સુરતઃ (Surat) સુરત શહેરના હજીરા ખાતે આવેલી આઈનોક્સ (Inox) કંપની હાલ સૌથી વધારે ઓક્સિજન સપ્લાય (Oxygen Supply) કરી રહી છે. વિકટ પરિસ્થિતીમાં કંપનીએ સુરતમાં કાપ મૂકી મહારાષ્ટ્ર, મધ્યપ્રદેશ સહિત અન્ય જિલ્લામાં ઓક્સિજન સપ્લાય શરૂ કર્યો છે. શહેરમાં ઓકિસનજ કટોકટી વચ્ચે અધિકારીઓએ આજે કંપનીની બહાર જ ડેરો નાખી તેમના ટેન્કરો અટકાવી દીધા હતા. હજીરા ખાતે આવેલી આઈનોક્સ કંપનીનો પ્લાન્ટ પહેલા પ્રતિદિન 120 મેટ્રિક ટન ઉત્પાદન કરતી હતી. જે અત્યારની પરિસ્થિતિમાં વધારી 170 ટન કરી દેવાયો છે. આ જથ્થો પહેલા સુરત સહિત દક્ષિણ ગુજરાતમાં આપતા હતા. પરંતુ હવે દેશના અન્ય રાજ્યા અને જિલ્લાઓમાં પણ ઓક્સિજનની અછત સર્જાતા જથ્થો બહાર પહોંચાડવામાં આવી રહ્યો છે. અને તે બધુ સુરતના ઓક્સિજનના જથ્થામાં કાપ મુકીને થઈ રહ્યું છે.
સુરતને કંપનીએ આજે માત્ર 86 મેટ્રિક ટન જથ્થો આપ્યો હતો. બીજા ઓક્સિજનની જરૂર હોવા છતાં સ્પષ્ટ ઇનકાર કર્યો હતો. જેને પગલે શહેરમાં ઓક્સિજનની કટોકટીને પગલે હજીરામાંથી અન્ય રાજ્યમાં જતા ટેન્કર અધિકારીઓએ અટકાવી દીધા હતા. પહેલા સુરતને સપ્લાય પુરો આપો કહી કંપનીની બહાર ડેરો નાખી બેઠા હતા. નાયબ કલેક્ટર આર.આર.બોરડ, ફુડ એન્ડ ડ્રગ્સ વિભાગના આસિસ્ટન્ટ કમિશનર આર.એમ.પટેલ, સહિત સાત અધિકારીઓએ આજે હજીરા ખાતે આઈનોક્સ કંપનીની બહાર તેમના ટેન્કરનો સપ્લાય અટકાવી દીધો હતો.
કંપની ઉપર પ્રેસર લાવવા અન્ય કેમિકલના ટેન્કર પણ અટકાવી દેવાયા
શહેરને બચાવવા માટે હવે અધિકારીઓ પણ દબંગ રસ્તે ઉતરી આવ્યા હતા. સાત જેટલા ક્લાસ-1 અધિકારીઓએ કંપનીને પહેલા સુરતને સપ્લાય પુરો પાડો પછી અન્ય જિલ્લામાં મોકલો કહીને ટેન્કર રોકી રાખ્યા હતા. સુરતની બહાર મધ્યપ્રદેશ. નવસારી, વલસાડ અને વડોદરા ખાતે જનારા ટેન્કરો રોકી રાખ્યા હતા. આ સિવાય કંપની પર પ્રેસર લાવવા માટે કંપનીમાં નાઈટ્રોજન અને આર્ગન નામના કેમિકલના ટેન્કર અટકાવી દીધા છે. આ કેમિકલ ઇન્ડસ્ટ્રીમાં વપરાય છે.
શહેરમાં 210 મેટ્રિક ટન માંગ સામે માત્ર 153 મેટ્રિક ટન ઓક્સિજન મળી શક્યો
સુરતઃ શહેરમાં ઓક્સિજન સપ્લાયની પરિસ્થિતિ દર ચોવીસ કલાકે વધુ પડકારજનક બની રહી છે. આજે સુરત શહેરમાં 210 મેટ્રિક ટન માંગ સામે માત્ર 153 મેટ્રિક ટન ઓક્સિજન મળી શક્યો હતો. ઓક્સિજન માં દર ચોવીસ કલાકે થઈ રહેલો કાપ હવે તંત્રનો શ્વાસ અધ્ધર કરી રહ્યો છે. સુરત શહેર રેમડેસિવિર ઇન્જેક્શન બાદ હવે પ્રાણવાયુ માટે વલખા મારી રહ્યું છે. શહેરને ઓક્સિજન સપ્લાય કરતી કંપનીઓ એક પછી એક નાદારી નોંધાવી રહી છે. શહેરમાં સૌથી વધુ ઓક્સિજન સપ્લાય કરતી આઇનોક્સ કંપનીને મધ્યપ્રદેશ અને મહારાષ્ટ્રમાં ઓક્સિજન સપ્લાય કરવાની કેન્દ્ર સરકારની સુચના બાદ સુરત શહેરમાં પરિસ્થિતિ વધારે વિકટ બની રહી છે. આજે સતત ત્રીજા દિવસે શહેરમાં ઓક્સિજનમાં સતત કાપ મુકવામાં આવ્યો હતો.
દર 24 કલાકે ઓક્સીજનના સપ્લાયમાં થઈ રહેલો ઘટાડો હવે ચિંતાનો વિષય બન્યો છે. આ ચિંતાનો વિષય કઈ કેટલા લોકો માટે ચિતાનો વિષય બની રહેશે તેવી ભીતિ સેવાઈ રહી છે. શહેરમાં આજે આઈનોક્સ કંપની દ્વારા 86 મેટ્રિકટન જથ્થો આપવામાં આવ્યો હતો. આ પુરેપુરો જથ્થો નવી સિવિલ અને સ્મીમેર હોસ્પિટલને સપ્લાય કરાયો હતો. આ સિવાય ખાનગી હોસ્પિટલોની માંગણીને પહોંચી વળવા તંત્રના તમામ પ્રયાસો નિષ્ફળ સાબિત થયા હતા. શહેરમાં આજે કુલ 210 મેટ્રિક ટન ઓક્સિજનની ડિમાન્ડ હતી જેની સામે માત્ર 153 મેટ્રિક ટન ઓક્સિજન પૂરો પાડી શકાયો છે. ઉલ્લેખનીય છે કે ગઇકાલે શહેરમાં 225 મેટ્રિક ટન ડિમાન્ડની સામે 160 મેટ્રિક ટન ઓક્સિજન અપાયો હતો. આજે ઓક્સિજનના થઈ રહેલા આ સપ્લાયમાં હજુ ઘટાડો નોંધાયો છે. આગામી ૨૪ કલાક બાદ ઓક્સિજન સપ્લાયની ઘટ વધુ ઘેરી બને તેવી ભિતી સેવાઈ રહી છે.
