સમંથા રુથ પ્રભુ હમણાં મુંબઇના ફિલ્મ જગતમાં ખૂબ ચર્ચામાં રહે છે. પતિ સાથે છૂટાછેડા લેવા કાંઇ સારી વાત નથી હોતી, પણ સમૅન્થાએ ગયા વર્ષે ઓકટોબરમાં નાગ ચૈતન્ય સાથે છૂટાછેડા લીધા પછી જ હિન્દી ફિલ્મ જગતમાં ચર્ચાવા માંડી. એ છૂટાછેડા પછી સમૅન્થા એ હિન્દી ફિલ્મ અને વેબ સિરીઝનો રસ્તો ય પસંદ કર્યો. અફવા તો એવી ય આવી કે તે હવે મુંબઇ જ વસી જવાની છે. સમૅન્થા જો કે હજુ સાઉથની ફિલ્મોમાં કામ કરે છે, પણ હમણાં કરણ જોહરના શોમાં તે આવી ત્યારે સાથે અક્ષયકુમાર હતો. તમે એવું કહી શકો કે હિન્દી ફિલ્મ જગતમાં તેને કરણ જોહર અને અક્ષયકુમાર લોન્ચ કરી રહ્યા છે.
અલબત્ત, કરણે હજુ તેની સાથે કોઇ ફિલ્મ બનાવવાની જાહેરાત નથી કરી પણ હા, તાપસી પન્નુ ફિલ્મ નિર્માણ ક્ષેત્રે પ્રવેશી રહી છે અને તેની પહેલી ફિલ્મમાં સમૅન્થા ને મુખ્ય ભૂમિકા આપી છે. સંભળાય તો એવું ય રહ્યું છે કે એટલીની એ ફિલ્મ જેમાં શાહરૂખ ખાન કામ કરી રહ્યો છે અને સાઉથની જ નયનતારા હીરોઇન તરીકે આવવાની છે તે હવે સમૅન્થા ના કારણે ‘હતી’ થઇ જશે. શાહરૂખ સાથે હવે તેને લેવાનું એટલે નક્કી કર્યાનું કહેવાય છે. સમૅન્થા તેલુગુમાં પચાસેક જેટલી ફિલ્મોમાં કામ કરી ચૂકી છે અને અત્યારે પણ બીજી 6 ફિલ્મોમાં કામ કરી રહી છે.
હિન્દી ફિલ્મના પ્રેક્ષકોએ તેને ‘પુષ્પા ધ રાઇઝ’ના એક ગીતમાં ડાન્સ કરતી જોઇ છે અને ‘ધ ફેમિલી મેન’માં મનોજ વાજપેયી સાથે રાજી તરીકે દેખાય હતી. સમજો કે તે તેના છૂટાછેડાને કારણે ચર્ચામાં આવી કે તરત આ વેબ સિરીઝમાં આવી ગઇ હતી. બાકી આમ તો તેની 13 જેટલી ફિલ્મો હિન્દીમાં ડબ્ડ થઇને રજૂ થઇ ચૂકી છે. એટલે દક્ષિણની ડબ્ડ ફિલ્મો જોનારા માટે તો સમૅન્થા જરાય નવી નથી. હજુ વધુ ઓળખ આપવી હોય તો કહી શકાય કે 2012માં પ્રતિક બબ્બર – અમી જેકસન અભિનીત ‘એક દીવાના થા’ ફિલ્મ આવી હતી જે સમૅન્થા ની ‘યે માયા ચેસાવે’ની અધિકૃત રિમેક હતી અને હિન્દી રિમેકમાં સમૅન્થા એ નાની ભૂમિકા ય કરી હતી.
‘સામ જામ’ નામની TV મુવીનું નિર્માણ – દિગ્દર્શન કરી ચૂકેલી તે જરાય પાછી પડે તેમ નથી. ડાયવોર્સ પછી નાગ ચૈતન્યના રોમાન્સની ચર્ચા અત્યારે ચાલે છે ને શોભિતા ધૂલીપાલા સાથે ફરી રહ્યાના સમાચાર છે, પણ તે અત્યારે બીજા મેરેજ કે રોમાન્સના મૂડમાં નથી. કારણ કે તે કારકિર્દીમાં સ્વતંત્ર નિર્ણય લઇને આગળ વધવા માંગે છે. કોઇ પુરુષ જો જીવનમાં પ્રવેશે તો તેનું ધાર્યું કરાવે છે એવું તે સમજી ગઇ છે. હમણાં રોમાન્સથી તે વેકેશન ઇચ્છે છે. કારકિર્દીમાં ગોઠવાવું હોય તો એ જરૂરી પણ છે. અત્યારે હિન્દી ફિલ્મોમાં સાઉથની રશ્મિકા મંદાના ગોઠવાય રહી છે અને તેની સામે આ સમૅન્થા સ્પર્ધા ઉભી કરશે. આગે આગે દેખીયે હોતા હે કયા!! ••
