વિપક્ષી ગઠબંધન I.N.D.I.A (ઇન્ડિયન નેશનલ ડેવલપમેન્ટલ ઇન્ક્લૂસિવ એલાયન્સ) ફરી એકવાર સક્રિય બનતું જોવા મળી રહ્યું છે. મળતી માહિતી મુજબ, 8 જૂને નવી દિલ્હીમાં ગઠબંધનના વરિષ્ઠ નેતાઓની મહત્વપૂર્ણ બેઠક યોજાઈ શકે છે. આ બેઠકમાં દેશના વિવિધ રાજ્યોના લગભગ 15 રાજકીય પક્ષોના નેતાઓ હાજરી આપે તેવી શક્યતા વ્યક્ત કરવામાં આવી રહી છે. ભાજપના નેતૃત્વવાળી એનડીએ સરકાર સામે સંયુક્ત વ્યૂહરચના ઘડવા અને વિપક્ષી એકતાને વધુ મજબૂત બનાવવા આ બેઠકને મહત્વપૂર્ણ માનવામાં આવી રહી છે. સૂત્રોના જણાવ્યા અનુસાર, કોંગ્રેસના વરિષ્ઠ નેતા અને લોકસભામાં વિપક્ષના નેતા રાહુલ ગાંધી, તૃણમૂલ કોંગ્રેસના નેતા અને પશ્ચિમ બંગાળના પૂર્વ મુખ્યમંત્રી મમતા બેનરજી, સમાજવાદી પાર્ટીના અધ્યક્ષ અખિલેશ યાદવ તેમ જ શિવસેના (ઉદ્ધવ બાલાસાહેબ ઠાકરે)ના પ્રમુખ ઉદ્ધવ ઠાકરે બેઠકમાં સામેલ થઈ શકે છે. આ ઉપરાંત ગઠબંધનના અન્ય સહયોગી પક્ષોના નેતાઓ પણ બેઠકમાં ભાગ લે તેવી શક્યતા છે. રાજકીય નિરીક્ષકોના મતે, તાજેતરમાં વિવિધ રાજ્યોમાં યોજાયેલી વિધાનસભા ચૂંટણીઓ બાદ બદલાયેલા રાજકીય સમીકરણો પર આ બેઠકમાં ખાસ ચર્ચા થઈ શકે છે. ઘણા રાજ્યોમાં વિપક્ષી પક્ષોને મળેલા પરિણામો અને આગામી ચૂંટણી માટેની તૈયારીઓને ધ્યાનમાં રાખીને ગઠબંધનની ભાવિ દિશા નક્કી કરવાનો પ્રયાસ કરવામાં આવશે.
રિપોર્ટ્સ અનુસાર, તામિલનાડુમાં કોંગ્રેસ દ્વારા વિજયની પાર્ટી TVKને સમર્થન આપવામાં આવ્યા બાદ DMK અને કોંગ્રેસ વચ્ચેના સંબંધોમાં થોડું અંતર આવ્યું હોવાનું માનવામાં આવે છે. આ કારણસર DMK આ બેઠકમાં સામેલ થશે કે નહીં તે અંગે હજુ અનિશ્ચિતતા છે. જોકે, ગઠબંધનના કેટલાક નેતાઓ TVKને INDIA બ્લોક સાથે જોડવાના પ્રયાસો કરી રહ્યા હોવાનું પણ જાણવા મળે છે. બીજી તરફ, આમ આદમી પાર્ટી (AAP) પહેલાથી જ INDIA ગઠબંધનથી પોતાને અલગ કરી ચૂકી છે. દિલ્હી અને અન્ય રાજ્યોમાં કોંગ્રેસ સાથેના મતભેદોને કારણે AAPએ જાહેરમાં ગઠબંધનથી અંતર બનાવ્યું હતું. તેથી આ બેઠકમાં AAPના કોઈ પ્રતિનિધિ હાજર રહે તેવી શક્યતા નથી.
બેઠક દરમિયાન પશ્ચિમ બંગાળની રાજકીય સ્થિતિ પણ ચર્ચાનો મહત્વપૂર્ણ મુદ્દો બની શકે છે. એવી અપેક્ષા છે કે મમતા બેનરજી તાજેતરમાં TMC નેતાઓ અને કાર્યકરો પર થયેલા કથિત હુમલાઓનો મુદ્દો ઉઠાવી શકે છે. તેઓ આ મામલે INDIA બ્લોકના અન્ય પક્ષોનું સમર્થન મેળવવાનો પ્રયાસ કરી શકે છે. બંગાળમાં તાજેતરમાં થયેલા રાજકીય તણાવ અને બદલાતા સમીકરણો પણ ચર્ચાનો ભાગ બની શકે છે. લોકસભા ચૂંટણીમાં INDIA બ્લોકના પ્રદર્શન પર નજર કરીએ તો ગઠબંધને કુલ 234 બેઠકો જીતી હતી. તેમાં કોંગ્રેસે 99 બેઠકો, સમાજવાદી પાર્ટીએ 37 બેઠકો અને તૃણમૂલ કોંગ્રેસે 29 બેઠકો મેળવી હતી. જોકે, સરકાર બનાવવા માટે જરૂરી 272 બેઠકોના બહુમતી આંકડાથી ગઠબંધન પાછળ રહી ગયું હતું. તેમ છતાં, વિપક્ષ તરીકે INDIA બ્લોકે લોકસભામાં મજબૂત હાજરી નોંધાવી હતી. મહારાષ્ટ્રમાં પણ INDIA ગઠબંધન હેઠળ મહાવિકાસ અઘાડી (MVA)એ ચૂંટણી લડી હતી. જોકે, ત્યાં ગઠબંધનને અપેક્ષિત સફળતા મળી નહોતી અને ભાજપના નેતૃત્વવાળા ગઠબંધને મોટી જીત મેળવી હતી. આ અનુભવને ધ્યાનમાં રાખીને વિપક્ષી પક્ષો આગામી રાજકીય પડકારો માટે વધુ સુમેળભરી વ્યૂહરચના ઘડવાનો પ્રયાસ કરી રહ્યા છે.
ઉલ્લેખનીય છે કે સપ્ટેમ્બર 2025માં રાહુલ ગાંધીએ તેમના સરકારી નિવાસસ્થાને INDIA બ્લોકના નેતાઓ માટે ડિનર મીટિંગનું આયોજન કર્યું હતું. તે બેઠકમાં પણ ગઠબંધનની એકતા અને ભવિષ્યની રાજકીય વ્યૂહરચના અંગે ચર્ચા થઈ હતી. કોંગ્રેસ નેતા કે.સી. વેણુગોપાલે તે બેઠકને સફળ ગણાવી હતી. હવે 8 જૂનની સંભવિત બેઠકને 2026 પછીના રાજકીય પરિપ્રેક્ષ્યમાં INDIA બ્લોક માટે મહત્વપૂર્ણ માનવામાં આવી રહી છે. આ બેઠકથી વિપક્ષી પક્ષો વચ્ચે કેટલો સુમેળ સર્જાય છે અને ભાજપ સામે કેવી નવી વ્યૂહરચના ઘડાય છે, તેના પર દેશના રાજકીય વર્તુળોની નજર રહેશે.
