ભારત સરકારે સિંધુ જળ સંધિ મુલતવી રાખ્યા બાદ પાકિસ્તાનના લોકોમાં ગભરાટ છે. પાકિસ્તાન તેની 80 ટકા ખેતી માટે સિંધુ નદીના પાણી પર નિર્ભર છે. ભારત નવા સિંધુ પ્રોજેક્ટ હેઠળ પાકિસ્તાનનું પાણી રોકવા જઈ રહ્યું છે જેના કારણે ત્યાંના લોકો ડરી ગયા છે. કારણકે હવે પાકિસ્તાનને વિજળીનો આંચકો લાગવાનો છે.
રોઇટર્સના અહેવાલ મુજબ 22 એપ્રિલે પહેલગામ આતંકવાદી હુમલા પછી સિંધુ જળ સંધિ સ્થગિત કરવામાં આવી ત્યારથી ચિનાબ, ઝેલમ અને સિંધુ નદીઓ પરના પ્રોજેક્ટ પર કામ ઝડપી બનાવવામાં આવ્યું છે. આ પ્રદેશના મુખ્ય પ્રોજેક્ટ્સમાંનો એક ચિનાબ નદી પર રણબીર બંધની લંબાઈને બમણી કરીને 120 કિલોમીટર કરવાનો છે. આ નદીનું પાણી ભારતમાં થઈને પાકિસ્તાનના પંજાબના કૃષિ વિસ્તારમાં જાય છે.
રિપોર્ટ અનુસાર જ્યારે ભારત તેનો પ્રોજેક્ટ પૂર્ણ કરશે ત્યારે તે પ્રતિ સેકન્ડ 150 ઘન મીટર પાણી વાળવામાં સક્ષમ હશે, જ્યારે હાલમાં તે ફક્ત 40 ઘન મીટર પાણી વાળવામાં સક્ષમ છે. પાકિસ્તાનના વિદેશ મંત્રી ઇશાક ડારે રાષ્ટ્રીય સભામાં જણાવ્યું હતું કે તેમની સરકારે ભારતને પત્ર લખીને સિંધુ જળ સંધિ પર પુનર્વિચાર કરવા જણાવ્યું છે. તેમણે પોતાના સાંસદોને કહ્યું કે ભારતનું આ પગલું ગેરકાયદેસર છે.
વોશિંગ્ટન સ્થિત સેન્ટર ફોર સ્ટ્રેટેજિક એન્ડ ઇન્ટરનેશનલ સ્ટડીઝના જળ સુરક્ષા નિષ્ણાત ડેવિડ મિશેલે જણાવ્યું હતું કે ભારતને ડેમ, નહેરો અથવા અન્ય માળખાગત સુવિધાઓ બનાવવામાં સમય લાગશે. જોકે તેમણે પાડોશી દેશને ચેતવણી આપી હતી કે પાકિસ્તાનને ખ્યાલ આવી ગયો છે કે તેને ભારત તરફથી કેવા પ્રકારના દબાણનો સામનો કરવો પડી શકે છે.
રણબીર નહેરના વિસ્તરણની યોજના સાથે ભારત એવા પ્રોજેક્ટ્સ પર પણ વિચાર કરી રહ્યું છે જે પાકિસ્તાનને ફાળવવામાં આવતી નદીઓના પાણીના પ્રવાહને ઘટાડશે. આના કારણે પાકિસ્તાનને પોતાના માટે વીજળી ઉત્પન્ન કરવામાં ઘણી સમસ્યાઓનો સામનો કરવો પડશે.
ભારતે હાઇડ્રો ઇલેક્ટ્રિક પ્રોજેક્ટ્સની યાદી બનાવી – અહેવાલ
રિપોર્ટ અનુસાર ભારતે જમ્મુ અને કાશ્મીર ક્ષેત્રમાં હાઇડ્રો ઇલેક્ટ્રિક પ્રોજેક્ટ્સની યાદી તૈયાર કરી છે જે વીજળી ઉત્પાદન 3,360 મેગાવોટથી વધારીને 12,000 મેગાવોટ કરશે. આ પ્રોજેક્ટ્સમાં એવા બંધોનો પણ સમાવેશ થાય છે જે મોટા પ્રમાણમાં પાણીનો સંગ્રહ કરી શકે છે. જે સિંધુ નદી પ્રણાલીમાં ભારત માટે પ્રથમ હશે.
પીએમ મોદીએ સ્પષ્ટ કહ્યું છે કે પાણી અને લોહી એકસાથે વહી શકતા નથી. ભારતીય વિદેશ મંત્રાલયના પ્રવક્તા રણધીર જયસ્વાલે મંગળવારે (13 મે, 2025) જણાવ્યું હતું કે જ્યાં સુધી પાકિસ્તાન આતંકવાદને સમર્થન આપવાનું બંધ ન કરે ત્યાં સુધી ભારત સિંધુ જળ સંધિને સ્થગિત રાખશે.
