દાહોદ: દાહોદ જિલ્લાના લીમખેડા તાલુકામાં વાહન ચાલકોની ગફલતના કારણે સર્જાયેલ માર્ગ અકસ્માતના બે બનાવોમાં બે જણાના મોતને પગલે પરિવારજનોમાં માતમ છવાઈ ગયો હતો. બંન્ને બનાવોને પગલે જે તે પોલીસ મથકે ફરિયાદ નોંધાયાનું જાણવા મળે છે. માર્ગ અકસ્માતનો પ્રથમ બનાવ લીમખેડા તાલુકાના વલુન્ડી ગામે બનવા પામ્યો હતો. જેમાં ગત તા.૨૦મી ઓક્ટોમ્બરના રોજ એક ટ્રકના ચાલકે પોતાના કબજાની ટ્રક પુરઝડપે અને ગફલત ભરી રીતે હંકારી પસાર થઈ રહ્યો હતો.
આ દરમ્યાન ટ્રકની વધુ પડતી ઝડપને કારણે ટ્રક પરના સ્ટેરીંગ પરનો કાબુ ગુમાવી બેસતાં ટ્રક હાઈવેની રેલીંગ તોડી ખાડામાં ટ્રક ઉતારી દેતાં અંદર સવાર મુકેશભાઈ રસલાભાઈ ડામોરને શરીરે તેમજ માથાના ભાગે ગંભીર જીવલેણ ઈજાઓ થતાં તેમનું ઘટના સ્થળ પર મોત નીપજ્યું હતું. આ સંબંધે કાળી મહુડી ગામે જગા ફળિયામાં રહેતાં વરસીંગભાઈ નારજીભાઈ ડામોરે લીમખેડા પોલીસ મથકે ફરિયાદ નોંધાવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.
માર્ગ અકસ્માતનો બીજાે બનાવ લીમખેડા તાલુકાના પાલ્લી ગામે બનવા પામ્યો હતો. જેમાં ગત ગાડીના ચાલકે પોતાના કબજાની ફોર વ્હીલર ગાડી પુરઝડપે અને ગફલત ભરી રીતે હંકારી લાવી ત્યાંથી પસાર થઈ રહેલ મોટરસાઈકલના ચાલક જવેરસીંગ સદીયાભાઈ પટેલને અડફેટમાં લેતાં જવેરસીંગભાઈ મોટરસાઈકલ સાથે જમીન પર ફંગોેળાયાં હતાં. જેને પગલે તેઓને શરીરે તેમજ માથાના ભાગે ગંભીર જીવલેણ ઈજાઓ થતાં નજીકના દવાખાને સારવાર અર્થે ખસેડવામાં આવ્યાં હતાં. જ્યા સારવાર દરમ્યાન જવેરભાઈનું મોત નીપજતાં આ સંબંધે પાણીયા ગામે ફેક્ટરી ફળિયામાં રહેતાં પર્વતભાઈ સદીયાભાઈ પટેલે લીમખેડા પોલીસ મથકે ફરિયાદ નોંધાવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.
