ઈરાન-ઈઝરાયલ યુદ્ધ વચ્ચે વિશ્વમાં વધતી તણાવભરી પરિસ્થિતિના સમયે અભિનેતા સલમાન ખાને પોતાની આગામી ફિલ્મના નામમાં મહત્વપૂર્ણ ફેરફાર કર્યો છે. પહેલા ‘બેટલ ઓફ ગલવાન’ તરીકે ઓળખાતી ફિલ્મ હવે નવા નામ ‘માતૃભૂમિ: મે વોર રેસ્ટ ઇન પીસ’ સાથે દર્શકો સમક્ષ આવશે. સલમાન ખાન ફિલ્મ્સ દ્વારા આ નવા શીર્ષકની સત્તાવાર જાહેરાત કરવામાં આવી છે. નિર્માતાઓએ ફિલ્મનું નવું પોસ્ટર પણ રિલીઝ કર્યું છે, જે માત્ર નામમાં ફેરફાર દર્શાવતું નથી પરંતુ વિશ્વ માટે શાંતિનો સંદેશ પણ આપે છે. ફિલ્મની ટેગલાઇન “May War Rest in Peace” ખાસ ધ્યાન ખેંચી રહી છે, જે યુદ્ધ કરતાં શાંતિને વધુ મહત્વ આપવાની ભાવના વ્યક્ત કરે છે.
આ ફિલ્મમાં સલમાન ખાન સાથે અભિનેત્રી ચિત્રાંગદા સિંહ મુખ્ય ભૂમિકામાં જોવા મળશે. ફિલ્મ માટે પહેલાથી જ ‘મધરલેન્ડ’ નામનું ગીત રિલીઝ કરવામાં આવ્યું હતું, જેને જાણીતા ગાયક અરિજીત સિંહે અવાજ આપ્યો છે. ગીતને ચાહકો તરફથી સારો પ્રતિસાદ મળ્યો છે અને હવે ફિલ્મના નવા શીર્ષક સાથે તેની ચર્ચા સોશિયલ મીડિયા પર વધુ તેજ થઈ ગઈ છે. ફિલ્મ ગલવાન ખીણમાં થયેલી ઐતિહાસિક ઘટનાઓથી પ્રેરિત હોવાનું કહેવાય છે. જોકે નવા શીર્ષક દ્વારા નિર્માતાઓ માત્ર યુદ્ધની વાત નહીં પરંતુ વિશ્વમાં શાંતિ અને માનવતાના સંદેશને પ્રાથમિકતા આપવા ઈચ્છે છે. સલમાન ખાનનો આ નિર્ણય સોશિયલ મીડિયા પર ચર્ચાનો વિષય બન્યો છે અને ઘણા લોકોએ આ બોલ્ડ પગલાની પ્રશંસા પણ કરી છે. નવા નામ સાથે ફિલ્મનો સંદેશ વધુ વ્યાપક બન્યો છે, જે યુદ્ધ અને સંઘર્ષથી પરે જઈને સમગ્ર વિશ્વમાં શાંતિની આશા વ્યક્ત કરે છે.
