ગાંધીનગર,તા.31
પીએમ નરેન્દ્ર મોદીના ‘સેમિકન્ડક્ટર મિશન’ને વેગ આપતા સાણંદ ખાતે કેઈન્સ સેમિકોનના અત્યાધુનિક OSAT પ્લાન્ટનો ભવ્ય શુભારંભ થયો છે. આ પ્રસંગે સીએમ ભૂપેન્દ્ર પટેલ અને કેન્દ્રીય મંત્રી અશ્વિની વૈષ્ણવે ગુજરાત અને ભારતની ટેકનોલોજીકલ ક્રાંતિના નવા યુગની જાહેરાત કરી હતી.
સાણંદ-ધોલેરા બનશે ભારતની સિલિકોન વેલી
સીએમ ભૂપેન્દ્ર પટેલે જણાવ્યું હતું કે, વડાપ્રધાન મોદીના નેતૃત્વમાં ગુજરાતે વિકાસની તેજ ગતિ પકડી છે. માઇક્રોન બાદ હવે કેઈન્સ પ્લાન્ટનો પ્રારંભ એ સાણંદ અને ધોલેરાને વિશ્વની ‘સિલિકોન વેલી’ બનાવવાની દિશામાં એક મોટું કદમ છે.
- ઝડપી અમલીકરણ: વર્ષ ૨૦૨૪માં મંજૂરી મળ્યાના ટૂંકા ગાળામાં જ પ્લાન્ટ કાર્યરત થવો એ ગુજરાતની કાર્યક્ષમતાનો પુરાવો છે.
- યુવા શક્તિ પર ભાર: રાજ્ય સરકારે વર્ષ ૨૦૨૬-૨૭ના બજેટમાં ‘નમો ગુજરાત કૌશલ્ય તથા રોજગાર મિશન’ જાહેર કર્યું છે, જે સેમિકન્ડક્ટર અને AI જેવા ક્ષેત્રો માટે કુશળ વર્કફોર્સ તૈયાર કરશે.
- શિક્ષણમાં પરિવર્તન: યુનિવર્સિટીઓમાં એડવાન્સ મટિરિયલ સેન્ટર અને સેમિકન્ડક્ટર અભ્યાસક્રમો શરૂ કરવામાં આવ્યા છે.
૧૪ મહિનામાં પ્રોડક્શન શરૂ – અશ્વિની વૈષ્ણવ
કેન્દ્રીય મંત્રી અશ્વિની વૈષ્ણવે આ પ્રસંગે એક ઐતિહાસિક રેકોર્ડની જાહેરાત કરતા કહ્યું હતું કે, “વડાપ્રધાનના માર્ગદર્શન હેઠળ માત્ર ૧૪ મહિનામાં પ્લાન્ટના ખાતમુહૂર્તથી લઈને કોમર્શિયલ પ્રોડક્શન શરૂ થઈ ગયું છે.”
- વૈશ્વિક લક્ષ્ય: ભારત વર્ષ ૨૦૩૨ સુધીમાં સેમિકન્ડક્ટર ક્ષેત્રે વિશ્વના ટોચના ૬ દેશોમાં અને ૨૦૪૭ સુધીમાં ટોચના ૩ દેશોમાં સ્થાન મેળવશે.
- આગામી રોડમેપ: ૨૦૨૬ના અંત સુધીમાં ગુજરાતમાં ૪ પ્લાન્ટ, ૨૦૨૭માં વધુ ૨ અને ૨૦૨૮માં ધોલેરા ખાતે વિશાળ ‘ફેબ પ્લાન્ટ’ કાર્યરત થશે.
- ડિઝાઇન પાવર: દેશના ૬૦,૦૦૦ એન્જિનિયરોએ તાલીમ મેળવી લીધી છે અને તેઓ હવે 2 nm ની અત્યંત જટિલ ચિપ ડિઝાઇન કરી રહ્યા છે.
ભારતનું આગમન થઈ ચૂક્યું છે – કેઈન્સ CEO
કેઈન્સના CEO કે. રઘુનાથન પણીકરે ભાવુક થતા જણાવ્યું હતું કે, ૩૮ વર્ષ પહેલા જે પ્રતિભાઓ સુવિધાઓના અભાવે વિદેશ જતી હતી, તે આજે સરકારની પ્રોત્સાહક નીતિઓને કારણે ભારતમાં જ સ્ટાર્ટઅપ્સ કરી રહી છે. તેમણે વિશ્વાસપૂર્વક કહ્યું કે, “ભારત હવે ગ્લોબલ ચિપ મેન્યુફેક્ચરિંગના નકશા પર ગૌરવભેર અંકિત થઈ ચૂક્યું છે.”
પ્લાન્ટની ખાસિયતો અને અસર:
- ઉત્પાદન ક્ષમતા: દૈનિક ૬૩ લાખ ચિપ્સનું ઉત્પાદન કરવાની ક્ષમતા ધરાવતી આ અત્યાધુનિક OSAT ફેસિલિટી છે.
- રોજગારી: આ પ્રોજેક્ટથી સ્થાનિક સ્તરે હજારો યુવાનો માટે હાઈ-સ્કિલ્ડ રોજગારીની તકો ઊભી થશે.
- ઈજનેરી કૌશલ્ય: રેકોર્ડબ્રેક સમયમાં નિર્માણ કાર્ય પૂર્ણ કરીને ગુજરાતે વૈશ્વિક રોકાણકારો સામે પોતાની ક્ષમતા સાબિત કરી છે.
