નવી દિલ્હી: અમેરિકાના રાષ્ટ્રપતિ જો બિડેને (AmericanPresidentJoBiden) ઈઝરાયેલ અને હમાસ વચ્ચેના યુદ્ધને (IsraelHamasWar) લઈને મોટો દાવો કર્યો છે. જો બિડેને કહ્યું કે ભારતીય મિડલ ઈસ્ટ યુરોપ કોરિડોરની ((IndiaMiddleEastEuropeCorridor) જાહેરાત તાજેતરમાં નવી દિલ્હીમાં જી-20 સમિટ (G20Summit) દરમિયાન કરવામાં આવી હતી. હું માનું છું કે આ જાહેરાત હમાસ દ્વારા ઇઝરાયેલ પર આતંકવાદી હુમલાનું (TerroristAttack) કારણ છે.
યુએસ પ્રમુખ જો બિડેને જણાવ્યું હતું કે તેમનો દેશ સાઉદી અરેબિયાને યુરોપ સાથે જોડતો રેલ-રોડ પ્રોજેક્ટ સહિત ઈન્ફ્રાસ્ટ્રક્ચર પ્રોજેક્ટ્સના નેટવર્ક દ્વારા ચીનના બેલ્ટ એન્ડ રોડ ઈનિશિએટિવ (BRI)નો સામનો કરવા માટે G7 સભ્ય દેશો સાથે કામ કરી રહ્યો છે.
મને ખાતરી છે કે આ હમાસના હુમલાનું એક કારણ હતું. તેમણે વધુમાં કહ્યું મારી પાસે આ દાવાનો કોઈ પુરાવો નથી, પરંતુ મારો અંતરાત્મા મને કહે છે કે હમાસે ઇઝરાયેલ માટે પ્રાદેશિક એકીકરણ તરફના તેના કાર્યને કારણે આ હુમલો કર્યો છે. પરંતુ અમે તે કામ છોડીશું નહીં.
જણાવી દઈએ કે, ગઈ તા. 7 ઓક્ટોબરે હમાસે ઈઝરાયેલ પર હુમલો કર્યો હતો. આ હુમલામાં 1400 લોકોના મોત થયા છે. અમેરિકા અને બ્રિટન સહિત ઘણા દેશોના નાગરિકો પણ તેમાં સામેલ છે. આ હુમલા પછી બીજી વખત, બિડેને હમાસના હુમલાના સંભવિત કારણો પૈકી એક તરીકે ભારતીય મધ્ય પૂર્વ યુરોપ કોરિડોરનો ઉલ્લેખ કર્યો છે.
સપ્ટેમ્બરમાં ભારતમાં જી-20 સમિટિમાં કોરિડોરની જાહેરાત કરાઈ હતી
સપ્ટેમ્બરમાં ભારતમાં જી-20 સમિટનું આયોજન કરવામાં આવ્યું હતું. બિડેન, ઋષિ સુનક સહિત વિશ્વભરના ઘણા મોટા નેતાઓએ તેમાં ભાગ લીધો હતો. આ સમિટમાં પીએમ મોદી, જો બિડેન સહિત ઘણા નેતાઓએ મહત્વાકાંક્ષી ભારતીય મધ્ય પૂર્વ યુરોપ કોરિડોરના નિર્માણની જાહેરાત કરી હતી.
ભારત-મધ્ય પૂર્વ-યુરોપ આર્થિક કોરિડોર શું છે?
ભારત, યુરોપિયન યુનિયન, અમેરિકા અને સાઉદી અરેબિયા. આ ચાર દેશો એક મેગા પ્રોજેક્ટ પર સાથે મળીને કામ કરી રહ્યા છે. તેનું નામ ઈન્ડિયા-મિડલ ઈસ્ટ-યુરોપ ઈકોનોમિક કોરિડોર એટલે કે IMEC છે. આને ઐતિહાસિક સમજૂતી કહેવામાં આવી રહી છે. આ પ્રોજેક્ટ માટેના એમઓયુ પર 9 સપ્ટેમ્બરના રોજ હસ્તાક્ષર કરવામાં આવ્યા હતા. ભારત સિવાય હસ્તાક્ષર કરનારા દેશોમાં અમેરિકા, સાઉદી અરેબિયા, સંયુક્ત આરબ અમીરાત, યુરોપિયન યુનિયન, ઈટાલી, ફ્રાન્સ અને જર્મનીનો સમાવેશ થાય છે.
આ કોરિડોરના નિર્માણ બાદ ભારત રેલ અને જહાજ દ્વારા યુરોપ પહોંચી શકશે. આ કોરિડોરને ચીનના બેલ્ટ એન્ડ રોડ ઇનિશિયેટિવ (BRI)નો જવાબ માનવામાં આવી રહ્યો છે. આ કોરિડોરના બે ભાગ હશે. પહેલો- ઈસ્ટર્ન કોરિડોર, જે ભારતને ગલ્ફ દેશો સાથે જોડશે. બીજો- નોર્ધન કોરિડોર, જે ગલ્ફ દેશોને યુરોપ સાથે જોડશે. રેલ્વે લાઇનની સાથે, આ કોરિડોરમાં વીજળીની કેબલ, હાઇડ્રોજન પાઇપલાઇન અને હાઇ-સ્પીડ ડેટા કેબલ પણ હશે.
