અભિનેત્રી અને સાંસદ કંગના રનૌત પોતાની આગામી ફિલ્મ ‘ભારત ભાગ્ય વિધાતા’ને લઈને ચર્ચામાં છે. આ ફિલ્મ 26/11 મુંબઈ આતંકી હુમલા દરમિયાન હોસ્પિટલોમાં ફરજ બજાવનારા નર્સ, વોર્ડ બોય, સફાઈ કર્મચારીઓ અને અન્ય ફ્રન્ટલાઇન હેલ્થ વર્કર્સની બહાદુરીને સમર્પિત છે. ફિલ્મના પ્રચાર દરમિયાન કંગનાએ કેટલીક એવી હકીકતો શેર કરી છે,જેને સાંભળીને લોકો ભાવુક બની રહ્યા છે.
કંગનાના જણાવ્યા અનુસાર, 26 નવેમ્બર 2008ના મુંબઈ આતંકી હુમલા દરમિયાન કેટલાક હોસ્પિટલ સ્ટાફે પોતાની જિંદગીની પરવા કર્યા વિના દર્દીઓની સેવા ચાલુ રાખી હતી. ગોળીબારી અને ભયના માહોલ વચ્ચે પણ નર્સોએ હોસ્પિટલ છોડવાની જગ્યાએ દર્દીઓની સંભાળ રાખી અને અંદાજે 20 બાળકોની સુરક્ષિત ડિલિવરી પણ કરાવી હતી. આ અસાધારણ હિંમત અને ફરજ પ્રત્યેની નિષ્ઠાએ જ તેમને આ ફિલ્મ બનાવવાની પ્રેરણા આપી છે.
26/11 હુમલાના અનામી હીરો પર આધારિત ફિલ્મ
કંગનાની નવી ફિલ્મ ‘ભારત ભાગ્ય વિધાતા’ 26/11ના આતંકી હુમલા દરમિયાન સામે આવેલી એવી અનેક ઘટનાઓને દર્શાવે છે, જેના વિશે સામાન્ય લોકો બહુ ઓછું જાણે છે. જ્યારે સમગ્ર દેશ મુંબઈમાં થયેલા હુમલાના સમાચાર જોઈ રહ્યો હતો, ત્યારે કેટલીક હોસ્પિટલોમાં ડોક્ટરો, નર્સો અને અન્ય કર્મચારીઓ જીવના જોખમે પોતાની ફરજ બજાવી રહ્યા હતા.
ફિલ્મમાં ખાસ કરીને હોસ્પિટલ સ્ટાફની ભૂમિકા પર પ્રકાશ પાડવામાં આવ્યો છે. આતંકવાદીઓના હુમલાથી સર્જાયેલી અફરાતફરી વચ્ચે પણ અનેક નર્સોએ ગર્ભવતી મહિલાઓની સંભાળ રાખી હતી અને નવજાત બાળકોને સુરક્ષિત જન્મ અપાવ્યો હતો. આ ઘટનાને ફિલ્મમાં મહત્વપૂર્ણ સ્થાન આપવામાં આવ્યું છે.
“નર્સોને યોગ્ય સન્માન મળતું નથી” – કંગના
એક ઇન્ટરવ્યૂ દરમિયાન કંગના રનૌતે નર્સિંગ વ્યવસાય અંગે ખુલ્લેઆમ પોતાના વિચારો વ્યક્ત કર્યા. તેમણે જણાવ્યું કે સમાજમાં નર્સોનું યોગદાન અત્યંત મહત્વનું હોવા છતાં તેમને જે સન્માન મળવું જોઈએ તે મળતું નથી. કંગનાએ કહ્યું કે દર્દીઓની દેખભાળથી લઈને હોસ્પિટલની સમગ્ર વ્યવસ્થા જાળવવામાં નર્સોની ભૂમિકા ખૂબ જ અગત્યની હોય છે.તેમણે જણાવ્યું કે નર્સો દર્દીઓની સારવાર પ્રક્રિયામાં સૌથી નજીકથી જોડાયેલી હોય છે. દર્દીઓને દવાઓ આપવી, તેમની સ્થિતિ પર સતત નજર રાખવી,પરિવારજનોને માહિતી આપવી જરૂરી તબીબી સહાય ઉપલબ્ધ કરાવવી જેવી જવાબદારીઓ તેઓ નિભાવે છે. છતાં ઘણી વખત તેમના કાર્યને પૂરતી માન્યતા મળતી નથી.
