વડોદરા : વડોદરા શહેરના લહેરીપુરા ન્યુ રોડ ઉપર સુલતાનપુરાની સામે આવેલી વર્ષોજૂની રેશ્મા ટ્રેડર્સ નામની દુકાનમાં વહેલી સવારે આગ લાગતા અફરાતફરી મચી ગઇ હતી. બનાવની જાણ થતાં જ ઘટનાસ્થળે દોડી આવેલા ફાયર બ્રિગેડના જવાનોએ આગ ઉપર કાબુ મેળવ્યો હતો. સદનસીબે જાનહાની થતાં અટકી હતી. વડોદરા શહેરના લહેરીપુરા ન્યુ રોડ ઉપર સુલતાનપુરાની સામે મહંમદ હુસેન ભાઈ અબ્દુલ રહીમ ભાઈ ગાડીવાળા રેશ્મા ટ્રેડર્સ નામની દુકાન ધરાવે છે. ગુરૂવારના રોજ રાબેતા મુજબ તેઓ પોતાની દુકાન બંધ કરીને ઘરે ગયા હતા.
દરમિયાન શુક્રવારે વહેલી સવારે એકા એક દુકાનમાંથી ધુમાડાના ગોટેગોટા નીકળતા વિસ્તારના લોકોમાં ભારે ફફડાટ ફેલાયો હતો. આગ લાગી હોવાની જાણ થતાં તુરંત જ દુકાનના માલિક મહંમદ હુસેન ભાઈ અબ્દુલ રહીમ ભાઈ ગાડીવાળા તેમના ભાઈ સાદીકભાઈ સ્થળ પર દોડી આવ્યા હતા. જ્યારે ફાયર બ્રિગેડને બનાવ અંગેની જાણ કરવામાં આવતા ફાયર ફાઈટર સાથે લશ્કરની ટુકડી ઘટનાસ્થળે દોડી આવી હતી અને પાણીનો મારો ચલાવી ફાયર બ્રિગેડના લાશ્કરોએ આગ ઉપર કાબુ મેળવ્યો હતો. જો કે દુકાનમાં રહેલા હાર્ડવેરના માલસામાનને નુકસાન થયું હતું.જેમાં પીવીસી,રબ્બરની પાઈપો સહિતનો સામાન બળી ગયો હતો.
