સુરત: (Surat) સુરતમાં ફરી ગ્રીષ્મા કાંડ જેવો હત્યાકાંડ (Murder) સર્જાતા સહેજમાં રહી ગયો હોવાનો બનાવ પુણાની એક હોટેલમાં બન્યો હોવાનું સામે આવ્યું છે. પુણા વિસ્તારની OYO હોટલના રૂમમાં યુવકે યુવતીના ગળા અને પેટના ભાગે ચપ્પુના ઘા મારતા ચર્ચાનો વિષય બન્યો છે. ઈજાગ્રસ્ત હાલતમાં યુવતીને સારવાર માટે હોસ્પિટલમાં ખસેડવામાં આવી છે. જ્યારે યુવકને પોલીસે ઝડપી લઈને તપાસ હાથ ધરી છે.
સ્થાનિક લોકોએ જણાવ્યું હતું કે ઘટના હોટલના રૂમમાં બની હતી. યુવતી અને યુવક હોટેલમાં ગયાં બાદ અચાનક બુમાબુમ થઈ જતા યુવતી લોહી લુહાણ હાલતમાં મળી આવી હતી. હોટેલનો સ્ટાફ દોડી જતા યુવતીના ગળાના ભાગે ચપ્પુના ઘા માર્યા હોવાનું સામે આવતા યુવતીને તાત્કાલિક હોસ્પિટલમાં સારવાર અર્થે ખસેડવામાં આવી હતી. જ્યારે યુવકને લોકોએ ઝડપી પાડી પોલીસના હવાલે કરી દીધો હતો.
પોલીસની પ્રાથમિક પૂછપરછમાં યુવકે કહ્યું કે યુવતીએ જાતે જ પોતાના ગળા પર ચપ્પુ મારી દીધું હતું. જો કે હાલ પોલીસે યુવકને ઝડપી લઈને વધુ તપાસ હાથ ધરી છે. યુવક અને યુવતી વચ્ચે શું સંબંધ હતાં તથા શા માટે હુમલો કર્યો કે પછી યુવતીએ શા માટે પોતાનું ગળું કાપવા પ્રયાસ કર્યો તે અંગે પોલીસે વધુ તપાસ હાથ ધરી છે.
સૂત્રો ના જણાવ્યા અનુસાર ડી.આર વર્લ્ડની ઓયો હોટલમા નીલેશ સોડાગર નામના મોચી યુવકે યુવતીને ચપ્પુના ધા માર્યા હોવાનું સામે આવ્યું છે. હાલ યુવતી હોસ્પિટલમાં છે અને યુવકની પુણા પોલીસે ધરપકડ કરી છે. જોકે હજી તપાસ ચાલી રહી છે. તપાસ બાદ જ ઘટનાની સમગ્ર હકીકત સામે આવશે તેવું પોલીસે જણાવ્યું હતું.
યુવતીને અન્ય યુવાન સાથે જોઇ જતા યુવાને યુવતીને પતાવવાનો પ્રયાસ કર્યો હોવાની પોલીસને આશંકા
ઝોન ડીસીપી ભકિત ઠાકરે જણાવ્યુંકે યુવતીને અન્ય યુવક સાથે પ્રેમ હતો. તે વિશે નિલેશને માલૂમ પડયુ હતુ. તેથી તેણે ઉશ્કેરાઇને ચાકૂ હૂલાવી દીધુ હતુ. દરમિયાન યુવતીની હાલત હાલમાં ગંભીર છે. પરંતુ વીસ વર્ષીય યુવતીની બહેન મારફત હાલમાં આ વિગત પોલીસને જાણવા મળી છે. પોલીસ આ મામલે વીસ વર્ષીય યુવતી ભાનમાં આવ્યા બાદ આ મામલે વધારે કહેવાની વાત કરી છે. નિલેશની વાત પર પોલીસ હાલમાં વિશ્વાસ કરી રહી નથી. નિલેશ યુવતીને અન્ય યુવાન સાથે જોઇ જતા તેણે ઉશ્કેરાઇને આ ચાકૂ હૂલાવ્યુ હોવાના મામલે પોલીસ હાલમાં તપાસ કરી રહી છે.
