જાપાનના નાગોયામાં યોજાનારી એશિયન ગેમ્સ શરૂ થાય તે પહેલાં જ ભારતીય ખેલાડીઓ અને સપોર્ટ સ્ટાફને અનેક પ્રકારની મુશ્કેલીઓનો સામનો કરવો પડી રહ્યો છે. ખાસ કરીને રોઇંગ અને શૂટિંગ ટીમ નાગોયા પહોંચ્યા બાદ રહેઠાણ, ટ્રાન્સપોર્ટ અને એક્રેડિટેશનની સમસ્યાથી પરેશાન થઈ હતી. બીજી તરફ ભારતીય ઇક્વેસ્ટ્રિયન ટીમ સામે ઘોડાઓના ખોરાક અને અન્ય ખર્ચને લઈને આર્થિક મુશ્કેલી ઊભી થઈ છે. રોઇંગ ટીમના કેટલાક ખેલાડીઓ નાગોયા પહોંચ્યા બાદ લાંબા સમય સુધી રહેવા માટેના રૂમની રાહ જોતા રહ્યા હતા. આ વખતે એશિયન ગેમ્સ માટે પરંપરાગત એક જ એથ્લેટ્સ વિલેજની જગ્યાએ અલગ અલગ સ્થળોએ રહેઠાણની વ્યવસ્થા કરવામાં આવી છે. ખેલાડીઓને ક્રૂઝ શિપ, અસ્થાયી રહેઠાણ અને હોટલોમાં રાખવામાં આવી રહ્યા છે. આ વ્યવસ્થાના કારણે ચેક-ઇન અને રૂમ ફાળવણીમાં મુશ્કેલી ઊભી થઈ હોવાનું સામે આવ્યું છે.
ભારતીય રોઇંગ ટીમના કેટલાક ખેલાડીઓને પણ શરૂઆતમાં રહેવા માટે યોગ્ય વ્યવસ્થા મળી નહોતી. લાંબી મુસાફરી બાદ ખેલાડીઓએ કલાકો સુધી રૂમની રાહ જોવી પડી હતી. કેટલાક ખેલાડીઓને એકબીજા સાથે રૂમ શેર કરવાની સ્થિતિ પણ આવી હતી. લાંબી રાહ દરમિયાન ખાવા-પીવાની વ્યવસ્થાને લઈને પણ મુશ્કેલી પડી હોવાનું સામે આવ્યું છે. રોઇંગ ટીમ માટે એક્રેડિટેશન પણ સમસ્યા બની હતી. કેટલાક ખેલાડીઓના નામ એક્રેડિટેશન સિસ્ટમમાં નોંધાયેલા ન હોવાનું સામે આવ્યું હતું. જેના કારણે તેમને ગેમ્સ સાથે જોડાયેલી સુવિધાઓ અને પ્રવેશ વ્યવસ્થાને લઈને મુશ્કેલી પડી હતી. આ ઉપરાંત રોઇંગમાં ઉપયોગમાં લેવાતા ઓર્સ એટલે કે ચપ્પુઓને લઈને પણ સમસ્યા ઊભી થઈ હતી. એરલાઇન દ્વારા ઓર્સને ચેક-ઇન કરવાનો ઇનકાર કરવામાં આવતા તેને અલગથી મોકલવાની વ્યવસ્થા કરવી પડી હતી.
શૂટિંગ ટીમને પણ નાગોયા એરપોર્ટ પર ટ્રાન્સપોર્ટ માટે લાંબો સમય રાહ જોવી પડી હતી. ટીમના સભ્યોને આશરે ત્રણ કલાક સુધી વાહનની રાહ જોવી પડી હતી અને ત્યારબાદ તેઓ મોડી રાત્રે હોટલ પહોંચ્યા હતા. શૂટિંગ ટીમ માટે સૌથી મોટી મુશ્કેલી હેડ કોચ સમરેશ જંગના એક્રેડિટેશનને લઈને ઊભી થઈ હતી. તેમનું એક્રેડિટેશન શૂટિંગ એરેનામાં પ્રવેશ માટે માન્ય ન હોવાનું સામે આવ્યું હતું. આ મુદ્દે નવું એક્રેડિટેશન મેળવવાની પ્રક્રિયા શરૂ કરવામાં આવી છે. આ સમગ્ર સ્થિતિ વચ્ચે ભારતીય ઇક્વેસ્ટ્રિયન ટીમ સામે પણ આર્થિક સંકટ ઊભું થયું છે. એશિયન ગેમ્સ માટે તૈયારી કરી રહેલા ભારતીય ઘોડેસવાર ખેલાડીઓને ઘોડાઓના ખોરાક, ઘાસ, બેડિંગ અને અન્ય જાળવણી ખર્ચ માટે શરૂઆતમાં પોતાની તરફથી પૈસા ખર્ચવા જણાવાયું હોવાનું સામે આવ્યું છે. સરકારી ફંડની તંગીનું કારણ આપીને આ ખર્ચ બાદમાં પરત કરવામાં આવશે તેવી વ્યવસ્થા અંગે ખેલાડીઓને જાણ કરવામાં આવી છે.
ઇક્વેસ્ટ્રિયન ટીમની મુશ્કેલી માત્ર નાગોયા પહોંચ્યા બાદની નથી. જર્મનીમાં ઘોડાઓના ક્વોરેન્ટાઇન સમય દરમિયાન પણ ખોરાક, પરીક્ષણો, પરિવહન અને અન્ય ખર્ચ કરવામાં આવ્યા હતા. આમાંથી કેટલાક ખર્ચનું રિઇમ્બર્સમેન્ટ હજુ બાકી હોવાનું જણાવવામાં આવી રહ્યું છે. સમયસર ભંડોળ ન મળવાને કારણે ખેલાડીઓ અને સપોર્ટ સ્ટાફ પર વધારાનો આર્થિક બોજ પડી રહ્યો છે. એશિયન ગેમ્સ શરૂ થવામાં હવે થોડા જ દિવસો બાકી છે ત્યારે ભારતીય ખેલાડીઓ માટે આવી લોજિસ્ટિક સમસ્યાઓ સામે આવવી ચિંતાજનક સ્થિતિ છે. ખેલાડીઓએ મેદાન પર પોતાના પ્રદર્શન પર ધ્યાન કેન્દ્રિત કરવાનું હોય છે, પરંતુ રહેઠાણ, ટ્રાન્સપોર્ટ, એક્રેડિટેશન અને સાધનો જેવી બાબતોમાં મુશ્કેલી સર્જાય તો તેમની તૈયારીઓ પર અસર પડી શકે છે.
જોકે, બાદમાં ભારતીય દળના તમામ ખેલાડીઓને રહેઠાણની વ્યવસ્થા મળી ગઈ હોવાનું જણાવવામાં આવ્યું છે. હવે એક્રેડિટેશન અને અન્ય લોજિસ્ટિક સમસ્યાઓ ઝડપથી ઉકેલાય તેમજ ઇક્વેસ્ટ્રિયન ટીમના બાકી ખર્ચનું નિરાકરણ આવે તેની રાહ જોવામાં આવી રહી છે. એશિયન ગેમ્સ શરૂ થયા બાદ ભારતીય ખેલાડીઓનું ધ્યાન હવે માત્ર પોતાની રમતો અને મેડલની સ્પર્ધા પર રહે તે માટે બાકીની વ્યવસ્થા સમયસર સુચારુ બને તે મહત્વનું છે.
