અમદાવાદમાં ગુરુવારે વહેલી સવારે ભૂકંપનો હળવો આંચકો અનુભવાયો હતો. ગાંધીનગર સ્થિત ઇન્સ્ટિટ્યૂટ ઑફ સિસ્મોલોજિકલ રિસર્ચ (ISR) દ્વારા જાહેર કરાયેલી માહિતી મુજબ, 30 જુલાઈના રોજ સવારે 4:39 વાગ્યે અમદાવાદ અને આસપાસના વિસ્તારોમાં રિક્ટર સ્કેલ પર 2.6ની તીવ્રતાનો ભૂકંપ નોંધાયો હતો. ભૂકંપની તીવ્રતા ઓછી હોવાથી કોઈ જાનહાનિ કે મિલકતને નુકસાન થયાના અહેવાલ સામે આવ્યા નથી. ISRના જણાવ્યા અનુસાર, ભૂકંપનું કેન્દ્ર અમદાવાદ શહેરથી અંદાજે 29 કિલોમીટર દક્ષિણ-દક્ષિણ પશ્ચિમ (SSW) વિસ્તારમાં હતું. ભૂકંપની ઊંડાઈ જમીનની સપાટીથી આશરે 20 કિલોમીટર નોંધાઈ હતી. ઓછી તીવ્રતાના કારણે આંચકો બહુ જ હળવો રહ્યો હતો, છતાં વહેલી સવારે કેટલાક વિસ્તારોમાં રહેતા લોકોએ ક્ષણિક ધ્રુજારી અનુભવ્યાની માહિતી મળી છે.
ભૂકંપ બાદ કોઈ પણ પ્રકારની જાનહાનિ, ઈજા કે મિલકતને નુકસાન થયાના અહેવાલ પ્રાપ્ત થયા નથી. તંત્ર દ્વારા પણ પરિસ્થિતિ પર નજર રાખવામાં આવી રહી છે અને હાલ કોઈ ચિંતાજનક સ્થિતિ નથી. નિષ્ણાતોના જણાવ્યા મુજબ, ઓછી તીવ્રતાના આવા આંચકાઓ સામાન્ય રીતે મોટા નુકસાનનું કારણ બનતા નથી. ભૂકંપના કારણે લોકોમાં થોડા સમય માટે ચિંતા જોવા મળી હતી, પરંતુ કોઈ અનિચ્છનીય ઘટના બની ન હોવાથી લોકોમાં રાહતનો માહોલ જોવા મળ્યો હતો. ISR સતત ભૂકંપની ગતિવિધિઓ પર નજર રાખી રહ્યું છે અને ભવિષ્યમાં કોઈ મહત્વપૂર્ણ ફેરફાર થાય તો જરૂરી માહિતી જાહેર કરવામાં આવશે.
