મહિલા ક્રિકેટનો સૌથી મોટો મહાસંગ્રામ ગણાતો 10મો ICC મહિલા T-20 વર્લ્ડ કપ 12 જૂનથી ઇંગ્લેન્ડ અને વેલ્સમાં શરૂ થઈ રહ્યો છે. 24 દિવસ સુધી ચાલનારી આ પ્રતિષ્ઠિત ટુર્નામેન્ટમાં વિશ્વની 12 શ્રેષ્ઠ ટીમો ભાગ લેશે અને કુલ 33 મેચ રમાશે. ટુર્નામેન્ટની શરૂઆત યજમાન ઇંગ્લેન્ડ અને શ્રીલંકા વચ્ચેની મેચથી થશે, જ્યારે ફાઇનલ મુકાબલો 5 જુલાઈએ ક્રિકેટના ઐતિહાસિક મેદાન લોર્ડ્સ ખાતે રમાશે. આ વખતે મહિલા T-20 વર્લ્ડ કપ અનેક રીતે ખાસ છે. ટુર્નામેન્ટના ઇતિહાસમાં પ્રથમ વખત 12 ટીમો ભાગ લઈ રહી છે. અગાઉ આ સ્પર્ધામાં 10 ટીમો જ રમતી હતી. વધુ ટીમોના સમાવેશને કારણે ટુર્નામેન્ટ વધુ સ્પર્ધાત્મક અને રોમાંચક બનવાની આશા છે. મહિલા T-20 વર્લ્ડ કપની શરૂઆત વર્ષ 2009માં ઇંગ્લેન્ડમાં થઈ હતી. પ્રથમ આવૃત્તિમાં માત્ર 8 ટીમોએ ભાગ લીધો હતો અને યજમાન ઇંગ્લેન્ડ પ્રથમ ચેમ્પિયન બન્યું હતું. ત્યારબાદ 2014થી ટીમોની સંખ્યા વધારીને 10 કરવામાં આવી હતી. હવે 2026માં પ્રથમ વખત 12 ટીમો વચ્ચે ખિતાબ માટે જંગ જામશે.
ટુર્નામેન્ટ માટે તમામ 12 ટીમોને બે ગ્રુપમાં વહેંચવામાં આવી છે. દરેક ગ્રુપમાં 6 ટીમો છે. ગ્રુપ સ્ટેજમાં દરેક ટીમ પોતાની ગ્રુપની બાકીની તમામ ટીમો સામે એક-એક મેચ રમશે. ત્યારબાદ બંને ગ્રુપમાંથી ટોચની બે ટીમો સેમિફાઇનલમાં પહોંચશે. સેમિફાઇનલ જીતનારી બે ટીમો વચ્ચે ફાઇનલ રમાશે. ભારતીય ટીમ માટે આ વર્લ્ડ કપ ખૂબ જ પડકારજનક રહેવાનો છે. ભારતને ગ્રુપ-Aમાં સ્થાન મળ્યું છે, જેને ઘણા ક્રિકેટ નિષ્ણાતો ‘ગ્રુપ ઓફ ડેથ’ કહી રહ્યા છે. આ ગ્રુપમાં ભારત ઉપરાંત ઓસ્ટ્રેલિયા અને સાઉથ આફ્રિકા જેવી મજબૂત ટીમો સામેલ છે. ભારત પોતાનું અભિયાન 14 જૂને પાકિસ્તાન સામેની હાઈ-વોલ્ટેજ મેચથી શરૂ કરશે. આ મુકાબલો બર્મિંગહામમાં રમાશે અને ક્રિકેટપ્રેમીઓમાં ભારે ઉત્સાહ જોવા મળી રહ્યો છે. ભારત માટે બીજી મહત્વપૂર્ણ મેચ 21 જૂને સાઉથ આફ્રિકા સામે રહેશે, જ્યારે સૌથી મોટો પડકાર 28 જૂને છ વખતની ચેમ્પિયન ઓસ્ટ્રેલિયા સામેનો મુકાબલો રહેશે. આ ત્રણ મેચોના પરિણામો ભારતની સેમિફાઇનલની આશાઓ માટે ખૂબ જ મહત્વના રહેશે.
