શનિવારથી શરૂ થયેલા ઈરાનના ઈઝરાયલ અને અમેરિકા સામેના યુદ્ધે સમગ્ર મધ્ય પૂર્વમાં તણાવ વધાર્યો છે. ઈઝરાયલી અને અમેરિકન સંયુક્ત હુમલાઓના જવાબમાં ઈરાને ઈઝરાયલ તેમજ કતાર, કુવૈત, બહેરીન અને યુએઈ સહિત અનેક ખાડી દેશો પર મિસાઈલ છોડ્યા. મધ્ય પૂર્વમાં આ ઝડપથી વધતા તણાવને કારણે અનેક દેશોના મુખ્ય આંતરરાષ્ટ્રીય એરપોર્ટ પર ફ્લાઇટ કામગીરી સ્થગિત કરવામાં આવી છે, જેના કારણે હજારો ફ્લાઇટ્સ અને લાખો મુસાફરોને ગંભીર અસર થઈ છે. ઈઝરાયલ અને ઈરાન વચ્ચે ચાલી રહેલા યુદ્ધને કારણે રવિવારે હજારો ફ્લાઇટ્સ રદ કરવામાં આવી હતી.
દુબઈ, અબુ ધાબી અને દોહા એરપોર્ટ બંધ
ઈઝરાયલ અને ઈરાન વચ્ચેના મિસાઈલ હુમલાઓને કારણે ખાડી દેશોએ તેમના હવાઈ ક્ષેત્ર બંધ કરી દીધા છે જેના પરિણામે હજારો ફ્લાઇટ્સ રદ કરવામાં આવી છે. ઈઝરાયલ અને ઈરાન વચ્ચે ઝડપથી વધી રહેલા તણાવની ખાડી દેશોના અનેક એરપોર્ટ પર ગંભીર અસર પડી છે. યુએઈમાં દુબઈ આંતરરાષ્ટ્રીય એરપોર્ટ, જે વિશ્વભરમાં લાખો લોકોને સેવા આપે છે તે આ સંઘર્ષથી પ્રભાવિત મુખ્ય આંતરરાષ્ટ્રીય એરપોર્ટની યાદીમાં ટોચ પર છે. યુએઈની રાજધાની, અબુ ધાબી આંતરરાષ્ટ્રીય એરપોર્ટ પણ પ્રભાવિત થયું છે. કતારની રાજધાની દોહામાં આંતરરાષ્ટ્રીય એરપોર્ટ પણ બંધ કરવામાં આવ્યું છે.
કુવૈત, બહેરીન, તેહરાન અને બૈરૂતના એરપોર્ટ પણ પ્રભાવિત થયા
ઇઝરાયલનું મુખ્ય તેલ અવીવ એરપોર્ટ, ઇરાનની રાજધાની તેહરાન આંતરરાષ્ટ્રીય એરપોર્ટ અને ઇરાકનું એર્બિલ એરપોર્ટ પણ બંધ છે. કુવૈત અને બહેરીને પણ તેમના એરપોર્ટ પર ઇરાની હુમલા બાદ કામગીરી સ્થગિત કરી દીધી છે. વધુમાં લેબનોનની રાજધાની બેરૂતના આંતરરાષ્ટ્રીય એરપોર્ટથી મોટી સંખ્યામાં ફ્લાઇટ્સ રદ કરવામાં આવી છે. જોર્ડનના અમ્માનમાં આંતરરાષ્ટ્રીય એરપોર્ટથી ચાલતી ફ્લાઇટ્સ પણ રદ કરવામાં આવી છે. એ નોંધવું જોઇએ કે ઇરાને ઘણા ગલ્ફ દેશોમાં મુખ્ય એરપોર્ટને નિશાન બનાવ્યા છે.
ભારતીય એરલાઇન્સે 444 આંતરરાષ્ટ્રીય ફ્લાઇટ્સ રદ કરી
ભારતીય એરલાઇન્સે ગલ્ફ દેશોમાંથી પસાર થતી આંતરરાષ્ટ્રીય ફ્લાઇટ્સ પણ રદ કરી છે. નાગરિક ઉડ્ડયન મંત્રાલયે જણાવ્યું હતું કે પશ્ચિમ એશિયામાં હવાઈ ક્ષેત્ર પર પ્રતિબંધોને કારણે ભારતીય એરલાઇન્સ આજે 444 આંતરરાષ્ટ્રીય ફ્લાઇટ્સ રદ કરે તેવી અપેક્ષા છે. 28 ફેબ્રુઆરીએ ઈરાન અને પશ્ચિમ એશિયાના ભાગોમાં હવાઈ ક્ષેત્ર પર પ્રતિબંધોને કારણે 410 સ્થાનિક એરલાઇન ફ્લાઇટ્સ રદ કરવામાં આવી હતી. શનિવારે નાગરિક ઉડ્ડયન મહાનિર્દેશાલય (DGCA) એ એરલાઇન્સને 2 માર્ચ સુધી ઈરાન, ઇઝરાયલ, લેબનોન, UAE, સાઉદી અરેબિયા, બહેરીન, ઓમાન, ઇરાક, જોર્ડન, કુવૈત અને કતારના હવાઈ ક્ષેત્રનો ઉપયોગ ન કરવાની સલાહ આપી હતી.
