થોડા દિવસ પહેલાં જ પિલર પર મુકાયેલું મહાકાય ગર્ડર અચાનક તૂટી પડ્યું
સદનસીબે મોટી જાનહાનિ ટળી, ઘટનાના કારણોની તપાસ શરૂ
(પ્રતિનિધિ) આણંદ
આણંદ જિલ્લાના અડાસ ગામ નજીક નિર્માણાધીન રેલવે ઓવરબ્રિજના કામ દરમિયાન અચાનક ગર્ડર ધરાશાયી થતાં વિસ્તારમાં ચકચાર મચી ગઈ હતી. ઘટનામાં કોઈ જાનહાનિ થઈ નથી, પરંતુ મહાકાય ગર્ડર નીચે પડી જતાં સ્થાનિકોમાં ભયનો માહોલ સર્જાયો હતો.
મળતી માહિતી મુજબ, અડાસ ગામથી નેશનલ હાઇવેને જોડતા માર્ગ પર રેલવે લાઇન ઉપર ઓવરબ્રિજનું નિર્માણ કાર્ય ચાલી રહ્યું છે. થોડા દિવસ પહેલાં જ બ્રિજના પિલર પર સ્થાપિત કરવામાં આવેલું વિશાળ ગર્ડર અચાનક તૂટી પડતાં સમગ્ર વિસ્તાર ધ્રૂજી ઉઠ્યો હતો. ઘટના સમયે આસપાસ કોઈ કામદારો કે વાહનચાલકો ન હોવાથી મોટી દુર્ઘટના ટળી હોવાનું જણાવવામાં આવી રહ્યું છે.
બનાવની જાણ થતાં સ્થાનિક વહીવટી તંત્ર, પોલીસ તેમજ સંબંધિત વિભાગના અધિકારીઓ ઘટનાસ્થળે દોડી આવ્યા હતા. પ્રાથમિક તપાસમાં ગર્ડર પડવાનું ચોક્કસ કારણ સામે આવ્યું નથી, પરંતુ ટેકનિકલ ખામી કે નિર્માણ પ્રક્રિયામાં બેદરકારી અંગે તપાસ હાથ ધરવામાં આવી છે.
આ ઘટનાને પગલે બ્રિજના નિર્માણ કાર્યની ગુણવત્તા અને સલામતીના ધોરણો અંગે પણ સવાલો ઊભા થયા છે. અધિકારીઓ દ્વારા સમગ્ર ઘટનાની વિગતવાર તપાસ શરૂ કરવામાં આવી છે.
