વર્લ્ડ ટેસ્ટ ચેમ્પિયનશિપ 2025-27માં ભારતીય ટીમની શરૂઆત અપેક્ષા મુજબ રહી નથી. અત્યાર સુધીના પ્રદર્શન બાદ ટીમ ઈન્ડિયા પોઈન્ટ્સ ટેબલમાં 48.15 PCT સાથે 5મા સ્થાન પર છે. અગાઉ ભારત 2 વખત WTC ફાઇનલ સુધી પહોંચ્યું હતું, પરંતુ બંને વખત ટ્રોફી જીતવામાં નિષ્ફળ રહ્યું હતું. હવે ટીમનું લક્ષ્ય ફરી એકવાર ફાઇનલમાં સ્થાન મેળવવાનું છે, પરંતુ તેના માટે આગળનો રસ્તો સરળ નથી.
હાલ શું છે ટીમ ઈન્ડિયાની સ્થિતિ?
અત્યાર સુધી ભારત 9 ટેસ્ટ મેચ રમ્યુ છે, જેમાંથી 4 જીત મેળવી છે. બાકીના મેચના મળેલા પરિણામોને કારણે ટીમ હાલમાં ટોપ-2થી દૂર છે. WTCના નિયમ મુજબ અંતે સૌથી વધુ PCT ધરાવતી ટોચની 2 ટીમો ફાઇનલ માટે ક્વોલિફાય થાય છે.
ફાઇનલમાં પહોંચવા કેટલી મેચ જીતવી જરૂરી?
ભારતીય ટીમને હવે આ WTC સાયકલમાં 9 ટેસ્ટ મેચ રમવાના બાકી છે.
- તમામ 9માંથી 9 મેચ જીતે, તો ભારત લગભગ નિશ્ચિત રીતે ફાઇનલમાં પહોંચશે.
- જો 9માંથી 8 જીત મળે, તો પણ ફાઇનલમાં પહોંચવાની મજબૂત શક્યતા રહેશે.
- પરંતુ જો ભારત 2 અથવા 3 મેચ હારી જાય, તો પછી ફાઇનલનું સમીકરણ માત્ર પોતાના હાથમાં નહીં રહે. ત્યારબાદ અન્ય ટીમોના પરિણામો પર પણ નિર્ભર રહેવું પડશે.
શા માટે મુશ્કેલ છે ગણિત?
WTCમાં માત્ર જીતની સંખ્યા નહીં, પરંતુ PCT (Percentage of Points)ના આધારે ક્રમ નક્કી થાય છે. એટલે દરેક જીત અને હારની સીધી અસર પોઈન્ટ્સ ટકાવારી પર પડે છે. જો ઓસ્ટ્રેલિયા, ઈંગ્લેન્ડ, દક્ષિણ આફ્રિકા અથવા અન્ય સ્પર્ધાત્મક ટીમો સતત જીતતી રહેશે, તો ભારત માટે ભૂલની કોઈ ખાસ જગ્યા નહીં રહે.
ભારત માટે હવે દરેક ટેસ્ટ મહત્વની
ભારતીય ટીમ જો સતત જીતનો સિલસિલો જાળવી રાખે, તો ત્રીજી વખત WTC ફાઇનલમાં પહોંચવાનું સપનું સાકાર થઈ શકે છે. પરંતુ હવે દરેક ટેસ્ટ મેચ ‘કરો યા મરો’ જેવી બની ગઈ છે. એકાદ હાર પણ ફાઇનલની રેસને મુશ્કેલ બનાવી શકે છે અને પછી ભારતને પોતાના પરિણામો ઉપરાંત અન્ય ટીમોના પ્રદર્શનની પણ રાહ જોવી પડશે.
