડકડતી ઠંડી શરૂ થઈ ગઈ છે, તો બીજી તરફ બંગાળની ખાડીમાંથી ઉદ્ભવેલા ચક્રવાતી તોફાન ‘અકવાન’એ દેશના પૂર્વી, મધ્ય અને દક્ષિણી ભાગનાં આઠ રાજ્યોમાં જનજીવનને પ્રભાવિત કર્યું છે. જમ્મુ-કાશ્મીરના શોપિયાંમાં લઘુત્તમ તાપમાન માઈનસ 3.4 ડિગ્રી સેલ્સિયસ નોંધાયું છે, જેની સીધી અસર રાજધાની દિલ્હી અને મેદાની વિસ્તારોની ઠંડી પર પડી છે. બીજી બાજુ, ચક્રવાત ‘અકવાન’ આજે સવારે ઉત્તર આંધ્ર પ્રદેશ અને દક્ષિણ ઓડિશાના દરિયાકાંઠે ટકરાયું હતું.
જમ્મુ-કાશ્મીર અને હિમાચલ પ્રદેશના ઊંચાઈવાળા વિસ્તારોમાં થઈ રહેલી હિમવર્ષા અને સૂકા ઉત્તર-પશ્ચિમી પવનોએ સમગ્ર ખીણને ઠંડીની લપેટમાં લઈ લીધી છે. ભારતીય હવામાન વિભાગ (IMD)ના આંકડા મુજબ, ગુરુવારે દક્ષિણ કાશ્મીરનું શોપિયાં સૌથી ઠંડું સ્થળ રહ્યું હતું, જ્યાં લઘુત્તમ તાપમાન -3.4 ડિગ્રી સેલ્સિયસ સુધી ગગડી ગયું હતું. પ્રસિદ્ધ પર્યટન સ્થળ પહલગામ અને ગુલમર્ગમાં પણ પારો શૂન્યથી નીચે નોંધાયો છે. ઉનાળુ રાજધાની શ્રીનગરમાં પણ તાપમાન ઘટીને -0.2 ડિગ્રી સેલ્સિયસ સુધી પહોંચી ગયું છે, જેના કારણે સવારના સમયે જળાશયોના કિનારે બરફનું પાતળું પડ જામવા લાગ્યું છે. પહાડો પરથી આવી રહેલા બર્ફીલા પવનોએ રાષ્ટ્રીય રાજધાની દિલ્હી સહિત પંજાબ, હરિયાણા, ઉત્તર પ્રદેશ અને બિહારના મેદાની વિસ્તારોમાં ઠંડી વધારી દીધી છે. દિલ્હીમાં સિઝનનો અત્યાર સુધીનો સૌથી ઠંડો દિવસ નોંધાયો હતો, જેમાં તાપમાન 10.5 ડિગ્રી સેલ્સિયસ સુધી પહોંચી ગયું હતું. રાજસ્થાનમાં પણ સવારે અને સાંજે ઠંડીનો ચમકારો અનુભવાઈ રહ્યો છે.
દરમિયાન, બંગાળની ખાડીના પશ્ચિમ-મધ્ય ભાગમાં બનેલું ગંભીર ચક્રવાતી તોફાન ‘અકવાન’ 20 નવેમ્બરની સવારે નબળું પડીને ચક્રવાતી તોફાનના સ્વરૂપમાં ઉત્તર આંધ્ર પ્રદેશ અને દક્ષિણ ઓડિશાના દરિયાકાંઠે ટકરાયું હતું. આ તોફાન અને તેની સાથે સક્રિય ભેજવાળા પવનોની સીધી અસર દેશનાં આઠ રાજ્યો, ઓડિશા, આંધ્ર પ્રદેશ, પશ્ચિમ બંગાળ, ઝારખંડ, બિહાર, છત્તીસગઢ, મધ્ય પ્રદેશ અને તેલંગાણા તથા મહારાષ્ટ્રના વિદર્ભ વિસ્તારમાં પડી રહી છે.