15 વર્ષીય ઓપનર વૈભવ સૂર્યવંશીની આગામી ODI ત્રિકોણીય શ્રેણી માટે ભારત-A ટીમમાં પસંદગી કરવામાં આવી છે. ગુરુવારે ટીમની જાહેરાત કરવામાં આવી હતી. તિલક વર્મા ટીમનું નેતૃત્વ કરશે. આ પહેલી વાર છે જ્યારે વૈભવ દેશ માટે ODI શ્રેણી રમશે. આ પહેલા તેણે એશિયા કપ રાઇઝિંગ સ્ટાર્સ દરમિયાન T20 ટુર્નામેન્ટમાં ભારતનું પ્રતિનિધિત્વ કર્યું હતું.
વૈભવ જૂનમાં શ્રીલંકામાં યોજાનારી ODI ત્રિકોણીય શ્રેણીમાં ભાગ લેશે. ભારત અને શ્રીલંકા ઉપરાંત અફઘાનિસ્તાન ‘A’ ટીમ પણ આ શ્રેણીમાં ભાગ લેશે. વૈભવ IPLમાં બે સદી ફટકારી ચૂક્યો છે. તેણે 2025માં ગુજરાત સામે 36 બોલમાં સદી ફટકારી હતી અને આ સિઝનમાં હૈદરાબાદ સામે 37 બોલમાં બીજી સદી ફટકારી હતી.
વૈભવે IPLમાં 440 રન બનાવ્યા
વૈભવ હાલમાં IPLમાં તેની બીજી સિઝન રમી રહ્યો છે. ૨૦૨૬ની સીઝનમાં તેણે ૧૧ મેચોમાં ૨૩૭ ના સ્ટ્રાઇક રેટથી ૪૪૦ રન બનાવ્યા છે. જયપુરમાં રમાયેલી મેચમાં તેણે હૈદરાબાદ સામે સદી ફટકારી હતી. તે ઇનિંગ દરમિયાન તેણે ૧૨ છગ્ગા અને ૫ ચોગ્ગા ફટકાર્યા હતા.
જૂનમાં યોજાનારી વનડે ત્રિકોણીય શ્રેણી
જૂનમાં યોજાનારી વનડે ત્રિકોણીય શ્રેણી માટે પ્રિયાંશ આર્ય, વૈભવ સૂર્યવંશી, આયુષ બદોની, નિશાંત સિંધુ અને અંશુલ કંબોજ જેવી યુવા પ્રતિભાઓને ઇન્ડિયા-Aનું પ્રતિનિધિત્વ કરવાની તક આપવામાં આવી છે. પ્રભસિમરન સિંહ અને કુમાર કુશાગ્રને વિકેટકીપર તરીકે ટીમમાં સામેલ કરવામાં આવ્યા છે. વનડે ત્રિકોણીય શ્રેણીની બધી મેચ દાંબુલામાં રમાશે. આ શ્રેણી પછી ઇન્ડિયા-A ટીમ શ્રીલંકા-A સામે બે મલ્ટી-ડે મેચ રમવાનું પણ આયોજન છે. આ મેચો માટે એક અલગ ટીમ પછીની તારીખે જાહેર કરવામાં આવશે.
