પશુ આહાર અને ઇંધણના ખર્ચમાં વધારો થતા એક વર્ષ બાદ અમૂલે લીધો નિર્ણય
ખેડૂતોની આવક જાળવી રાખવા ભાવ વધારો અનિવાર્ય
આણંદ./ વડોદરા:
ગુજરાત કો-ઓપરેટિવ મિલ્ક માર્કેટિંગ ફેડરેશન (GCMMF), જે અમૂલ બ્રાન્ડ હેઠળ દૂધનું વેચાણ કરે છે, તેના દ્વારા દૂધના ભાવમાં પ્રતિ લિટર રૂપિયા 2 સુધીનો વધારો જાહેર કરવામાં આવ્યો છે. આ નવો ભાવ વધારો 14મી મે 2026થી સમગ્ર ભારતમાં અમલમાં આવશે. મે-2025 બાદ એટલે કે એક વર્ષ કરતા વધુ સમય પછી આ ભાવ વધારો કરવામાં આવ્યો છે.
ગુજરાત કો-ઓપરેટિવ મિલ્ક માર્કેટિંગ ફેડરેશન (અમૂલ) દ્વારા કરવામાં આવેલા આ ભાવ વધારો મહત્તમ વેચાણ કિંમતના 2.5 ટકાથી 3.5 ટકાની વચ્ચે છે, જે સરેરાશ ખાદ્ય ફુગાવા કરતા ઓછો છે. આ નિર્ણય પાછળનું મુખ્ય કારણ 36 લાખ દૂધ ઉત્પાદકોના ઇનપુટ ખર્ચમાં થયેલો વધારો છે. છેલ્લા એક વર્ષમાં પશુ આહાર, દૂધના પેકેજિંગ માટેની ફિલ્મ અને બળતણના ભાવમાં નોંધપાત્ર વધારો થયો છે.
આ અંગે ફેડરેશનના જણાવ્યા અનુસાર, અમૂલ તેના ગ્રાહકો પાસેથી મેળવેલા દરેક 1 રૂપિયામાંથી 80 પૈસા (80 %) સીધા દૂધ ઉત્પાદકોને પરત આપે છે. આ ભાવ વધારાનો મોટો હિસ્સો દૂધ ઉત્પાદકો પાસે જશે, જેથી તેઓને દૂધનું ઉત્પાદન વધારવા માટે પ્રોત્સાહન મળી રહે. છેલ્લા એક વર્ષમાં સભ્ય સંઘોએ ખેડૂતોને અપાતા ભાવમાં પણ 3.7 ટકા (રૂ. 30 પ્રતિ કિલો ફેટ) નો વધારો કર્યો છે.
વડોદરા જિલ્લા સહકારી દૂધ ઉત્પાદક સંઘ લિ. (બરોડા ડેરી) દ્વારા અમૂલ દૂધના વેચાણ ભાવમાં વધારો જાહેર કરવામાં આવ્યો છે. ગુજરાત કો-ઓપરેટિવ મિલ્ક માર્કેટિંગ ફેડરેશન લિ. (GCMMF)ના નિર્ણય અનુસાર તા. 14 મે 2026થી નવા ભાવ અમલમાં આવશે. દૂધ ઉત્પાદકોને વધુ લાભ મળે તે માટે ખરીદ ભાવમાં પણ પ્રતિ કિલો ફેટ રૂ. 31.15નો વધારો કરવામાં આવ્યો હોવાનું સંઘ દ્વારા જણાવાયું છે.
જાહેર થયેલા નવા ભાવ મુજબ અમૂલ ગોલ્ડ દૂધના 500 મિલી પાઉચનો ભાવ રૂ. 34માંથી વધારી રૂ. 35 કરવામાં આવ્યો છે, જ્યારે 6 લિટર પેકનો ભાવ રૂ. 400થી વધારી રૂ. 420 કરાયો છે. અમૂલ શક્તિ દૂધના 500 મિલી પાઉચનો ભાવ રૂ. 31થી વધારી રૂ. 32 અને 6 લિટર પેકનો ભાવ રૂ. 372થી વધારી રૂ. 384 કરવામાં આવ્યો છે.
તે ઉપરાંત અમૂલ ગાય દૂધના 500 મિલી પાઉચનો ભાવ રૂ. 28થી વધારી રૂ. 30 અને 200 મિલી પાઉચનો ભાવ રૂ. 11થી વધારી રૂ. 12 કરવામાં આવ્યો છે. અમૂલ તાજા દૂધના 500 મિલી પાઉચનો ભાવ રૂ. 28 જ રાખવામાં આવ્યો છે, જ્યારે 6 લિટર પેકનો ભાવ રૂ. 336થી વધારી રૂ. 348 કરવામાં આવ્યો છે. અમૂલ સ્લિમ એન્ડ ટ્રિમ દૂધના 500 મિલી પાઉચનો ભાવ રૂ. 24થી વધારી રૂ. 25 કરવામાં આવ્યો છે.
બરોડા ડેરીએ જણાવ્યું છે કે દૂધના વેચાણ ભાવમાં થયેલા વધારાની સરખામણીએ દૂધ ઉત્પાદકોને વધુ લાભ આપવામાં આવ્યો છે. હાલમાં પ્રતિ કિલો ફેટનો ભાવ રૂ. 875થી વધારી રૂ. 906 કરવામાં આવ્યો છે.
ડેરી દ્વારા જાહેર માહિતી મુજબ વર્ષ 2015માં અમૂલ ગોલ્ડ દૂધનો ભાવ પ્રતિ લિટર રૂ. 48 હતો અને તે સમયે દૂધ ઉત્પાદકોને પ્રતિ કિલો ફેટ રૂ. 570 મળતા હતા. હવે 14 મે 2026થી અમૂલ ગોલ્ડનો ભાવ પ્રતિ લિટર રૂ. 70 થશે જ્યારે દૂધ ખરીદીનો ભાવ રૂ. 840 પ્રતિ કિલો ફેટ સુધી પહોંચશે. છેલ્લા 11 વર્ષમાં અમૂલ ગોલ્ડના વેચાણ ભાવમાં રૂ. 22નો વધારો થયો છે, જ્યારે દૂધ ખરીદ ભાવમાં રૂ. 270નો વધારો નોંધાયો છે.
બરોડા ડેરીએ દાવો કર્યો છે કે છેલ્લા 11 વર્ષમાં દૂધ ઉત્પાદકોના ખરીદ ભાવમાં અંદાજે 47.35 ટકા વધારો કરવામાં આવ્યો છે, જ્યારે વેચાણ ભાવમાં આશરે 45.83 ટકા વધારો નોંધાયો છે.
બ્રાન્ડ વાઈઝ ભાવમાં થયેલો ફેરફાર (ગુજરાત: અમદાવાદ, સૌરાષ્ટ્ર અને કચ્છ માટે)
દૂધના વેરિઅન્ટ પેક સાઈઝ જૂનો ભાવ (રૂ.) નવો ભાવ (રૂ) વધારો (રૂ)
અમૂલ તાજા 500 મિલી 28 29 1
અમૂલ તાજા 1 લિટર 55 57 2
ગાયનું દૂધ 500 મિલી 29 30 1
અમૂલ શક્તિ 500 મિલી 31 32 1
ટી સ્પેશિયલ 1 લિટર 63 66 3
અમૂલ ગોલ્ડ 500 મિલી 34 35 1
ભેંસનું દૂધ 500 મિલી 37 39 2
