તામિલનાડુ વિધાનસભા ચૂંટણી 2026ના આગમનના પડઘમ વાગી રહ્યા છે. 23 એપ્રિલે એક જ તબક્કામાં મતદાન થવાનું છે, જ્યારે પરિણામો 4 મેના રોજ જાહેર કરવામાં આવશે. રાજ્યભરમાં રાજકીય પક્ષો અને ઉમેદવારો જોરશોરથી પ્રચારમાં લાગી ગયા છે અને અગ્રણી નેતાઓ મતદારોને આકર્ષવા માટે સતત રેલીઓ અને મુલાકાતો કરી રહ્યા છે. તામિલનાડુમાં કુલ 234 વિધાનસભા બેઠકો છે. જેમાંથી 44 બેઠકો અનુસૂચિત જાતિ (SC) અને 2 બેઠકો અનુસૂચિત જનજાતિ (ST) માટે અનામત રાખવામાં આવી છે. રાજ્ય રાજકીય રીતે પશ્ચિમ, દક્ષિણ, મધ્ય અને ઉત્તર પ્રદેશોમાં વહેંચાયેલું છે, જ્યાં અલગ-અલગ વિસ્તારોમાં અલગ રાજકીય સમીકરણો જોવા મળી રહ્યા છે.
આ ચૂંટણીમાં મુખ્ય મુકાબલો પરંપરાગત રીતે દ્રવિડ મુનેત્ર કઝગમ (DMK) અને અખિલ ભારતીય અન્ના દ્રવિડ મુનેત્ર કઝગમ (AIADMK) વચ્ચે જ છે. વર્તમાન મુખ્યમંત્રી એમ.કે. સ્ટાલિન DMKનું નેતૃત્વ કરી રહ્યા છે, જ્યારે એડાપ્પડી પલાનીસ્વામી AIADMKના મુખ્ય ચહેરા તરીકે મેદાનમાં છે. આ વખતે અભિનેતા સી. જોસેફ વિજય પણ તેમની પાર્ટી ‘તમિલગા વેત્રી કઝગમ’ સાથે ચૂંટણીમાં ઉતર્યા છે, જે રાજકારણમાં નવા જોશ તરીકે સામે આવી રહ્યા છે. તેમની મોટી ફેન ફોલોઇંગને કારણે તેઓ સારો મત મેળવશે તેવી શક્યતા વ્યક્ત કરવામાં આવી રહી છે, પરંતુ શું તેઓ પરંપરાગત રાજકીય સમીકરણોમાં ફેરફાર લાવી શકશે તે પરિણામો બાદ જ સ્પષ્ટ થશે.
ચૂંટણીના મુખ્ય મુદ્દાઓમાં સીમાંકન બિલ, મહિલાઓ માટે અનામત, સત્તા વિરોધી લહેર અને જાતિ આધારિત રાજકારણ મહત્વપૂર્ણ છે. આ મુદ્દાઓ મતદારોના મન પર અસર કરી શકે છે અને પરિણામોને પ્રભાવિત કરી શકે છે. ભારતીય જનતા પાર્ટી (BJP) પણ આ વખતે વધુ મજબૂત પ્રદર્શન કરવાની આશા રાખે છે. AIADMK સાથે ગઠબંધન બાદ BJP 27 બેઠકો પર ચૂંટણી લડી રહી છે. ખાસ કરીને દક્ષિણ અને પશ્ચિમ તમિલનાડુમાં BJPને સારું પ્રદર્શન કરવાની અપેક્ષા છે. જયલલિતાની પાર્ટી AIADMK હજુ પણ રાજ્યમાં મજબૂત સંગઠન ધરાવે છે. 2021ની ચૂંટણીમાં ગઠબંધને 75 બેઠકો જીતી હતી. જોકે, 2024ની લોકસભા ચૂંટણીમાં BJP અલગ લડતાં AIADMKના મતહિસ્સામાં ઘટાડો નોંધાયો હતો. કુલ મળીને, તામિલનાડુની આ ચૂંટણી માત્ર સત્તા માટેની લડાઈ નહીં પરંતુ નવા અને જૂના રાજકીય સમીકરણોની કસોટી તરીકે પણ જોવામાં આવી રહી છે. પરિણામો રાજ્યની રાજકીય દિશા નક્કી કરશે.
