૩ વર્ષથી રજૂઆતો છતાં પાલિકા ઘોર નિદ્રામાં; સુંદર તળાવ બન્યું જળચર જીવોનું કબરસ્તાન, સ્થાનિકોએ ચૂંટાયેલા પ્રતિનિધિઓ સામે ઠાલવ્યો આક્રોશ
વડોદરા: સંસ્કારી નગરી વડોદરાના પશ્ચિમ વિસ્તારમાં આવેલા ઐતિહાસિક અને જાણીતા ગોત્રી તળાવમાંથી એક અત્યંત આઘાતજનક અને ચિંતાજનક ઘટના સામે આવી છે. ગોત્રી તળાવમાં અચાનક જ અસંખ્ય માછલીઓ મૃત હાલતમાં મળી આવતાં સમગ્ર પંથકમાં ભારે ચકચાર મચી ગઈ છે. તળાવના કિનારે અને પાણીની સપાટી પર ચારેય તરફ મોટી સંખ્યામાં માછલીઓના મૃતદેહો તરતા જોવા મળ્યા છે, જેના કારણે સ્થાનિક રહીશો અને પર્યાવરણપ્રેમીઓમાં વડોદરા મહાનગરપાલિકાના વહીવટી તંત્ર સામે પ્રચંડ રોષ ફાટી નીકળ્યો છે. આ સામૂહિક મોતના પગલે સમગ્ર વિસ્તારમાં ભારે દુર્ગંધ ફેલાઈ રહી છે, જેનાથી સ્થાનિકોના સ્વાસ્થ્ય સામે પણ મોટો ખતરો ઊભો થયો છે.
સ્થાનિક રહીશોના જણાવ્યા અનુસાર, છેલ્લા લાંબા સમયથી ગોત્રી તળાવની યોગ્ય સફાઈ કરવામાં આવી નથી. તળાવના પાણીની ગુણવત્તાની જાળવણી કે તેમાં રહેતા જળચર જીવોના સંરક્ષણ માટે પાલિકા દ્વારા કોઈ જ નક્કર કામગીરી કરવામાં આવી નથી. તળાવની આ બદતર દુર્દશા અને નિર્દોષ માછલીઓના સામૂહિક મોત પાછળ વડોદરા મહાનગરપાલિકાની ઘોર બેદરકારી સ્પષ્ટપણે જવાબદાર હોવાનું સામે આવ્યું છે.
પાલિકાની આ ઉદાસીનતાના કારણે આજે આ સુંદર તળાવ ગેસ ચેમ્બર અને જળચર જીવો માટે કબરસ્તાન બની ગયું છે.
આ ગંભીર ઘટનાને લઈને સ્થાનિક રહિશોએ તંત્ર અને ચૂંટાયેલા પ્રતિનિધિઓ સામે સીધો આક્રોશ ઠાલવ્યો છે. લોકોનો આક્ષેપ છે કે છેલ્લા ત્રણ-ત્રણ વર્ષથી આ વિસ્તારના નાગરિકો તળાવની ખરાબ પરિસ્થિતિ, ગંદકી અને પાણીના પ્રદૂષણને લઈને પાલિકામાં અનેકવાર લેખિત અને મૌખિક ફરિયાદો કરી ચૂક્યા છે. વારંવાર રજૂઆતો કરવા છતાં પણ તંત્રના બહેરા કાનો સુધી જનતાનો અવાજ પહોંચ્યો નથી અને કોઈ જ નક્કર કાર્યવાહી કરવામાં આવી નથી.
તંત્રની આ આળસ અને આંખ આડા કાન કરવાની નીતિના કારણે જ આજે તળાવમાં રહેતા કાચબા અને માછલીઓ જેવા જળચર જીવો અકાળે મોતને ભેટી રહ્યા છે.
પર્યાવરણપ્રેમીઓએ પણ આ મામલે તીવ્ર નારાજગી વ્યક્ત કરતા જણાવ્યું છે કે, જો સમયસર તળાવના પાણી શુદ્ધ કરવાની કામગીરી કરવામાં આવી હોત તો આ મોટી હોનારત રોકી શકાઈ હોત. હાલમાં આ ઘટનાને પગલે સમગ્ર વડોદરામાં પાલિકાની કામગીરી સામે અનેક સવાલો ઉઠી રહ્યા છે. સ્થાનિકો હવે આ મામલે જવાબદાર અધિકારીઓ સામે કડક પગલાં લેવાની અને તળાવની કાયમી સફાઈ કરવાની ઉગ્ર માંગ કરી રહ્યા છે.
