લોકસભા ચૂંટણી 2024ની સાથે સિક્કિમમાં વિધાનસભા ચૂંટણીનું પણ આયોજન કરવામાં આવ્યું હતું. સિક્કિમ વિધાનસભા ચૂંટણીના પરિણામો રવિવાર 2 જૂનના રોજ જાહેર કરવામાં આવ્યા છે. લોકસભા ચૂંટણી 2024ના પરિણામો પહેલા કોંગ્રેસ પાર્ટીને સિક્કિમ વિધાનસભા ચૂંટણીમાં મોટો ઝટકો લાગ્યો છે. પાર્ટીને NOTA કરતા અનેક ગણા ઓછા વોટ મળ્યા છે.
સિક્કિમ વિધાનસભા ચૂંટણીમાં રાજ્યના સીએમ પ્રેમ સિંહ તમંગની પાર્ટીને મોટી જીત મળી છે. સત્તાધારી સિક્કિમ ક્રાંતિકારી મોરચા (SKM) એ 32માંથી 31 બેઠકો પર રેકોર્ડ જીત મેળવી છે. પૂર્વ સીએમ પવન કુમાર ચામલિંગની પાર્ટી સિક્કિમ ડેમોક્રેટિક ફ્રન્ટ એટલે કે SDF એ 1 સીટ જીતી છે. સિક્કિમની 32 વિધાનસભા બેઠકો અને 1 લોકસભા બેઠક માટે પ્રથમ તબક્કામાં 19 એપ્રિલે મતદાન થયું હતું.
કયા પક્ષને કેટલા ટકા મત
સિક્કિમમાં કોંગ્રેસને NOTA કરતા ઓછા વોટ મળ્યા. સિક્કિમમાં NOTAને 0.99 ટકા વોટ મળ્યા જ્યારે કોંગ્રેસને 0.32 ટકા વોટ મળ્યા. ભારતીય જનતા પાર્ટીને રાજ્યમાં 5.18 ટકા વોટ મળ્યા છે. SKMને 58.38 ટકા, SDFને 27.37 ટકા અને અન્યને 7.7 ટકા વોટ મળ્યા હતા.
જણાવી દઈએ કે પ્રેમ સિંહ તમાંગ હાલમાં સિક્કિમના મુખ્યમંત્રી છે. તેઓ 2019માં રાજ્યના છઠ્ઠા મુખ્યમંત્રી તરીકે ચૂંટાયા હતા. પ્રેમ સિંહ તમાંગ પશ્ચિમ સિક્કિમથી આવે છે અને 1990 ના દાયકાની શરૂઆતથી રાજકારણમાં સક્રિય છે. 1993માં પ્રેમ સિંહ તમાંગ સિક્કિમ ડેમોક્રેટિક ફ્રન્ટ (SDF)માં જોડાયા અને 1994માં ચકુંગ વિધાનસભા બેઠક પરથી ચૂંટણી લડીને વિધાનસભા પહોંચ્યા. આ પછી તેઓ રાજ્ય સરકારમાં મંત્રી પણ બન્યા અને 2009 સુધી કેબિનેટ મંત્રી રહ્યા.
