ગુજરાતમિત્ર દ્વારા ક્રિકેટ ફોર કોમ્યુનલ હાર્મની થીમ હેઠળ આયોજિત 100 બોલ ઇન્ટર કોમ્યુનિટી ક્રિકેટ લીગની આજથી શરૂઆત થઇ હતી. જેમાં પ્રથમ મેચ પટેલ સ્પોર્ટસ એસોસિએશન કોળી પટેલ્સ અને ગુરૂબાની ઇલેવન પંજાબીસ વચ્ચે રમાઇ હતી. પટેલ સ્પોર્ટસે પ્રથમ દાવ લઇને મુકેલા 159 રનના ટાર્ગેટ સામે ગુરૂબાની ઇલેવન પંજાબીસ 100 બોલમાં 5 વિકેટે 120 રન સુધી જ પહોંચી શકતાં પટેલ સ્પોર્ટસ એસોસિએશનનો 38 રને વિજય થયો હતો.
ગુરૂબાની ઇલેવન પંજાબીસે ટોસ જીતીને પ્રથમ ફિલ્ડીંગ કરવાનો નિર્ણય લીધો હતો. પટેલ સ્પોર્ટસ એસોસિએશનની શરૂઆત ખરાબ રહી હતી અને તેમણે 22 ઓવરમાં જ 27 રનમાં 3 વિકેટ ગુમાવી દીધી હતી. જો કે તે પછી જેનિશ પટેલ અને ડેનિસ પટેલે 23 બોલમાં 44 રનની ભાગીદારી કરીને ટીમને મુશ્કેલીમાંથી બહાર કાઢી હતી. ડેનિશ 12 બોલમાં 17 રન કરીને આઉટ થયો હતો. જેનિશ 24 બોલમાં 39 રન કરીને આઉટ થયો તે પછી તુષાર પટેલે 29 બોલમાં 6 ચોગ્ગાની મદદથી 43 રન બનાવીને ટીમને 100 બોલમાં 9 વિકેટે 158 રન સુધી લઇ ગયો હતો. 159 રનના લક્ષ્યાંક સામે પટેલ સ્પોર્ટસ એસોસિએશનના બોલરોની કરકસર યુક્ત બોલિંગને કારણે ગુરૂબાની ઇલેવન પંજાબીસ 100 બોલમાં 5 વિકેટે માત્ર 120 રન સુધી જ પહોંચી શકી હતી.
