ભારત સરકારે શુક્રવારે પાકિસ્તાનના કબજા હેઠળના જમ્મુ અને કાશ્મીર (PoJK) ના ગિલગિટ-બાલ્ટિસ્તાન ક્ષેત્રમાં વિધાનસભાની ચૂંટણી કરાવવાની પાકિસ્તાનની યોજના સામે કડક વિરોધ નોંધાવ્યો. વિદેશ મંત્રાલય (MEA) એ સ્પષ્ટપણે જણાવ્યું કે ગિલગિટ-બાલ્ટિસ્તાન સહિત જમ્મુ અને કાશ્મીર અને લદ્દાખના તમામ પ્રદેશો ભારતનો અભિન્ન અને અવિભાજ્ય ભાગ છે.
ભારતની પાકિસ્તાનને ચેતવણી
એક નિવેદનમાં MEA એ જણાવ્યું કે 7 જૂન, 2026 ના રોજ કહેવાતી ‘ગિલગિટ-બાલ્ટિસ્તાન વિધાનસભા’ માટે સામાન્ય ચૂંટણીઓ યોજવાની પાકિસ્તાનની યોજના ભારતના સાર્વભૌમ અધિકારોનું ઉલ્લંઘન કરે છે. મંત્રાલયે ભારપૂર્વક જણાવ્યું કે આ પ્રદેશો ભારતના છે પરંતુ પાકિસ્તાનના ગેરકાયદેસર અને બળજબરીથી કબજા હેઠળ છે.
વિદેશ મંત્રાલયે પુનરોચ્ચાર કર્યો કે ૧૯૪૭માં જમ્મુ અને કાશ્મીરના ભારતમાં સંપૂર્ણ, કાયદેસર અને અટલ જોડાણ થયા પછીથી આ સમગ્ર પ્રદેશ ભારતનો ભાગ રહ્યો છે. ભારતે પાકિસ્તાન દ્વારા કબજા હેઠળના પ્રદેશોની સ્થિતિમાં કોઈપણ ‘ભૌતિક પરિવર્તન’ લાવવાના તમામ પ્રયાસોને નકારી કાઢ્યા.
પાકિસ્તાને કબજો ખાલી કરવો જ જોઇએ: ભારત
મંત્રાલયે જણાવ્યું હતું કે ભારત સરકાર પાકિસ્તાન દ્વારા તેના ગેરકાયદેસર કબજા હેઠળના વિસ્તારોની સ્થિતિ બદલવાના કોઈપણ પ્રયાસને સ્પષ્ટપણે નકારે છે. આવા પગલાં એ વાસ્તવિકતાને ઢાંકી શકતા નથી કે પાકિસ્તાન ભારતીય પ્રદેશો પર ગેરકાયદેસર રીતે કબજો કરવાનું ચાલુ રાખે છે, જેને તેણે ખાલી કરવું જ જોઈએ.
ભારતે એવો પણ આરોપ લગાવ્યો હતો કે ગંભીર માનવાધિકાર ઉલ્લંઘન, રાજકીય દમન, આર્થિક શોષણ અને નાગરિક સ્વતંત્રતાનો ઇનકાર જેવા મુદ્દાઓ પાકિસ્તાન કબજા હેઠળના પ્રદેશોમાં ચાલુ રહે છે. વિદેશ મંત્રાલય અનુસાર ચૂંટણી યોજવા જેવા પગલાં પાકિસ્તાન દ્વારા આ મૂળભૂત મુદ્દાઓ પરથી ધ્યાન હટાવવાના પ્રયાસો છે પરંતુ તે જમીની વાસ્તવિકતાને બદલી શકતા નથી.
