મુંબઈ: મહારાષ્ટ્રની (Maharastra) શિંદે સરકારે બુધવારે મોટો નિર્ણય લેતા મુંબઈના વર્સોવા-બાંદ્રા સી લિંકનું (Versova-Bandra Sea Link) નામ બદલીને વીર સાવરકર સેતુ કરી દીધું છે. ઉપરાંત મુંબઈ ટ્રાન્સ હાર્બર લિંકનું નામ બદલીને અટલ બિહારી વાજપેયી સ્મૃતિ સેતુ નામ આપવામાં આવ્યું છે. બુધવાર, 28 જૂને રાજ્ય કેબિનેટની બેઠકમાં આ અંગેનો નિર્ણય લેવામાં આવ્યો હતો.
મહારાષ્ટ્રનાં સીએમ એકનાથ શિંદેએ વીર સાવરકરના જન્મદિવસ 28 મેના રોજ જાહેરાત કરી હતી કે બાંદ્રા-વર્સોવા સી લિંકનું નામ હિન્દુત્વના વિચારક વીર સાવરકરના નામે રાખવામાં આવશે. શિંદેએ એમ પણ કહ્યું હતું કે કેન્દ્રીય શૌર્ય પુરસ્કારની જેમ રાજ્ય કક્ષાના શૌર્ય પુરસ્કારને પણ સ્વાતંત્ર્ય વીર સાવરકરના નામ પર રાખવામાં આવશે.
બુધવારની કેબિનેટની બેઠક વિશે માહિતી આપતાં સીએમ શિંદેએ કહ્યું કે આજે અમે 40,000 કરોડ રૂપિયાના રોકાણ પ્રસ્તાવોને મંજૂરી આપી છે. આ પ્રસ્તાવથી 120000 લોકોને રોજગાર મળશે. મહારાષ્ટ્રમાં અનેક ઉદ્યોગો આવશે. મહારાષ્ટ્ર FDIમાં ફરી નંબર 1 બની ગયું છે.
700 બાળાસાહેબ ક્લિનિક્સ ખોલવાનો નિર્ણય
કેબિનેટની બેઠકમાં મહારાષ્ટ્ર રાજ્યમાં 700 સ્થળોએ હિન્દુ હ્રદય સમ્રાટ બાળાસાહેબ ઠાકરે ક્લિનિક્સ શરૂ કરવાનો પણ નિર્ણય લેવામાં આવ્યો છે. આ માટે 210 કરોડ રૂપિયાની જોગવાઈ કરવામાં આવી છે. આ કેબિનેટ બેઠકમાં ભામા આસખેડ પ્રોજેક્ટની કેનાલો રદ કરવાનો નિર્ણય પણ લેવામાં આવ્યો છે. જેનાથી ત્રણ તાલુકાના ખેડૂતોને તેનો લાભ મળશે. સીએમ શિંદેએ ટ્વિટ કરીને કેબિનેટના નિર્ણયોની જાણકારી આપી છે.
છત્રપતિ સંભાજીનગરમાં મરાઠવાડા મુક્તિ યુદ્ધનું ભવ્ય સ્મારક બનાવવામાં આવશે
આ ઉપરાંત મહાત્મા જ્યોતિરાવ ફૂલે જન આરોગ્ય યોજના અને આયુષ્માન ભારત પ્રધાન મંત્રી આરોગ્ય યોજના સંયુક્ત રીતે અમલમાં આવશે. 2 કરોડ હેલ્થ કાર્ડનું વિતરણ કરવામાં આવશે જે અંતર્ગત 5 લાખનું હેલ્થ કવર મળશે. સંજય ગાંધી નિરાધાર યોજના અને શ્રવણ બાલ યોજનાની રકમ રૂ.1000 થી વધારીને રૂ.1500 કરવામાં આવી છે. છત્રપતિ સંભાજીનગરમાં મરાઠવાડા મુક્તિ યુદ્ધનું ભવ્ય સ્મારક બનાવવામાં આવશે. આ માટે 100 કરોડ મંજૂર કરવામાં આવ્યા છે. જાલનાથી જલગાંવ સુધી નવી બ્રોડગેજ રેલ્વે લાઇન માટે રૂ. 3552 કરોડ મંજૂર કરવામાં આવ્યા છે. રાજ્યમાં 9 જગ્યાએ નવી સરકારી ડિગ્રી કોલેજો સ્થાપવા માટે 4365 કરોડ રૂપિયાની મંજૂરી પણ આપવામાં આવી છે.
