ગાંધીનગર,
રાજયમાં સ્થાનિક સ્વરાજયની ચૂંટણીમાં ભાજપના વિજય બાદ સીએમ ભૂપેન્દ્ર પટેલના અધ્યક્ષસ્થાને આજે ગાંધીનગર ખાતે રાજ્ય મંત્રી મંડળની મહત્વની બેઠક યોજાઈ હતી. આ બેઠકમાં સ્થાનિક સ્વરાજ્યની ચૂંટણીમાં ભાજપના ઐતિહાસિક વિજય બદલ જનતાનો આભાર માનતો પ્રસ્તાવ પસાર કરવાની સાથે પ્રજાલક્ષી અનેક નિર્ણયો લેવામાં આવ્યા હતા. કેબીનેટ પ્રવક્તા મંત્રી જીતુ વાઘાણીએ કેબીનેટ બેઠક બાદ પત્રકાર પરિષદમાં આ અંગેની વિસ્તૃત વિગતો આપી હતી.
ઐતિહાસિક વિજય બદલ જનતાનો ‘અભિનંદન પ્રસ્તાવ’
તાજેતરની ચૂંટણીઓમાં ભાજપના ભવ્ય વિજય બાદ મંત્રી મંડળે ગુજરાતની સાડા છ કરોડ જનતાનો હૃદયપૂર્વક આભાર માન્યો હતો. મંત્રીમંડળે પસાર કરેલા પ્રસ્તાવમાં નોંધ્યું હતું કે,
- આ જીત પ્રધાનમંત્રી નરેન્દ્ર મોદીની વિકાસની રાજનીતિ અને મુખ્યમંત્રી ભૂપેન્દ્ર પટેલના સબળ નેતૃત્વ પર જનતાએ મૂકેલી અવિરત વિશ્વાસની મહોર છે.
- આયુષ્માન ભારત, આવાસ યોજના અને જ્યોતિગ્રામ જેવી કલ્યાણકારી યોજનાઓ છેવાડાના માનવી સુધી પહોંચાડવાની સરકારની કટિબદ્ધતાને જનતાએ સ્વીકારી છે.
‘સુશાસનનો મંત્ર’: પ્રજાના પ્રશ્નો માટે એક્શન પ્લાન
ચૂંટણી પ્રક્રિયા દરમિયાન લોકસંપર્ક દ્વારા જે સ્થાનિક પ્રશ્નો અને ફરિયાદો ધ્યાને આવી છે, તેના ત્વરિત નિવારણ માટે મુખ્યમંત્રીશ્રીએ વહીવટી તંત્રને કડક આદેશો આપ્યા છે. - ફરિયાદોનું લિસ્ટ: ગ્રામ્યથી રાજ્ય સ્તર સુધીની તમામ ફરિયાદોનું લિસ્ટ બનાવી ત્વરિત નિકાલ માટે મુખ્ય સચિવશ્રીને સૂચના અપાઈ છે.
- સેવા એ જ સાધન: સત્તાને જનતાની સેવા કરવાનું સાધન ગણીને વિજયના ઉત્સાહને લોકસેવામાં પરિવર્તિત કરવા મંત્રીઓને આહ્વાન કર્યું છે.
ડિજિટલ ગુજરાત: ‘Top-20’ સેવાઓ હવે પેપરલેસ
પ્રજાજનોને સરકારી કચેરીઓના ધક્કા ન ખાવા પડે તે માટે ‘ડિજિટલ ગુજરાત’ પોર્ટલ પર સૌથી વધુ વપરાતી ૨૦ સેવાઓ હવે ઉપલબ્ધ કરાવી દેવાઈ છે. - આધાર પ્રમાણીકરણ: આવકનો દાખલો, ક્રીમીલેયર સર્ટિફિકેટ અને રેશનકાર્ડ જેવી સેવાઓ માટે હવે આધાર પ્રમાણીકરણ (OTP અથવા બાયોમેટ્રિક) ફરજિયાત રહેશે.
- પેપરલેસ વહીવટ: એકવાર આધાર પ્રમાણીકરણ થયા બાદ ઓળખ કે રહેઠાણના અન્ય પુરાવા આપવાની જરૂર રહેશે નહીં.
- ડેટા સુરક્ષા: સુરક્ષા માટે પોર્ટલ પર માત્ર Masked Aadhaar (છેલ્લા ૪ આંકડા) જ દેખાશે, સંપૂર્ણ નંબર નહીં.
સુરતમાં વાઇબ્રન્ટ ગુજરાત રિજનલ કોન્ફરન્સ (VGRC)
આગામી ૧ અને ૨ મે દરમિયાન સુરતમાં યોજાનારી VGRC અંગે પણ કેબિનેટમાં સમીક્ષા કરવામાં આવી હતી. - આ કોન્ફરન્સ દ્વારા દક્ષિણ અને મધ્ય ગુજરાતના ૧૬ જિલ્લાઓની ઔદ્યોગિક ક્ષમતાને વૈશ્વિક ફલક પર પહોંચાડવામાં આવશે.
- ટેક્સટાઇલ, જેમ્સ-જ્વેલરી અને ગ્રીન એનર્જી જેવા ક્ષેત્રો પર વિશેષ ધ્યાન આપીને સીધા વિદેશી રોકાણો આકર્ષવાનો રોડમેપ તૈયાર કરવામાં આવ્યો છે.
