સુપ્રીમ કોર્ટે તમામ રાજ્યો અને કેન્દ્રશાસિત પ્રદેશોને નિર્દેશ આપ્યો છે કે બધી શાળાઓ છોકરીઓને મફત બાયોડિગ્રેડેબલ સેનિટરી પેડ પૂરા પાડે. સુપ્રીમ કોર્ટે તમામ રાજ્યો અને કેન્દ્રશાસિત પ્રદેશોને શાળાઓમાં છોકરાઓ અને છોકરીઓ માટે અલગ શૌચાલય સુનિશ્ચિત કરવા પણ નિર્દેશ આપ્યો. કોર્ટે તમામ શાળાઓને દિવ્યાંગ માટે પણ અનુકુળ શૌચાલય પૂરા પાડવાનો પણ નિર્દેશ આપ્યો.
કોર્ટે જણાવ્યું હતું કે માસિક સ્રાવની સ્વચ્છતાનો અધિકાર બંધારણ દ્વારા બાંયધરીકૃત જીવનનો મૂળભૂત અધિકાર છે. કોર્ટે ચેતવણી આપી હતી કે જો ખાનગી શાળાઓ છોકરીઓ અને છોકરાઓ માટે અલગ શૌચાલય અને સેનિટરી પેડ પૂરા પાડવામાં નિષ્ફળ જાય તો તેમની માન્યતા રદ કરવામાં આવશે.
ન્યાયાધીશ જે.બી. પારડીવાલા અને આર. મહાદેવનની બેન્ચે તમામ રાજ્યો અને કેન્દ્રશાસિત પ્રદેશોને બધી શાળાઓમાં છોકરીઓ અને છોકરાઓ માટે અલગ શૌચાલય સુનિશ્ચિત કરવાનો નિર્દેશ આપ્યો. બધી શાળાઓ ભલે તે સરકાર દ્વારા સંચાલિત હોય કે ખાનગી રીતે નિયંત્રિત, અપંગો માટે યોગ્ય શૌચાલય પૂરા પાડવા જ જોઈએ. બેન્ચે એમ પણ કહ્યું કે જો સરકારો છોકરીઓને શૌચાલય અને મફત સેનિટરી પેડ પૂરા પાડવામાં નિષ્ફળ જાય તો તે તેમને જવાબદાર ઠેરવશે.
સરકારી અને સરકારી સહાયિત શાળાઓમાં ધોરણ 6 થી 12 સુધીની કિશોરીઓ માટે કેન્દ્ર સરકારની ‘શાળામાં જતી છોકરીઓ માટે માસિક સ્રાવ સ્વચ્છતા નીતિ’ ના સમગ્ર ભારતમાં અમલીકરણની માંગ કરતી જયા ઠાકુર દ્વારા દાખલ કરાયેલી જાહેર હિતની અરજી પર સુપ્રીમ કોર્ટે 10 ડિસેમ્બર 2024 ના રોજ પોતાનો ચુકાદો અનામત રાખ્યો હતો.
