સંસદનું ચોમાસુ સત્ર 20 જુલાઈથી શરૂ થવાની શક્યતા છે અને તે 13 ઓગસ્ટ સુધી ચાલે તેવી ધારણા છે. લગભગ ચાર અઠવાડિયા ચાલનારા આ સત્રમાં કુલ 19 બેઠકો યોજાઈ શકે છે. આ વખતે સંસદનું સત્ર રાજકીય રીતે ખૂબ જ મહત્વપૂર્ણ માનવામાં આવી રહ્યું છે, કારણ કે સરકાર અનેક મોટા બિલ રજૂ કરવાની તૈયારીમાં છે, જ્યારે વિપક્ષ પણ વિવિધ મુદ્દાઓ પર સરકારને ઘેરવાની રણનીતિ બનાવી રહ્યો છે. સત્ર શરૂ થાય તે પહેલાં લોકસભાની બેઠક વ્યવસ્થામાં પણ કેટલાક મહત્વના ફેરફારો થઈ શકે છે. તૃણમૂલ કોંગ્રેસ (TMC)માં થયેલા વિભાજન, શિવસેના (UBT)ના કેટલાક સાંસદોના શિંદે જૂથમાં જોડાવા અને અન્ય રાજકીય ફેરફારોને કારણે લોકસભામાં બેઠકોની નવી ફાળવણી થઈ શકે છે. સૂત્રો મુજબ, લોકસભાના સ્પીકર TMCના બળવાખોર સાંસદોના નવા જૂથમાં વિલીનીકરણ અને શિવસેના (UBT)ના કેટલાક સાંસદોના શિવસેના (શિંદે જૂથ)માં જોડાવા અંગે નિર્ણય આપી શકે છે. ત્યારબાદ તેમની બેઠક વ્યવસ્થા અંગે પણ અંતિમ નિર્ણય લેવામાં આવશે.
સરકાર આ સત્રમાં અનેક મહત્વપૂર્ણ બિલ રજૂ કરવાની તૈયારીમાં છે. NDA પાસે મજબૂત સંખ્યાબળ હોવાથી સરકાર પોતાના મહત્વના કાયદાકીય એજન્ડાને આગળ ધપાવવાનો પ્રયાસ કરશે. તેમાં મહિલા અનામત અને સીમાંકન સંબંધિત 131મું બંધારણીય સુધારા બિલ સૌથી મહત્વપૂર્ણ માનવામાં આવી રહ્યું છે. સરકાર લોકસભા અને રાજ્ય વિધાનસભાઓમાં બેઠકોની સંખ્યા વધારવા માટે પણ સુધારા લાવી શકે છે. અહેવાલો મુજબ બેઠકોમાં લગભગ 50 ટકા સુધીનો વધારો કરવાની જોગવાઈ અંગે ચર્ચા થઈ શકે છે. આ ઉપરાંત 130મું બંધારણીય સુધારા બિલ પણ ચર્ચામાં રહી શકે છે. આ પ્રસ્તાવ મુજબ જો કોઈ વડાપ્રધાન, મુખ્યમંત્રી અથવા મંત્રી 30 દિવસથી વધુ સમય સુધી જેલમાં રહે તો તેઓ પોતાનું પદ ગુમાવી શકે તેવી જોગવાઈનો સમાવેશ થઈ શકે છે. આ મુદ્દે રચાયેલી સંયુક્ત સંસદીય સમિતિ (JPC)નો અહેવાલ પણ મહત્વનો બની શકે છે.
સંસદના આ સત્રમાં સરકાર ‘વન નેશન, વન ઇલેક્શન’ સંબંધિત બિલને આગળ વધારવાનો પણ પ્રયાસ કરી શકે છે. ઉપરાંત FCRA સુધારા બિલ, વિકાસ ભારત શિક્ષણ સ્થાપના બિલ અને ડોપિંગ વિરોધી બિલ જેવા પ્રસ્તાવો પણ રજૂ થઈ શકે છે. સુપ્રીમ કોર્ટમાં ન્યાયાધીશોની સંખ્યા વધારવા માટે લાવવામાં આવેલા વટહુકમને કાયદાનું સ્વરૂપ આપવા માટેનું બિલ પણ સંસદમાં આવી શકે છે. સાથે જ વેતન સંહિતા (કેન્દ્રીય નિયમો), કોર્પોરેટ કાયદા અને સિક્યોરિટીઝ માર્કેટ કોડ સંબંધિત સુધારાઓ પર પણ ચર્ચા થવાની શક્યતા છે. બીજી તરફ વિપક્ષે પણ આ સત્ર માટે પોતાની તૈયારીઓ શરૂ કરી દીધી છે. દેશના અનેક ભાગોમાં ઓછા વરસાદને કારણે સર્જાયેલી દુષ્કાળ જેવી સ્થિતિ અને કેટલાક રાજ્યોમાં ભારે વરસાદથી આવેલા પૂર અંગે ચર્ચાની માંગ કરવામાં આવી શકે છે.
વિપક્ષ NEET પેપર લીક, અયોધ્યાના રામ મંદિરમાં પ્રસાદ ચોરીનો મામલો, મોંઘવારી, પેટ્રોલ-ડીઝલના વધતા ભાવ અને બેરોજગારી જેવા મુદ્દાઓ પર સરકારને ઘેરવાનો પ્રયાસ કરશે. આ ઉપરાંત મતદાર યાદીની વિશેષ સમરી રિવિઝન (SSR), પ્રાદેશિક પક્ષોમાં થયેલા વિભાજન અને તેમાં સરકારની કથિત ભૂમિકા જેવા મુદ્દાઓ પણ સંસદમાં ગૂંજી શકે છે. ભાજપ તરફથી પશ્ચિમ બંગાળ અને આસામમાં મળેલી રાજકીય સફળતા બાદ પક્ષ આત્મવિશ્વાસમાં છે. સરકાર અને ભાજપ બંને વિપક્ષી ગઠબંધન INDIA બ્લોકમાં ચાલી રહેલા આંતરિક મતભેદોને પણ સંસદમાં મુદ્દો બનાવી શકે છે. આ રીતે 20 જુલાઈથી શરૂ થનાર સંસદનું ચોમાસુ સત્ર માત્ર નવા કાયદાઓ માટે જ નહીં, પરંતુ સરકાર અને વિપક્ષ વચ્ચેની જોરદાર રાજકીય ટક્કર માટે પણ યાદગાર બની શકે છે.
