ગાંધીનગર,તા.30
રાજ્યના શહેરી વિસ્તારોમાં જાહેર પરિવહન વ્યવસ્થાને વધુ આધુનિક અને સુદ્રઢ બનાવવાના હેતુથી સીએમ શ્રી ભૂપેન્દ્ર પટેલના માર્ગદર્શન હેઠળ એક મહત્વનો નિર્ણય લેવામાં આવ્યો છે. ‘મુખ્યમંત્રી શહેરી બસ સેવા યોજના’ અંતર્ગત રાજ્યના ત્રણ મહત્વના શહેરો—નવસારી, વાપી અને પાલનપુર—માટે કુલ ૧૭ નવા બસ રૂટને નાયબ મુખ્યમંત્રી હર્ષ સંઘવી દ્વારા મંજૂરી આપવામાં આવી છે.
શહેર મુજબ નવા રૂટની ફાળવણી
રાજય સરકાર દ્વારા લેવામાં આવેલા આ નિર્ણય મુજબ ત્રણેય શહેરોમાં નીચે મુજબ નવા રૂટ શરૂ કરવામાં આવશે.
નવસારી મહાનગરપાલિકા: શહેરના વિવિધ વિસ્તારોને સાંકળતા કુલ ૦૭ નવા રૂટ શરૂ થશે, જેનાથી સ્થાનિકોને સસ્તી અને સરળ મુસાફરી મળશે.
વાપી મહાનગરપાલિકા: ઔદ્યોગિક હબ ગણાતા વાપીમાં શ્રમિકો અને નોકરિયાત વર્ગની સુવિધા માટે ૦૪ નવા રૂટ મંજૂર કરાયા છે.
પાલનપુર નગરપાલિકા: બનાસકાંઠાના મુખ્ય મથક પાલનપુરમાં વિદ્યાર્થીઓ અને સામાન્ય જનતા માટે કુલ ૦૬ નવા રૂટને લીલી ઝંડી આપવામાં આવી છે.
સામાન્ય નાગરિકોને થશે મોટો ફાયદો
આ નિર્ણય અંગે માહિતી આપતા નાયબ મુખ્યમંત્રી હર્ષ સંઘવીએ જણાવ્યું હતું કે, “અંતરિયાળ વિસ્તારો સુધી બસ કનેક્ટિવિટી પહોંચવાથી સામાન્ય નાગરિકોના સમય અને નાણાં બંનેની બચત થશે. આ આયોજનબદ્ધ નિર્ણયથી શહેરોમાં ટ્રાફિકનું ભારણ ઘટશે અને ખાનગી વાહનો પરની નિર્ભરતા ઓછી થતા પર્યાવરણને પણ લાભ થશે.”
મુખ્ય ઉદ્દેશ્ય અને સુવિધા
આ યોજનાનો મુખ્ય ઉદ્દેશ્ય નાગરિકોની રોજિંદી મુસાફરીને સુવિધાયુક્ત અને સમયબદ્ધ બનાવવાનો છે. રાજ્ય સરકાર આધુનિક બસો દ્વારા સુરક્ષિત અને સલામત સવારી પૂરી પાડવા માટે કટિબદ્ધ છે. આ નવા રૂટ શરૂ થવાથી શહેરોના સર્વાંગી વિકાસને નવી ગતિ મળશે
