કારેલીબાગ નાગરવાડામાં હત્યાની કોશીશ તથા રાવપુરા એસએસજી હોસ્પીટલ ખાતે પૂર્વ કોર્પોરેટરના પુત્રની હત્યાના ગુનામાં વધુ વોન્ટેડ પૈકીના મુખ્ય સૂત્રધારના બે આરોપી ભાઈને એસઓજીની ટીમે ઝડપી પાડી રાવપુરા પોલીસને સોપ્યા હતા. બંને ભાઈ સહિત હોસ્પિટલમાં દાખલ અન્ય આરોપી મળી ત્રણ જણાને કોર્ટમાં રજૂ કરીને પોલીસે દસ દિવસના રિમાન્ડની માંગણી કરતા કોર્ટે એક દિવસના રિમાન્ડ મંજૂર કર્યા છે.
તાજેતમાં નાગરવાડા મહેતાવાડીમાં ખુનની કોશીશ તથા રાવપુરા એસએસજી હોસ્પીટલ ખાતે પૂર્વ કોર્પોરેટર રમેશ રાજાના પુત્ર તપન પરમારને બાબર ખાન પઠાણે ચાકુના ગામ હારીને મોતને ઘાટ ઉતારવામાં આવ્યો હતો. જેમાં પોલીસે મુખ્ય આરોપી સહિત પાંચ લોકોની ધરપકડ કરી લીધી છે. જ્યારે અન્ય પાંચ એક આરોપી નાસ્તા ફરતા હોય પોલીસની વિવિધ ટીમો દ્વારા તેમની શોધખોળ હાથ ધરવામાં આવી હતી. દરમિયાન એસઓજી ટીમના માણસો વડોદરા શહેર વિસ્તારમાં પેટ્રોલીંગમાં હતા. દરમ્યાન બાતમી મળી હતી કે રાવપુરા પોલીસ સ્ટેશનના મર્ડરના ગુન્હામાં સંડોવાયેલા બાબર પઠાણના બંને ભાઇઓ મહેબુબ તથા સલમાન ઉર્ફે સોન પઠાણ થોડીવારમાં આજવા ચોકડી ખાતે આવનાર છે. જેના આધારે બાતમીવાળી જગ્યાએ એસઓજીની ટીમે વોચ ગોઠવી હતી. દરમિયાન આરોપીઓ મહેબુબ હબીબખાન પઠાણ તથા સલમાન ઉર્ફે સોનું હબીબખાન પઠાણ (બંને રહે. હરીજનવાસ, 10 નંબર સ્કુલની પાછળ, મહેતાવાડી પાછળ, નાગરવાડા, વડોદરા)ને ઝડપી પાડી રાવપુરા પોલીસને સુપ્રત કર્યા હતા. ત્યારે આજે 20 નવેમ્બર ના રોજ સવારે રાવપુરા પોલીસે મુખ્ય સૂત્રધાર ના બંને ભાઈ અને હોસ્પિટલમાં એડમિટ અન્ય એક આરોપી મળી ત્રણ જણાને કોર્ટમાં રજૂ કરીને દસ દિવસના રિમાન્ડની માંગણી કરી હતી. જોકે કોર્ટે એક જ દિવસના રિમાન્ડ મંજૂર કર્યા છે.
