ત્રણેય ઇજાગ્રસ્તો હોસ્પિટલમાં સારવાર હેઠળ, જાનથી મારી નાખવાની ધમકી આપી પતિ ફરાર, વાડી પોલીસે તપાસનો ધમધમાટ તેજ કર્યો
(પ્રતિનિધિ), વડોદરા. તા.15
વડોદરાના પથ્થરગેટ વિસ્તારમાં ઘરેલુ ઝઘડાએ હિંસક સ્વરૂપ ધારણ કરતા ચકચાર મચી ગઈ છે. 8 મહિનાથી અલગ રહેતી પત્નીના ઘરે જઈ ઉશ્કેરાયેલા પતિએ પત્ની, પોતાની સગી પુત્રી અને વચ્ચે છોડાવવા પડેલા માસી પર કટર બ્લેડ વડે હિચકારો હુમલો કરતા સમગ્ર વિસ્તારમાં ફાળ પડી ગઈ છે. હુમલામાં ગંભીર રીતે ઘવાયેલી માતા-પુત્રી અને માસીને તાત્કાલિક હોસ્પિટલમાં ખસેડવામાં આવ્યા છે.
મળતી માહિતી મુજબ, વડોદરાના વાડી વિસ્તારમાં આવેલા પથ્થરગેટ પાસેની ખારવા વાડમાં 33 વર્ષીય મયુરીબેન ખારવા રહે છે. તેમના લગ્ન શૈલેષ ખારવા સાથે થયા હતા, પરંતુ છેલ્લા 8 મહિનાથી દંપતી વચ્ચે મતભેદો ચાલતા હોવાથી મયુરીબેન પોતાની દીકરી રિયા સાથે પિયરમાં માતાના ઘરે રહેતા હતા.
ગઈકાલે 14 એપ્રિલના રોજ બપોરના સમયે મયુરીબેન ઘરે રાખડી બનાવવાનું કામ કરી રહ્યા હતા. આ દરમિયાન અચાનક તેમનો પતિ શૈલેષ ત્યાં ધસી આવ્યો હતો અને જૂની અદાવત રાખી ગાળાગાળી કરવા લાગ્યો હતો. જોતજોતામાં ઝઘડો ઉગ્ર બન્યો હતો.
જ્યારે આ ઝઘડો હિંસક બની રહ્યો હતો, ત્યારે મયુરીબેનના માસી ભાનુમતિબેન વચ્ચે છોડાવવા પડ્યા હતા. આરોપી શૈલેષે પિત્તો ગુમાવી ભાનુમતિબેનનું ગળું પકડી લીધું હતું અને પોતાની પાસે રહેલી ધારદાર કટર બ્લેડ કાઢી હુમલો કરી દીધો હતો. પતિએ પોતાની પત્ની મયુરીબેન, માસી ભાનુમતિબેન અને નિર્દોષ દીકરી રિયા પર કટરના ઘા ઝીંકી દીધા હતા. ત્રણેયને હાથના ભાગે ગંભીર ઈજાઓ પહોંચતા લોહીલુહાણ હાલતમાં ચીસાચીસ કરી મૂકી હતી.
હુમલા બાદ આસપાસના લોકો એકઠા થઈ જતાં આરોપી શૈલેષ પત્નીને ‘જાનથી મારી નાખીશ’ તેવી ધમકી આપી નાસી છૂટ્યો હતો. ઇજાગ્રસ્ત મયુરીબેન અને રિયાને તાત્કાલિક જમનાબાઈ હોસ્પિટલ લઈ જવામાં આવ્યા હતા. જોકે, પુત્રી રિયા અને માસી ભાનુમતિબેનને ગંભીર ઈજાઓ હોવાથી તેઓને વધુ સારવાર અર્થે સયાજી હોસ્પિટલ ખાતે રિફર કરવામાં આવ્યા છે.
ઘટનાની જાણ થતાં જ વાડી પોલીસ કાફલો હોસ્પિટલ અને ઘટના સ્થળે દોડી ગયો હતો. મયુરીબેનની ફરિયાદના આધારે પોલીસે ફરાર શૈલેષ ખારવા વિરુદ્ધ હુમલો અને જાનથી મારી નાખવાની ધમકી આપવા બદલ ગુનો નોંધી તેને ઝડપી પાડવા માટેના ચક્રો ગતિમાન કર્યા છે. પવિત્ર સંબંધોમાં લોહી વહેતા પથ્થરગેટ વિસ્તારમાં આ ઘટના ટોક ઓફ ધ ટાઉન બની છે.
