સલમાન ખાન ઘણા વખતથી કોઈ નવી હીરોઈનની શોધમાં હતો. જેની સાથે તેની સ્ટારજોડી મનાતી હતી તે તો હવે તેની સાથે રહી નથી. ‘સિકંદર’ નામની તેની નવી ફિલ્મ આવી રહી છે. એઆર મરુગાકોષ દિગ્દર્શીત આ ફિલ્મ કે જે આવતા વર્ષની ઈદ પર રજૂ કરાશે એવું નક્કી થયું છે. તેની હીરોઈન તરીકે આખરે રશ્મિકા મંદાના નક્કી થઈ છે. સલમાન જેવા સ્ટાર સાથે ફિલ્મ મળવાથી રશ્મિકાની ચર્ચા જરૂર વધશે. વિત્યા વર્ષોમાં એવું બનતું હતું કે સલમાન સાથે કામ કરનારી હીરોઈનોને જાણે સલમાનની ગરજ હોય પણ રશ્મિકા બાબતે ઉલ્ટું છે. સલમાનને તેની જરૂર પડી છે. હવે તેણે ફ્રેશ લુકઆઉટની, ફ્રેશ જોડીની જરૂર છે. અલબત્ત, રશ્મિકાને આનો મોટો ફાયદો થશે. ‘પુષ્પા-ધ-રાઈઝ’ થી ફાયદો થવો જોઈતો હતો અલ્લુ અર્જુનને પણ રશ્મિકા માટે તે જાણે હિન્દી ફિલ્મોમાં પ્રવેશની ફિલ્મ બની ગઈ. તેની સાદગીમાં એક પ્રકારની માદકતા છે. તેના સૌંદર્યમાં એક ખાસ પ્રકારની કામુકતા છે જે પુરુષ પ્રેક્ષકને ગમે છે. ‘પુષ્પા-ધ-રાઈઝ’થી રશ્મિકાનો જે રાઈઝ થયો તેને ‘સિકંદર’થી હાઈપ મળી છે.
રશ્મિકા અત્યાર સુધી તો હિન્દી ફિલ્મોમાં ધીમી રહી છે. ‘પુષ્પા’ પછી તે અમિતાભ બચ્ચન સાથેની ‘ગુડબાય’માં આવી હતી પણ ફિલ્મ ખાસ જોર નહોતી કરી શકી. ‘મિશન મજનુ’માં પણ તેઓ પ્રેક્ષકોને મજનુ બનાવી ન શકી. હા, તેની ‘એનિમલ’ ખૂબ સફળ રહી છે પણ ફાયદો તો રણબીર કપૂરને થયો છે. પરંતુ હવેની ફિલ્મો તેના માટે જાદુ કરી શકે છે. વિકી કૌશલ સાથે તે ‘છાવા’માં યેસુબાઈ ભોંસલે તરીકે દેખાવાની છે. મરાઠી લુકમાં પ્રિયંકા ચોપરા, દિપીકા પાદુકોણ જો જામી શકે તો રશ્મિકા કાંઈ કમ નથી. સંદિપ રેડ્ડી વાંગાએ ‘એનિમલ’ની સિક્વલ ‘એનિમલ પાર્ક’ બનાવવા માંડી છે. જેમાં તે ફરી રણબીર કપૂર સાથે દેખાશે. અન્ય એક ફિલ્મ ‘એક સાથ દો દો’ છે. રણબીર કપૂર સાથે તો તે અનુરાગ બસુ દિગ્દર્શિંત ફિલ્મમાં પણ કામ કરી રહી છે. રણબીર કપૂરે જાણે રશ્મિકા સાથે જોડી પાકી કરી લીધી છે. રશ્મિકા જાણે ટોપના સ્ટાર્સની હીરોઈન તરીકે પસંદ પામી રહી છે. આ સંજોગોમાં તેની ‘પુષ્પા: ધ રુલ’ આવશે તો ધમાલ મચી જશે કારણકે તે જબરદસ્ત અપેક્ષા જગાવી ચૂકી છે.
રશ્મિકા આટલી બધી હિન્દી ફિલ્મોમાં છે અને સાઉથની આવેલી કોઈ અભિનેત્રીને આટલી બધી ફિલ્મો નથી મળી. તેની લોકપ્રિયતા તો એવી છે કે સાઉથની ‘કુબેરા’, ‘સ્ટુઅર્ટ’ પુરુમ ડોંગા’ ‘ધ ગર્લફ્રેન્ડ’ અને રેઈનબો’ માં પણ તે આવી રહી છે રશ્મિકા જાણે ચન્દ્રયાનની ગતિએ ઊંચે જઈ રહી છે. આ બધા સંજોગોમાં સલમાનખાન સાથે આવવાથી તે વધારે છવાશે. •