ગોળીબારી વચ્ચે પણ ફરજ પર અડગ રહ્યા
કંગનાએ જણાવ્યું કે ફિલ્મમાં દર્શાવવામાં આવેલી કેટલીક ઘટનાઓ વાસ્તવિક કિસ્સાઓથી પ્રેરિત છે. 26/11 હુમલા દરમિયાન હોસ્પિટલની બહાર અને આસપાસ ગોળીબારીનો માહોલ હતો, છતાં હોસ્પિટલ સ્ટાફે દર્દીઓને એકલા છોડ્યા નહોતા. નર્સો સતત ઓપરેશન થિયેટર, પ્રસૂતિ વિભાગ અને વોર્ડમાં કાર્યરત રહી હતી.કંગનાના જણાવ્યા મુજબ, તે સમય દરમિયાન હોસ્પિટલમાં હાજર કેટલીક નર્સોએ લગભગ 20 બાળકોની ડિલિવરી કરાવી હતી. તેમજ આ કાર્ય માત્ર તબીબી જવાબદારી નહીં પરંતુ અસાધારણ હિંમતનું ઉદાહરણ હતું, કારણ કે તે સમયે દરેક વ્યક્તિ પોતાના જીવના ભયમાં હતી.
સમાજની માનસિકતા બદલવાની જરૂર
કંગના રનૌતે નર્સિંગ વ્યવસાય અંગે સમાજમાં રહેલી કેટલીક માન્યતાઓ પર પણ પ્રશ્નો ઉઠાવ્યા. તેમણે કહ્યું કે નર્સોને ઘણીવાર તેમના વાસ્તવિક યોગદાન કરતાં અલગ દૃષ્ટિકોણથી જોવામાં આવે છે, જ્યારે હકીકતમાં તેઓ આરોગ્ય વ્યવસ્થાની કરોડરજ્જુ સમાન છે.તેમણે ભારપૂર્વક કહ્યું કે નર્સો, વોર્ડ બોય, સફાઈ કર્મચારીઓ અને હોસ્પિટલના અન્ય કર્મચારીઓ વગર આરોગ્યસેવાની કલ્પના પણ કરી શકાતી નથી. આવા કર્મચારીઓ જ દર્દીઓના જીવનને બચાવવા માટે દિવસ-રાત મહેનત કરતા હોય છે.
ફિલ્મ દ્વારા સન્માન આપવાનો પ્રયાસ
કંગનાએ જણાવ્યું કે ‘ભારત ભાગ્ય વિધાતા’ માત્ર એક ફિલ્મ નથી, પરંતુ એવા લોકો પ્રત્યે કૃતજ્ઞતા વ્યક્ત કરવાનો પ્રયાસ છે જેમણે મુશ્કેલ સમયમાં દેશ અને સમાજ માટે પોતાની ફરજ નિભાવી હતી. ફિલ્મમાં નર્સો ઉપરાંત વોર્ડ બોય, લિફ્ટ ઓપરેટર, સુરક્ષા કર્મચારીઓ, પ્રશાસનિક સ્ટાફ અને અન્ય હોસ્પિટલ કર્મચારીઓની બહાદુરીને પણ દર્શાવવામાં આવી છે.
તેમના જણાવ્યા મુજબ, જ્યારે લોકો આ ફિલ્મ જોશે ત્યારે તેમને સમજાશે કે સાચા હીરો માત્ર યુનિફોર્મમાં દેખાતા સૈનિકો જ નહીં પરંતુ હોસ્પિટલમાં કામ કરતા સામાન્ય કર્મચારીઓ પણ હોય છે, જેઓ સંકટના સમયમાં અસાધારણ સાહસ બતાવે છે.
12 જૂને રિલીઝ થશે ફિલ્મ
‘ભારત ભાગ્ય વિધાતા’ 12 જૂનના રોજ સિનેમાઘરોમાં રિલીઝ થવાની છે. ટ્રેલર રિલીઝ થયા બાદ સોશિયલ મીડિયા પર ફિલ્મને સારો પ્રતિસાદ મળી રહ્યો છે. અનેક દર્શકોનું માનવું છે કે આ ફિલ્મ 26/11 હુમલાના એવા પાસાઓને ઉજાગર કરશે, જેના વિશે અત્યાર સુધી બહુ ઓછી ચર્ચા થઈ છે.
26/11ના આતંકી હુમલાને ભારતના ઇતિહાસની સૌથી દુઃખદ ઘટનાઓમાંની એક ગણવામાં આવે છે.
આ અંધકારમય ઘટનામાંથી કેટલીક પ્રેરણાદાયી કહાનીઓ પણ બહાર આવી હતી. ગોળીબારી અને આતંકના માહોલ વચ્ચે દર્દીઓની સેવા કરનાર નર્સો, હોસ્પિટલ સ્ટાફ અને અન્ય કર્મચારીઓએ માનવતા અને ફરજનું અનોખું ઉદાહરણ પૂરું પાડ્યું હતું. કંગના રનૌતની ‘ભારત ભાગ્ય વિધાતા’ એવી જ અનામી હીરોઇઝમને પડદા પર લાવવાનો પ્રયાસ છે, જેથી સમાજ આવા કર્મયોગીઓને યોગ્ય સન્માન આપી શકે.