ભારતીય ટીમની કમાન અનુભવી ખેલાડી હરમનપ્રીત કૌરના હાથમાં રહેશે. ટીમમાં સ્મૃતિ મંધાના, શેફાલી વર્મા, જેમિમા રોડ્રિગ્સ, રિચા ઘોષ, દીપ્તિ શર્મા, રેણુકા સિંહ અને શ્રેયંકા પાટિલ જેવી પ્રતિભાશાળી ખેલાડીઓ સામેલ છે. બેટિંગ અને બોલિંગ બંને વિભાગમાં ભારત પાસે સંતુલિત ટીમ છે અને ચાહકોને આ વખતે ટીમ પાસેથી ઐતિહાસિક પ્રદર્શનની આશા છે. ભારત અત્યાર સુધી મહિલા T-20 વર્લ્ડ કપની તમામ 9 આવૃત્તિમાં રમ્યું છે, પરંતુ હજુ સુધી એક પણ વખત ટ્રોફી જીતી શક્યું નથી. ભારતીય ટીમ 2020માં પ્રથમ વખત ફાઇનલમાં પહોંચી હતી, પરંતુ ઓસ્ટ્રેલિયા સામે હારી ગઈ હતી. તે ઉપરાંત ભારત ચાર વખત સેમિફાઇનલ સુધી પહોંચ્યું છે. અત્યાર સુધી રમાયેલી 40 મેચોમાં ભારતે 22 જીત મેળવી છે અને 18 મેચમાં હારનો સામનો કર્યો છે. આ વખતની ટુર્નામેન્ટમાં નેધરલેન્ડ્સ પ્રથમ વખત ભાગ લઈ રહ્યું છે. ટીમે ક્વોલિફાયર દ્વારા વર્લ્ડ કપમાં સ્થાન મેળવીને ઇતિહાસ રચ્યો છે. નવા દેશોના સમાવેશથી સ્પર્ધા વધુ રસપ્રદ બનશે.
ટુર્નામેન્ટની તમામ 33 મેચો ઇંગ્લેન્ડના 7 અલગ-અલગ મેદાનો પર રમાશે. બંને સેમિફાઇનલ ધ ઓવલ ખાતે રમાશે, જ્યારે ફાઇનલ લોર્ડ્સમાં યોજાશે. ભારતીય સમય અનુસાર મેચો બપોરે 3 વાગ્યે, સાંજે 7 વાગ્યે અને રાત્રે 11 વાગ્યે શરૂ થશે. ભારતની તમામ મેચો સાંજે 7 વાગ્યે રમાશે. ખિતાબ માટે ઓસ્ટ્રેલિયા સૌથી મજબૂત દાવેદાર માનવામાં આવે છે. ઓસ્ટ્રેલિયાએ અત્યાર સુધી 6 વખત ટ્રોફી જીતી છે. યજમાન ઇંગ્લેન્ડ, સાઉથ આફ્રિકા અને ભારત પણ ટાઇટલની રેસમાં મહત્વના દાવેદાર ગણાય છે. સાઉથ આફ્રિકા છેલ્લા કેટલાક ICC ટુર્નામેન્ટમાં સતત સારું પ્રદર્શન કરી રહ્યું છે, જ્યારે ભારત તાજેતરમાં મહિલા વનડે વર્લ્ડ કપ જીતીને આત્મવિશ્વાસથી ભરપૂર છે. ICCએ આ વખતે રેકોર્ડ ઇનામી રકમ જાહેર કરી છે. સમગ્ર ટુર્નામેન્ટ માટે કુલ 87.64 લાખ અમેરિકન ડોલરની પ્રાઇઝ મની રાખવામાં આવી છે. વિજેતા ટીમને કરોડો રૂપિયાનું ઇનામ મળશે.
ભારતમાં ક્રિકેટપ્રેમીઓ સ્ટાર સ્પોર્ટ્સ નેટવર્ક અને જિયોહોટસ્ટાર પર તમામ મેચોનું સીધું પ્રસારણ જોઈ શકશે. ઉપરાંત ICC.TV પર પણ ટુર્નામેન્ટનું લાઈવ સ્ટ્રીમિંગ ઉપલબ્ધ રહેશે. મહિલા ક્રિકેટ સતત નવા શિખરો સર કરી રહ્યું છે. 12 ટીમો, 33 મેચો અને વિશ્વની શ્રેષ્ઠ ખેલાડીઓ વચ્ચેનો આ મહાસંગ્રામ ચાહકો માટે યાદગાર બનવાનો છે. હવે સૌની નજર ભારતીય ટીમ પર રહેશે કે શું હરમનપ્રીત કૌરની આગેવાનીમાં ભારત પ્રથમ વખત મહિલા T-20 વર્લ્ડ કપનો ખિતાબ જીતવાનું સપનું સાકાર કરી શકશે?
