શહેરના પરવત ગામ વિસ્તારમાં આવેલી ટેક્સટાઈલ માર્કેટની પાંચમા માળની દુકાનમાં આજે શુક્રવારે વહેલી સવારે આગ ભડકી ઉઠી હતી. તેના લીધે દુકાનમાં મુકેલા કાપડનો જથ્થો બળીને ખાક થયો હતો. આગની જાણ થતા ફાયર બ્રિગેડ ઘટના સ્થળે દોડી ગયું હતું અને ભારે મહેનત બાદ આગને કાબુમાં લીધી હતી.
ટેક્સટાઇલ હબ ગણાતા વિસ્તારમાં આજે સવારે ભીષણ આગનો બનાવ સામે આવતા ફરી એકવાર સુરત આગની ચપેટમાં આવી ગયું છે. પરવત ગામ વિસ્તારમાં આવેલી અવધ ઋતુરાજ માર્કેટમાં સવારે આગ લાગી હતી, જેના કારણે સમગ્ર માર્કેટ વિસ્તારમાં અફરા-તફરી મચી ગઈ હતી. ઋતુરાજ માર્કેટના પાંચમા માળે આવેલી દુકાન નંબર 3065થી 3075માં પીન્કેશ ટેક્સટાઈલમાં આગ લાગી હતી. સવારે પોણા સાત વાગ્યે આગ લાગ્યાની માહિતી મળતાં ફાયરબ્રિગેડે આગ પર કાબુ મેળવ્યો હતો.
પ્રાથમિક માહિતી મુજબ આગ બિલ્ડિંગના ઉપરના પાંચમાં માળેથી ફાટી નીકળી હતી. ત્યાં સ્થિત દુકાનમાં કાપડના ઢગલા પર તરત જ આગને પકડી લીધી હતી, જેના કારણે આગે જલ્દી જ વિકરાળ સ્વરૂપ ધારણ કર્યું હતું. આગ એટલી વિકરાળ હતી કે દૂર દૂર સુધી ધુમાડાના ગોટાઓ દેખાયા હતા. ફાયર બ્રિગેડની અનેક ટીમો તાત્કાલિક ઘટના સ્થળે પહોંચી ગઈ હતી.
ટેક્સટાઇલ માર્કેટમાં આગ લાગી હોવાની જાણ ફાયર વિભાગને કરવામાં આવતા આસપાસના રહેલા આઠથી વધુ ફાઈર સ્ટેશનની 20થી વધુ ગાડીઓ અને ફાયર બ્રિગેડની ટીમો તાત્કાલિક ઘટનાસ્થળે પહોંચી ગઈ હતી. ત્યારબાદ પાણીનો મારો ચલાવીને એક કલાકની જાહેરત બાદ આગ પર કાબુ મેળવવામાં સફળતા મેળવી હતી. દુકાનમાં કોઈ હાજર ન હોવાથી કોઈપણ પ્રકારની જાનહાનિ થવા પામી ન હતી. આ સાથે જ ફાયર વિભાગે આગને આગળ પ્રસરતી અટકાવતા અન્ય વેપારીઓએ પણ રાહતનો શ્વાસ લીધો હતો.
આગ લાગવાનું સાચું કારણ હજી સુધી બહાર આવ્યું નથી પરંતુ પ્રાથમિક તબક્કે વીજ શોર્ટ સર્કિટને કારણ ગણાવવામાં આવી રહ્યું છે. ઘટનાસ્થળે મોટી સંખ્યામાં લોકો ભેગા થઈ ગયા હતા પરંતુ પોલીસ દ્વારા જગ્યા ખાલી કરાવી લોકોએ સલામત અંતર રાખવા સૂચના આપવામાં આવી છે. સ્થાનિક પોલીસ, ફાયર વિભાગ અને મ્યુનિસિપલ કર્મચારીઓ ઘટના સ્થળે હાજર રહી કામગીરીને જહેમતપૂર્વક સંચાલિત કરી હતી.
