ભારતીય ક્રિકેટ સ્ટાર વિરાટ કોહલી ફરી એકવાર સોશિયલ મીડિયા પર ચર્ચામાં આવી ગયા છે, પરંતુ આ વખતે કારણ કોઈ મેચ કે રેકોર્ડ નથી, પણ એક લાઈક છે. તાજેતરમાં જર્મન મોડલ લિઝલાઝના ફોટોને વિરાટે લાઈક કર્યું હતું, જેના સ્ક્રીનશોટ સોશિયલ મીડિયા પર ઝડપથી વાઈરલ થઈ ગયા. આ ઘટનાએ ફેન્સ વચ્ચે ભારે ચર્ચા જગાવી અને ઘણા લોકો રમુજી કોમેન્ટ્સ પણ કરવા લાગ્યા. આ સમગ્ર મામલે હવે જર્મન મોડલ લિઝલાઝે પોતાનો પ્રતિસાદ આપ્યો છે. એક ઇન્ટરવ્યૂમાં તેણે જણાવ્યું કે તેને આ વિશે મીડિયા દ્વારા જ ખબર પડી. તેણે કહ્યું કે, હું સવારે ઉઠી તો જોયું કે હું સમાચારનો ભાગ બની ગઈ છું. મને ખબર નહોતી કે વિરાટે ક્યારે મારા ફોટોને લાઈક કર્યો હતો. લિઝલાઝે ઉમેર્યું કે, લોકો અલગ-અલગ પ્લેટફોર્મ પરથી તેને આ સમાચાર મોકલી રહ્યા હતા અને તેને ઘણા મેસેજ પણ મળ્યા.
લિઝલાઝે પોતાના ભારતના અનુભવો વિશે પણ વાત કરી. તેણે કહ્યું કે, જ્યારે તે પ્રથમ વખત ભારતમાં આવી ત્યારે તેને ક્રિકેટ વિશે વધુ જાણકારી મળી. તેણે દક્ષિણ ભારત, ગોવા, મુંબઈ, ચેન્નાઈ અને હૈદરાબાદ જેવા શહેરોમાં સમય વિતાવ્યો હતો. IPL દરમિયાન તે બેંગલુરુમાં મિત્રો સાથે મેચ જોવા જતી હતી અને ત્યારથી જ રોયલ ચેલેન્જર્સ બેંગલુરુ (RCB)ની ફેન બની ગઈ. આ દરમિયાન જ તેણે વિરાટ કોહલીને રમતા જોયા અને તેને પસંદ કરવા લાગી. જ્યારે વિરાટે પછીથી આ લાઈક હટાવી દીધી, ત્યારે લિઝલાઝે કહ્યું કે તેને વિરાટ માટે થોડું દુઃખ થયું. “મને ખુશી થઈ હતી કે તેણે મારી પોસ્ટ લાઈક કરી, પરંતુ આટલી મોટી વાત કેવી રીતે બની ગઈ તે સમજાયું નહીં. કદાચ તેમનો એવો ઈરાદો નહોતો, છતાં હું તેના સપોર્ટની પ્રશંસા કરું છું,” એમ તેણીએ જણાવ્યું.
આ ઘટના પછી લિઝલાઝ માટે નવા અવસર પણ ખુલ્યા છે. તેણે દાવો કર્યો કે તેને હવે ઘણા કામના ઑફર્સ મળી રહ્યા છે, પરંતુ તે હજી વિચારીને નિર્ણય લેવા માગે છે. લિઝલાઝે કહ્યું કે તે મ્યુઝિક અને વ્લોગિંગના વ્યવયાય અંગે સિરીયસ છે અને ભવિષ્યમાં ફરી ભારત આવવાની પણ ઈચ્છા રાખે છે. આ સમગ્ર મામલો ત્યારે શરૂ થયો જ્યારે ફોટોગ્રાફર અદ્વૈત વૈદ્યએ લિઝલાઝના ફોટો પર વિરાટના લાઈકનો સ્ક્રીનશોટ શેર કર્યો. ત્યારબાદ આ પોસ્ટ વાયરલ થઈ અને ચર્ચાનો વિષય બની ગઈ. ઉલ્લેખનીય છે કે આ પહેલી વાર નથી જ્યારે વિરાટના લાઈકને લઈને ચર્ચા થઈ હોય. અગાઉ પણ એક્ટ્રેસ અવનીત કૌરના ફોટો પર લાઈકને કારણે વિવાદ થયો હતો. આ ઘટના બતાવે છે કે સોશિયલ મીડિયા પર નાના મુદ્દા પણ કેટલી ઝડપથી મોટા બની જાય છે અને લોકો તેને કેટલું ગંભીરતાથી લે છે.
