નવી દિલ્હી: ચૂંટણી પંચ (Election Commission) આજે તા. 16મી માર્ચની બપોરે 3 વાગ્યે લોકસભા ચૂંટણી 2024ની (Lok Sabha Election 2024) તારીખોની જાહેરાત કરશે. આ સાથે કેટલાક રાજ્યોમાં વિધાનસભા ચૂંટણીની (Assembly elections) તારીખો પણ જાહેર કરવામાં આવશે. આ વિધાનસભા ચૂંટણીઓ ઓડિશા, સિક્કિમ, અરુણાચલ પ્રદેશ અને આંધ્ર પ્રદેશમાં યોજાશે. ચૂંટણી પંચના તમામ સોશિયલ મીડિયા પ્લેટફોર્મ પર તેનું લાઈવ સ્ટ્રીમિંગ થશે.
સૂત્રોએ જણાવ્યું કે લોકસભાની ચૂંટણી સાતથી આઠ તબક્કામાં યોજાઈ શકે છે. અગાઉ ગુરુવારે નવા ચૂંટણી કમિશનરોની નિમણૂક બાદ આજે તેમણે ચાર્જ સંભાળ્યો હતો. મુખ્ય ચૂંટણી કમિશનર રાજીવ કુમારે શુક્રવારે સવારે બંને ચૂંટણી કમિશનર જ્ઞાનેશ કુમાર અને સુખબીર સિંહ સંધુનું સ્વાગત કર્યું હતું. બંનેએ ચાર્જ સંભાળ્યા બાદ શુક્રવારે લગભગ 11 વાગ્યાની આસપાસ ચૂંટણી પંચની મહત્વની બેઠક મળી હતી. આ બેઠકમાં લોકસભાની ચૂંટણીની તૈયારીઓની સમીક્ષા કરવામાં આવી હતી. બંને ચૂંટણી કમિશનરોએ ચૂંટણી કાર્યક્રમને અંતિમ સ્વરૂપ આપવા પર CEC સાથે વિચાર-વિમર્શ કર્યો હતો.
ગઈ વખતે 7 તબક્કામાં ચૂંટણી યોજાઈ હતી
2019માં લોકસભાની ચૂંટણી સાત તબક્કામાં યોજાઈ હતી. ગત વખતે ચૂંટણી પંચે 10 માર્ચે તારીખોની જાહેરાત કરી હતી. પ્રથમ તબક્કાનું મતદાન 11 એપ્રિલે અને છેલ્લા તબક્કાનું મતદાન 19 મેના રોજ થયું હતું. પરિણામ 23 મેના રોજ આવ્યું હતું. તે ચૂંટણી સમયે દેશમાં 91 કરોડથી વધુ મતદારો હતા, જેમાંથી 67 ટકા લોકોએ મતદાન કર્યું હતું.
2019 માં શું પરિણામો આવ્યા હતા?
2019ની લોકસભા ચૂંટણીમાં ભાજપે 2014ની સરખામણીમાં મોટી જીત હાંસલ કરી હતી. 2014માં ભાજપે 282 સીટો જીતી હતી જ્યારે 2019માં 303 સીટો પર જીત મેળવી હતી. જ્યારે NDAને 353 બેઠકો મળી હતી. બીજેપીને 37.7% થી વધુ વોટ મળ્યા હતા, જ્યારે NDA ને 45% વોટ મળ્યા હતા. કોંગ્રેસ માત્ર 52 સીટો જીતી શકી હતી.
