છેલ્લી હોમ મેચમાં પણ મેદાનમાં નહીં ઉતર્યા ‘થાલા’, કેપ્ટન ઋતુરાજે આપ્યું મોટું અપડેટ:ચેન્નાઈના ચાહકોને ફરી નિરાશા, એમએસ ધોનીની ફિટનેસને લઈને ચર્ચાઓ તેજ
ઈન્ડિયન પ્રીમિયર લીગ (IPL) 2026માં ચેન્નાઈ સુપર કિંગ્સ (CSK)ના ચાહકો માટે ફરી એકવાર નિરાશાજનક સમાચાર સામે આવ્યા છે. ટીમના દિગ્ગજ ખેલાડી અને પૂર્વ કેપ્ટન MS Dhoni છેલ્લી હોમ મેચમાં પણ મેદાનમાં જોવા મળ્યા નહોતા. ચેન્નાઈના એમ.એ. ચિદમ્બરમ સ્ટેડિયમમાં રમાયેલી મહત્વપૂર્ણ મેચ પહેલાં જ ધોનીની વાપસી અંગે ભારે ઉત્સાહ હતો, પરંતુ મેચ શરૂ થતાં જ ચાહકોની આશા તૂટી ગઈ હતી.
CSKના કેપ્ટન Ruturaj Gaikwad એ ટોસ દરમિયાન ધોનીની ગેરહાજરી અંગે મહત્વપૂર્ણ માહિતી આપી હતી. ઋતુરાજે જણાવ્યું કે ધોની હજુ સંપૂર્ણ રીતે ફિટ નથી અને ટીમ મેનેજમેન્ટ કોઈપણ પ્રકારનો જોખમ લેવા માંગતું નથી. તેમણે કહ્યું કે ધોનીની સ્થિતિ પર સતત નજર રાખવામાં આવી રહી છે અને તબીબી ટીમ તેમની રિકવરી પર કામ કરી રહી છે. ધોનીને લઈને છેલ્લા કેટલાક દિવસોથી સોશિયલ મીડિયા પર ભારે ચર્ચા ચાલી રહી હતી. ચાહકોને આશા હતી કે છેલ્લી હોમ મેચમાં “થાલા” ચોક્કસ મેદાનમાં ઉતરશે અને ચેન્નાઈના દર્શકોને ખાસ ગિફ્ટ આપશે. સ્ટેડિયમમાં હજારો ચાહકો ધોનીની જર્સી પહેરી પહોંચ્યા હતા, પરંતુ જ્યારે ટીમ લિસ્ટ જાહેર થયું ત્યારે તેમાં ધોનીનું નામ ન હોવાથી સ્ટેડિયમમાં નિરાશાનું માહોલ જોવા મળ્યો હતો.
અહેવાલો મુજબ ધોનીને પગની સમસ્યા અને ફિટનેસ સંબંધિત તકલીફોનો સામનો કરવો પડી રહ્યો છે. ટીમ મેનેજમેન્ટ આગામી મહત્વપૂર્ણ મેચોને ધ્યાનમાં રાખીને તેમને સંપૂર્ણ આરામ આપી રહ્યું છે. સૂત્રો મુજબ જો ધોની સંપૂર્ણ રીતે ફિટ થશે તો પ્લેઓફ અથવા આગામી મહત્વપૂર્ણ મેચોમાં તેમની વાપસી થઈ શકે છે. CSK માટે આ સીઝન મિશ્ર પરિણામો વાળી રહી છે. કેટલીક મેચોમાં ટીમે શાનદાર પ્રદર્શન કર્યું છે તો કેટલીક મેચોમાં ટીમને હારનો સામનો કરવો પડ્યો છે. જેથી આવી સ્થિતિમાં ધોની જેવી અનુભવી વ્યક્તિની ગેરહાજરી ટીમ માટે મોટું નુકસાન માનવામાં આવી રહી છે. મેદાન પર ધોનીની હાજરી માત્ર રમત સુધી સીમિત નથી, પરંતુ યુવા ખેલાડીઓ માટે પણ તેઓ પ્રેરણાસ્ત્રોત માનવામાં આવે છે.
ચેન્નાઈના ચાહકોમાં હજુ પણ આશા જીવંત છે કે ધોની ટૂંક સમયમાં મેદાનમાં પરત ફરશે. સોશિયલ મીડિયા પર “Come Back Thala” અને “We Miss Dhoni” જેવા હેશટેગ ટ્રેન્ડ થઈ રહ્યા છે. ક્રિકેટ ચાહકો હવે આગામી મેચ તરફ નજર રાખી રહ્યા છે કે જ્યાં કદાચ ધોની ફરી પીળી જર્સીમાં મેદાન પર જોવા મળી શકે. IPLના ઈતિહાસમાં MS Dhoni નું નામ સૌથી સફળ કેપ્ટનોમાં લેવામાં આવે છે. તેમની આગેવાનીમાં Chennai Super Kings એ અનેક વખત IPL ટ્રોફી જીતી છે, કરોડો ચાહકોના દિલમાં ખાસ સ્થાન બનાવ્યું છે. તેથી જ ધોનીની દરેક મેચ અને તેમની હાજરી ચાહકો માટે ખાસ મહત્વ ધરાવે છે.
