શિવશક્તિ માર્કેટમાં આગની ઘટનાએ કાપડ બજારમાં ઘેરા પ્રત્યાઘાત સર્જાયા છે. વેપારીઓના દુઃખમાં સહભાગી થઈને તેમને મદદરૂપ થવા સાથોસાથ હોળીના કાર્યક્રમ નહીં કરવા અને કાર્યક્રમના ખર્ચના નાણાં પીડિત વેપારીઓ માટે એકત્ર કરાઈ રહેલા ફંડમાં આપવા વ્યાપક તબક્કે અપીલ થઈ હતી.
જોકે, સંવેદના મરી પરવારી હોય એ રીતે કેટલાક સ્થળોએ અમુક સંસ્થા દ્વારા હોળીની ઉજવણીના ફાગોત્સવ કાર્યક્રમોનું આયોજન કરાતા નારાજગી ફેલાઈ છે.
રવિવારે ફાગોત્સવની ઉજવણીના નામે ફક્ત અશ્લીલતા દર્શાવતો એકથી વધુ વીડિયો વાયરલ થતા કાપડ બજારના વેપારીઓ ભારે વ્યથિત થયા છે. સોશિયલ મીડિયામાં પણ આવી હરકતો સામે ભારે રોષ ઠાલવતી કોમેન્ટ્સ જોવા મળી છે.
વીડિયો પૈકી સૌથી વધુ ચર્ચાના કેન્દ્રમાં રહેલા એકમાં ફાગ ગીત પર ડાન્સ કરતી મહિલા બીભત્સ ઈશારા કરતી દેખાય છે. એક વ્યક્તિ સાથે ડાન્સ કરતાં કરતાં આ મહિલા તેના ખોળામાં પણ બેસી જાય છે. ફરી બિભત્સ ઇશારા કરતા બીજા વ્યક્તિના હાથમાંથી પૈસા લઇ નૃત્ય કરવા માંડે છે. ત્યાર બાદ ડાન્સર મહિલા પર બીજો એક વ્યક્તિ નોટો ઉડાડતો દેખાય છે. આ વીડિયો ટેક્સટાઇલ વર્તુળોની સાથે શહેરભરમાં ચર્ચાનો વિષય બન્યો છે.
આજ રીતે રીતે રવિવારે સુરતમાં એક સંસ્થાનો ફાગોત્સવનો વીડિયો પણ ભારે વાયરલ થયો હતો. જેમાં એક વયસ્ક વ્યક્તિ મહિલા સાથે ડાન્સ કરતા દેખાઈ રહ્યા હતા. જ્યારે પાછળના ભાગે બીજી કેટલીક મહિલાઓ શૃંગાર કરતા દેખાઈ હતી. આજે રજાના દિવસે પણ વાયરલ વીડિયોને લઈ કાપડ વેપારીઓ એકબીજાને કોલ કરવા માંડયા હતા.
