રાજકીય આગેવાનો સાથે બેઠક યોજી શાંતિપૂર્ણ અને નિષ્પક્ષ ચૂંટણી માટે માર્ગદર્શન; ગેરકાયદેસર પ્રવૃત્તિ સામે કડક કાર્યવાહીનો ઈશારો
(પ્રતિનિધિ) સુખસર, તા. ૨૧ એપ્રિલ
આગામી સ્થાનિક સ્વરાજ્યની ચૂંટણીને ધ્યાનમાં રાખીને Ravirajsinh Jadeja દ્વારા સુખસર તાલુકાના નિદકાપૂર્વ અને કુંડલા ગામની વિશેષ મુલાકાત લેવામાં આવી હતી. મુલાકાત દરમિયાન બંને ગામોમાં વિવિધ રાજકીય પક્ષોના આગેવાનો અને કાર્યકર્તાઓ સાથે બેઠક યોજાઈ હતી.
બેઠક દરમિયાન એસપીએ તમામ પક્ષોના આગેવાનોને શાંતિપૂર્ણ અને નિષ્પક્ષ રીતે ચૂંટણી યોજાય તે માટે જરૂરી માર્ગદર્શન આપ્યું હતું. તેમણે જણાવ્યું હતું કે પોલીસ હંમેશા પ્રજાની મિત્ર છે અને કોઈપણ સમસ્યા હોય તો નિડરપણે પોલીસનો સંપર્ક કરવો. “અડધી રાત્રે પણ પોલીસની જરૂર પડે તો જાણ કરશો, અમે મદદ માટે આવી જઈશું,” તેમ વિશ્વાસ વ્યક્ત કર્યો હતો.
તેમણે ચૂંટણીને લોકશાહીનો પવિત્ર તહેવાર ગણાવી દરેક મતદાતાને પોતાના મનપસંદ ઉમેદવાર અને પક્ષને મત આપવાનો અધિકાર હોવાનો ઉલ્લેખ કર્યો હતો. સાથે જ લોકશાહી પ્રક્રિયામાં સૌએ જવાબદારીપૂર્વક ભાગ લેવા અને કાયદો-વ્યવસ્થા જાળવવામાં સહકાર આપવા અપીલ કરી હતી.
વધુમાં એસપી રવિરાજસિંહ જાડેજાએ કડક ચેતવણી આપતા જણાવ્યું કે જો કોઈ વ્યક્તિ કાયદા વિરુદ્ધ પ્રવૃત્તિ કરશે અથવા કાયદો હાથમાં લેવાનો પ્રયાસ કરશે તો તેના સામે સખત કાર્યવાહી કરવામાં આવશે. ચૂંટણી દરમિયાન કોઈપણ પ્રકારની ગેરકાયદેસર હરકત સહન નહીં કરવામાં આવે તેવો પણ સ્પષ્ટ સંદેશ આપવામાં આવ્યો હતો.
આ મુલાકાત દરમિયાન પોલીસ તંત્ર દ્વારા વિસ્તારમાં કાયદો-વ્યવસ્થા જાળવવા માટે લેવામાં આવેલા પગલાં અંગે પણ ચર્ચા કરવામાં આવી હતી, જેથી સમગ્ર વિસ્તારમાં શાંતિપૂર્ણ વાતાવરણમાં મતદાન પ્રક્રિયા પૂર્ણ થઈ શકે.
રિપોર્ટર: બાબુભાઈ સોલંકી
