ઘટનાના પગલે હોસ્પિટલમાં અફરાતફરી, સદનસીબે મોટી જાનહાનિ ટળી, ફાયર વિભાગની સમયસર કામગીરી
(પ્રતિનિધિ), વડોદરા. તા.19
વડોદરા શહેરના ગોરવા વિસ્તારમાં આવેલી ITI નજીકની આનંદ હોસ્પિટલમાં આજે અચાનક આગ ફાટી નીકળતા ભારે દોડધામ અને ગભરાટનો માહોલ સર્જાયો હતો. હોસ્પિટલના એક રૂમમાં રહેલા એર કન્ડિશનરમાં શોર્ટ સર્કિટ થવાને કારણે લાગેલી આ આગે થોડી જ વારમાં વિકરાળ સ્વરૂપ ધારણ કરી લીધું હતું. જોકે, ફાયર બ્રિગેડની ત્વરિત અને અસરકારક કામગીરીને પગલે 6 જેટલા દર્દીઓને સમયસર સુરક્ષિત બહાર કાઢી લેવામાં આવ્યા હતા, જેના કારણે એક મોટી હોનારત ટળી હતી.
પ્રાથમિક માહિતી અનુસાર, આજે બપોરે હોસ્પિટલના એક રૂમમાં રહેલા એર કન્ડિશનરમાં ટેકનિકલ ખામી સર્જાતા શોર્ટ સર્કિટ થઈ હતી. શોર્ટ સર્કિટથી નીકળેલા તણખાએ એસીના પ્લાસ્ટિકના ભાગો અને આસપાસની વસ્તુઓને ઝપેટમાં લેતા આગ ભભૂકી ઉઠી હતી. જોતજોતામાં ધુમાડાના ગોટેગોટા હોસ્પિટલના વોર્ડમાં ફેલાઈ જતા દર્દીઓ અને તેમના સ્વજનોમાં ફાળ પડી ગઈ હતી.
હોસ્પિટલમાં આગ લાગ્યાની જાણ થતા જ સ્ટાફ દ્વારા તાત્કાલિક વડોદરા ફાયર બ્રિગેડને જાણ કરવામાં આવી હતી. ઘટનાની ગંભીરતાને ધ્યાને લઈ ફાયર ફાઈટરો અને જવાનોનો કાફલો તાબડતોબ ઘટનાસ્થળે પહોંચી ગયો હતો. ધુમાડો પ્રસરે તે પહેલા જ ફાયર બ્રિગેડ અને સ્થાનિક સ્ટાફની મદદથી હોસ્પિટલમાં સારવાર લઈ રહેલા ૫ થી 6 દર્દીઓને તાત્કાલિક સુરક્ષિત સ્થળે ખસેડવામાં આવ્યા હતા. ફાયર જવાનોએ ભારે જહેમત બાદ આગ પર કાબૂ મેળવ્યો હતો.
ઘટના અંગે ફાયર બ્રિગેડના અધિકારીએ જણાવ્યું હતું કે, પ્રાથમિક દ્રષ્ટિએ શોર્ટ સર્કિટ આગનું કારણ હોવાનું જણાય છે. અમારી ટીમે સમયસર પહોંચીને આગને ફેલાતી અટકાવી હતી. બીજી તરફ, હોસ્પિટલના સંચાલકોએ જણાવ્યું હતું કે, તમામ દર્દીઓ સુરક્ષિત છે અને તેમને પ્રાથમિક સારવાર બાદ અન્ય હોસ્પિટલોમાં ખસેડવાની વ્યવસ્થા કરી દેવામાં આવી છે.
આ ઘટનાએ ફરી એકવાર વડોદરાની ખાનગી હોસ્પિટલોમાં ફાયર સેફ્ટીની સજ્જતા અને નિયમિત ઈલેક્ટ્રિકલ ઓડિટની જરૂરિયાત પર ગંભીર સવાલો ઉભા કર્યા છે. હોસ્પિટલ જેવા સંવેદનશીલ સ્થળોએ શોર્ટ સર્કિટ જેવી નાની ખામી પણ કેવી રીતે મોટી આફત બની શકે છે, તે આ ઘટના પરથી સ્પષ્ટ જણાય છે. હવે જોવાનું એ રહ્યું કે તંત્ર આ મામલે તપાસ કરી કોઈ કડક પગલાં લે છે કે કેમ.
